قازاقستاندىق جاس روبوتوتەحنيكتەر الەمنىڭ ۇزدىك تورتتىگىنە ەندى

كورەيا رەسپۋبليكاسىنىڭ ينچحون قالاسىندا وتكەن FIRST Global Challenge 2026 حالىقارالىق روبوتوتەحنيكا چەمپيوناتىندا ۇلتتىق قۇراما ىرىكتەۋ كەزەڭىندەگى 11 كەزدەسۋدىڭ بارلىعىندا جەڭىسكە جەتتى. وسىلايشا، قورىتىندى رەيتينگتە ءتورتىنشى ورىنعا تۇراقتادى.

قازاقستان قۇراماسى بۇعان دەيىن ءتورت جىل قاتارىنان چەمپيون اتانعان. بيىلعى ناتيجە دە وتاندىق جاس ينجەنەرلەردىڭ حالىقارالىق دەڭگەيدە باسەكەگە قابىلەتتى ەكەنىن بايقاتتى.

ۇلتتىق قۇراما ساپىندا الماتىداعى ماحاتما گاندي اتىنداعى 92-مەكتەپ-ليتسەيىنىڭ وقۋشىلارى حۋسەين ماقسۇت پەن ارنۇر ابدۋللا دا ونەر كورسەتتى.

بۇگىن وقۋشىلار، روبوتوتەحنيكادان جوبا جەتەكشىسى نۇرسۇلتان ەرگەشپەن بىرگە Jibek Joly تەلەارناسىنىڭ «بۇگىن. LIVE» باعدارلاماسىندا تىكەلەي بايلانىسقا شىعىپ، سۇقبات بەردى.

ۇلتتىق قۇراما الەمدىك كەزەڭگە جولداما الۋ ءۇشىن الدىمەن ورتالىق ازياداعى ىرىكتەۋ كەزەڭىنە قاتىسىپ، 40 كوماندانىڭ اراسىنان ۇزدىك شىققان.

- FIRST چەمپيوناتىنىڭ باعىتتارى كوپ. ءبىز سولاردىڭ ىشىندەگى ەڭ كۇردەلى جارىستاردىڭ ءبىرى - Global Challenge سايىسىنا قاتىستىق. الەمدىك دەڭگەيدەگى جارىسقا جولداما الۋ ءۇشىن الدىمەن ورتالىق ازيا ىرىكتەۋىنەن وتتىك. وعان ەلىمىزدەن 40 كوماندا قاتىستى. جارىستا ءبىرىنشى ورىن العان كوماندا عانا الەمدىك كەزەڭگە جولداما الادى. ءبىز ىرىكتەۋدە جەڭىسكە جەتىپ، جولداما الدىق. ودان كەيىن ينچحون قالاسىندا وتكەن جارىستا ونەر كورسەتتىك، - دەدى جوبا جەتەكشىسى.

بۇل چەمپيوناتتىڭ ەرەكشەلىگى - روبوتتى تەك ۇيىمداستىرۋشىلار ۇسىنعان قۇرالدار مەن بولشەكتەردى پايدالانىپ قۇراستىرۋ قاجەت ەكەن. قوسىمشا بولشەكتەردى قولدانۋعا رۇقسات جوق.

- ءبىز 11 كەزدەسۋدىڭ بارىندە دە جاقسى ناتيجە كورسەتتىك. دەگەنمەن جارىس وڭاي بولعان جوق. ماتچتار ءار ساعات سايىن ءوتىپ وتىردى. ونىڭ ۇستىنە، ويىن باستالعانعا دەيىن قارسىلاسىمىزدىڭ قاي كوماندا بولاتىنىن بىلمەيمىز. قارسىلاستار كەزدەيسوق انىقتالادى. ءبىر-بىرىمىزگە قولداۋ كورسەتىپ، ءار كەزەڭنەن وتتىك. بۇل ءبىز ءۇشىن ەڭ قيىن جارىستاردىڭ ءبىرى بولدى، - دەدى كوماندا جەتەكشىسى نۇرسۇلتان ەرگەش.

روبوتتىڭ باستى ارتىقشىلىعى - دوپتى تەز جيناۋ مۇمكىندىگى

كوماندا مۇشەسى ارنۇردىڭ ايتۋىنشا، ولار قۇراستىرعان روبوت دوپتاردى جيناپ، بەلگىلەنگەن باعىتقا لاقتىرادى. سونىمەن قاتار ارنايى مەحانيزمنىڭ كومەگىمەن روبوت 30 سەكۋند ىشىندە جوعارى كوتەرىلەدى.

- روبوتتا ارنايى climb مەحانيزمى بار. بۇل مەحانيزم حەمپ ارقىلى كوتەرىلۋگە مۇمكىندىك بەرەدى، - دەدى ول.

ال حۋسەين ماقسۇت جارىستىڭ قىزىقتى بولعانىن، سونىمەن قاتار تىڭعىلىقتى دايىندىق پەن كوماندالىق ۇيلەسىمدىلىكتى قاجەت ەتكەنىن ايتتى.

- جارىس ماعان ۇنادى، ءبىراق قيىن بولدى. كەيبىر قارسىلاستارىمىزدىڭ دايىندىعى وسال بولدى. ءبىز ءوزىمىزدى بارلىق جاعىنان جاقسى كورسەتە الدىق، - دەدى حۋسەين.

ونىڭ ايتۋىنشا، وزگە كوماندالاردىڭ روبوتتارى دا تىڭ ينجەنەرلىك شەشىمدەرىمەن ەرەكشەلەنگەن. ال ۇلتتىق قۇراما دوپتى كوپ جيناپ، لاقتىرۋعا مۇمكىندىك بەرەتىن مەحانيزمگە باسىمدىق بەرگەن.

- قارسىلاستارىمىزدىڭ اراسىندا وزبەكستان كومانداسىنىڭ روبوتى دا مىقتى بولدى. ول شاعىن ءارى جىلدام ەدى. ءال بىزدىڭ روبوت ۇلكەندەۋ بولدى. جالپى، روبوتتى ىقشام ەتىپ قۇراستىرعان دۇرىس ەكەنىن تۇسىندىك. سوندا ول جىلدامىراق جۇمىس ىستەيدى، - دەدى حۋسەين.

كوماندالىق جۇمىس - جەتىستىكتىڭ نەگىزى

كوماندا جەتەكشىسىنىڭ پىكىرىنشە، روبوتوتەحنيكا جارىستارىندا مىندەتتەردى دۇرىس ءبولۋ دە ماڭىزدى.

- بەس وقۋشىدان قۇرالعان كوماندادا ءار قاتىسۋشىنىڭ ءوز جاۋاپكەرشىلىگى بار. ەكى وقۋشى روبوتتى باسقارسا، بىرەۋى باعدارلامالىق كود جازادى، ال قالعان ەكەۋى روبوتتى قۇراستىرادى. ماسەلەن، ارنۇر روبوتتىڭ ينجەنەرلىك مەحانيزمدەرىن ازىرلەپ، ونى قۇراستىرۋمەن اينالىسادى. ال حۋسەين ينجەنەرلىك قۇجاتتامانى دايىندايدى. وسىلايشا، كوماندا مۇشەلەرى ءوزارا تاجىريبە الماسىپ، ورتاق ناتيجەگە جۇمىس ىستەيدى، - دەيدى ول.

ونىڭ ايتۋىنشا، ەلىمىزدە روبوتوتەحنيكا سالاسى قارقىندى دامىپ كەلەدى. بۇل باعىتتاعى باسەكەلەستىك تە جوعارى.

سوندىقتان حالىقارالىق جارىستارعا قاتىسۋ وقۋشىلارعا ءوز مۇمكىندىكتەرىن سىناپ قانا قويماي، وزگە كوماندالاردىڭ ينجەنەرلىك شەشىمدەرىن زەردەلەۋگە مۇمكىندىك بەرەدى.

ايتا كەتەيىك، جاقىندا قازاقستاندىق وقۋشىلار بەيجىڭدەگى روبوتوتەحنيكا چەمپيوناتىندا كۇمىس جۇلدە جەڭىپ الدى.