قازاقستاندىق جاس روبوتوتەحنيكتەر الەمنىڭ ۇزدىك تورتتىگىنە ەندى
استانا. KAZINFORM - قازاقستان ۇلتتىق قۇراماسى كورەيا رەسپۋبليكاسىنىڭ ينچحون قالاسىندا وتكەن FIRST Global Challenge 2026 حالىقارالىق سپورتتىق روبوتوتەحنيكا چەمپيوناتىندا الەمدىك رەيتينگتىڭ ۇزدىك تورتتىگىنە ەندى.
بايقاۋعا الەمنىڭ 185 ەلىنەن كوماندالار قاتىستى. بۇل تۋرالى وقۋ-اعارتۋ مينيسترلىگى ءمالىم ەتتى.
قازاقستاندىق وقۋشىلار ىرىكتەۋ كەزەڭىندەگى 11 كەزدەسۋدىڭ بارلىعىندا جەڭىسكە جەتىپ، پلەي-وفف كەزەڭىنە جولداما الدى. جارىس قورىتىندىسى بويىنشا ۇلتتىق قۇراما الەمدىك رەيتينگتە ءتورتىنشى ورىنعا يە بولىپ، ينجەنەرلىك دايىندىق پەن كوماندالىق جۇمىستىڭ جوعارى دەڭگەيىن كورسەتتى.
قازاقستان قۇراماسى بۇعان دەيىن ءتورت جىل قاتارىنان FIRST Global Challenge چەمپيوناتىنىڭ جەڭىمپازى اتانعان بولاتىن. بيىلعى ناتيجە دە وتاندىق وقۋشىلاردىڭ حالىقارالىق ارەناداعى باسەكەگە قابىلەتتىلىگىن تاعى ءبىر مارتە دالەلدەدى.
ۇلتتىق قۇراما ساپىندا الماتى قالاسىنداعى م. گاندي اتىنداعى №92 مەكتەپ-ليتسەيىنىڭ 9-11-سىنىپ وقۋشىلارى حۋسەين ماقسۇت، نۇرتاس سەرىك، اسپانديار بەردالي جانە ارنۋر ابدۋللا، سونداي-اق ى. التىنسارين اتىنداعى №159 گيمنازياسىنىڭ وقۋشىسى ەراسىل ەندىباي ونەر كورسەتتى.
ۇلتتىق قۇراما وقۋ-اعارتۋ مينيسترلىگىنىڭ «دارىن» رەسپۋبليكالىق عىلىمي- پراكتيكالىق ورتالىعى مەن USTEM Foundation قوعامدىق قورى بىرلەسىپ ۇيىمداستىرعان ىرىكتەۋ ناتيجەسىندە جاساقتالدى. بۇل جۇمىسقا جاساندى ينتەللەكت جانە سيفرلىق دامۋ مينيسترلىگى، Astana Hub حالىقارالىق يننوۆاتسيالىق كلاستەرى قاتىسىپ، Astana Motors قۇرامىنداعى OMODA JAECOO برەندتەرى قولداۋ كورسەتتى.
