قازاقستاندىق وقۋشىلار ا ق ش-تا وتكەن درون سپورتى بويىنشا ەكى حالىقارالىق جارىستا ۇزدىك بەستىككە ەندى

12 جاستاعى ءاليحان نسانبايەۆ MultiGP World Championship 2026 الەم چەمپيوناتىندا بەسىنشى ورىن يەلەنسە، درون-فۋتبولدان قازاقستان ۇلتتىق قۇراماسى USA Drone Soccer International Cup 2026 تۋرنيرىندە ۇزدىك بەستىككە ەندى.

داللاس قالاسىندا وتكەن الەم چەمپيوناتىنا 44 ەلدەن 830 سپورتشى قاتىسىپ، ولاردىڭ 69 ى ىرىكتەۋ كەزەڭىنەن ءوتتى. ىرىكتەۋ ۇشۋلارىنىڭ قورىتىندىسى بويىنشا ءاليحان نسانبايەۆ 12 فيناليستىڭ قاتارىنا ەنىپ، بەسىنشى ورىنعا يە بولدى. جاس سپورتشى ورال قالاسىنداعى وبلىستىق تەحنيكالىق شىعارماشىلىق ورتالىعىندا ءبىلىم الادى جانە «ASpan» كومانداسىنىڭ مۇشەسى. ونىڭ جاتتىقتىرۋشىلارى - قايسار ەسەنعالي مەن اندرەي تيشين.

لونگ-بيچ قالاسىندا وتكەن درون-فۋتبولدان حالىقارالىق تۋرنيردە قازاقستان قۇراماسى التى ەلدەن قاتىسقان 16 كوماندانىڭ اراسىندا بەسىنشى ورىن الدى. ەلىمىزدىڭ نامىسىن ورال جانە اتىراۋ قالالارىنان كەلگەن ناۋرىزبەك ەسەتوۆ، الديار باۋىرجان، ءاليحان نسانبايەۆ جانە التاير ابىلعازيەۆ قورعادى.

قۇرامانى جارىسقا قايسار ەسەنعالي، نۇربول قىرىقبايەۆ، ديدار ساحراتوۆ جانە الەكساندر شيمانوۆسكي جاتتىقتىردى.

ءاليحان الەم چەمپيوناتىنا جولدامانى وقۋ-اعارتۋ مينيسترلىگىنىڭ رەسپۋبليكالىق قوسىمشا ءبىلىم بەرۋ وقۋ-ادىستەمەلىك ورتالىعى «ASpandrone» قوعامدىق بىرلەستىگىمەن بىرلەسىپ، «Dronly Ltd.» كومپانياسىنىڭ قولداۋىمەن ۇيىمداستىرعان Kazakhstan Drone Championship Cup رەسپۋبليكالىق ءتۋرنيرىنىڭ قورىتىندىسى بويىنشا جەڭىپ الدى. اتالعان سەرىكتەستەردىڭ قولداۋىمەن درون- فۋتبولدان ۇلتتىق قۇرامانىڭ حالىقارالىق جارىستارعا قاتىسۋى دا قامتاماسىز ەتىلدى.

قازاقستاندا درون سپورتى بويىنشا جارىستار وڭىرلىك، وبلىستىق جانە رەسپۋبليكالىق دەڭگەيلەردە وتكىزىلەدى. بۇل جارىستار دارىندى وقۋشىلاردى انىقتاۋعا، ولاردىڭ ينجەنەرلىك ويلاۋ قابىلەتىن دامىتۋعا، روبوتوتەحنيكا مەن زاماناۋي تەحنولوگيالارعا قىزىعۋشىلىعىن ارتتىرۋعا، سونداي-اق جاس سپورتشىلاردى حالىقارالىق چەمپيوناتتارعا دايىنداۋعا مۇمكىندىك بەرەدى.

ايتا كەتەلىك قازاقستاندىق كوماندالار درون-فۋتبولدان حالىقارالىق ءتۋرنيردىڭ ۇزدىك وندىعىنا ەنگەن ەدى.