قازاقستاندىق شاحماتشىلار توقايەۆتان مەملەكەتتىك قولداۋدى كۇشەيتۋدى سۇرادى
استانا. KAZINFORM - قازاقستاندىق شاحماتشى الۋا نۇرمان ايەلدەر قۇراماسىنىڭ مۇشەلەرى پرەزيدەنت قاسىم-جومارت توقايەۆقا شاحماتتى مەملەكەتتىك قارجىلاندىرۋ ءتاسىلىن قايتا قاراۋ تۋرالى وتىنىشپەن جۇگىنگەنىن مالىمدەدى.
سپورتشىنىڭ ايتۋىنشا، بۇل باستاما ەلدەگى شاحماتتىڭ دامۋىنا سەرپىن بەرىپ، جاس تالانتتاردىڭ مۇمكىندىگىن كەڭەيتۋگە جانە باپكەرلەردىڭ ەڭبەگىن باعالاۋعا باعىتتالعان.
الۋا نۇرمان بۇل تۋرالى الەۋمەتتىك جەلىدەگى پاراقشاسىندا جازدى. ول الدىمەن سامارقاندتا وتكەن دۇنيەجۇزىلىك شاحمات وليمپياداسىندا كۇمىس مەدال جەڭىپ العانى ءۇشىن بەرىلگەن سىياقىعا قولداۋ كورسەتكەن كاسىپكەر تيمۋر تۋرلوۆ پەن قازاقستان شاحمات فەدەراتسياسىنا العىس ءبىلدىردى.
«ءبىز ءۇشىن بۇل جاي عانا ماراپات ەمەس، سونىمەن قاتار كوپ جىلعى ەڭبەكتىڭ، دايىندىقتىڭ جانە قازاقستاندى الەمدىك ارەنادا لايىقتى دەڭگەيدە تانىستىرۋعا دەگەن ۇمتىلىستىڭ مويىنداۋى. بىزگە سەنگەنىڭىز ءۇشىن راقمەت!»، - دەپ جازدى شاحماتشى.
سونىمەن قاتار ول ۇلتتىق قۇرامانىڭ جەتىستىكتەرى تەك مەدالدارمەن ولشەنبەۋگە ءتيىس ەكەنىن اتاپ ءوتتى. سپورتشىنىڭ پىكىرىنشە، حالىقارالىق جارىستارداعى ناتيجەلەر وتاندىق شاحماتتىڭ دامۋىنا جاڭا مۇمكىندىكتەر اشۋعا نەگىز بولۋى كەرەك.
مەملەكەتتىك قولداۋدى كۇشەيتۋ ۇسىنىلدى
الۋا نۇرمان قازاقستان شاحمات فەدەراتسياسى مەن حالىقارالىق شاحمات فەدەراتسياسىنىڭ (FIDE) دەرەكتەرىنە سۇيەنە وتىرىپ، 2023-2025-جىلدارى قازاقستاندىق شاحماتشىلار رەسمي حالىقارالىق جارىستاردا 448 مەدال جەڭىپ العانىن جازدى.
بۇل جەتىستىكتەردىڭ قاتارىندا الەمدىك كوماندالىق چەمپيوناتتاعى كۇمىس جۇلدە، ايەلدەر قۇراماسىنىڭ دۇنيەجۇزىلىك شاحمات وليمپيادالارىندا يەلەنگەن ەكى كۇمىس مەدالى، سونداي-اق الەم چەمپيوناتتارى مەن وزگە دە بەدەلدى حالىقارالىق جارىستارداعى جەكە ناتيجەلەر بار.
«سپورتشىلارىمىزدىڭ جەتىستىكتەرى مەن شاحماتتىڭ حالىقارالىق مارتەبەسىن ەسكەرە وتىرىپ، ءبىز پرەزيدەنتكە جۇگىنىپ، شاحماتتى مەملەكەتتىك قارجىلاندىرۋ ءتاسىلىن قايتا قاراۋدى جانە وعان وليمپيادالىق سپورت تۇرلەرىمەن سالىستىرۋعا بولاتىن دەڭگەيدە قولداۋ كورسەتۋدى سۇرادىق»، - دەپ جازدى الۋا نۇرمان.
ونىڭ سوزىنشە، مۇنداي قولداۋ بالالار مەن جاسوسپىرىمدەر شاحماتىن دامىتۋعا، ۇلتتىق قۇرامالارعا جانە جاتتىقتىرۋشىلارعا قاجەتتى جاعداي جاساۋعا مۇمكىندىك بەرەدى.
«ويتكەنى شاحمات - جاي عانا سپورت ەمەس. بۇل - قازاقستاننىڭ زياتكەرلىك بولاشاعىنا سالىنعان ينۆەستيتسيا»، - دەپ اتاپ ءوتتى سپورتشى.
جەكە باپكەرلەردىڭ ەڭبەگى دە نازاردان تىس قالماۋى كەرەك
الۋا نۇرمان حالىقارالىق ارەناداعى جەتىستىكتەردىڭ ارتىندا جەكە باپكەرلەردىڭ دە وراسان زور ەڭبەگى تۇرعانىن ايتتى. ونىڭ پىكىرىنشە، سپورتشىنىڭ قالىپتاسۋىنا العاشقى كۇننەن باستاپ سەنىم ءبىلدىرىپ، ءبىلىمى مەن ۋاقىتىن ارناعان مامانداردىڭ ۇلەسى ەرەكشە.
«ءبىز تۇعىرعا كوتەرىلىپ، قازاقستان ءانۇرانىن تىڭداپ تۇرعاندا، حالىق تەك ناتيجەنى كورەدى. ءبىراق ونىڭ ارتىندا بۇكىل كوماندانىڭ ەڭبەگى، جىلدار بويى جاسالعان جاتتىعۋلار، كەشكى ۋاقىتقا دەيىن سوزىلعان ويىندار، قاتەلىكتەر مەن جەڭىلىستەردى تالداۋ جانە شەبەرلىكتى شىڭداۋعا باعىتتالعان مىڭداعان تالپىنىس جاتىر. وسىعان ۇلەس قوسقان ءاربىر ادام قۇرمەتكە لايىق»، - دەپ جازدى ول.
شاحماتشىنىڭ ايتۋىنشا، بۇگىنگى جەتىستىكتەر وتاندىق شاحماتتىڭ دامۋىنا ىقپال ەتىپ، جەكە باپكەرلەردىڭ ەڭبەگىن لايىقتى باعالاۋعا جانە جاس تالانتتاردىڭ قابىلەتىن اشۋعا جول اشۋى كەرەك.
«مۇمكىن، ەڭ ۇلكەن جەڭىس - تەك بۇگىن العان مەدالدارىمىز عانا ەمەس، بىزدەن كەيىن كەلەتىندەرگە اشىپ بەرەتىن جولىمىز بولسىن»، - دەپ تۇيىندەدى الۋا نۇرمان.
