قازاقستاندىق عالىمدار جۋسان توزاڭىنا قارسى اللەرگياعا ارنالعان پرەپاراتتى زەرتتەپ جاتىر

قازاقستانداعى ماۋسىمدىق اللەرگيانىڭ ەڭ كەڭ تارالعان تۇرلەرىنىڭ ءبىرى - جۋسان توزاڭىنا اللەرگيا. وتاندىق كلينيكالىق-دياگنوستيكالىق زەرتحانالاردىڭ مالىمەتىنشە، جۋسان توزاڭىنا سەزىمتالدىق بارلىق توزاڭ اللەرگەنى ىشىندە ءبىرىنشى ورىندا تۇر، ياعني %30. اسىرەسە الماتى قالاسى ءۇشىن وزەكتى. سەبەبى مۇندا جۋساننىڭ گۇلدەۋ كەزەڭى شىلدەدەن قاراشاعا دەيىن جالعاسادى. وسى ۋاقىتتا مىڭداعان ادام مۇرىننىڭ بىتەلۋى، تۇشكىرۋ، كوزدەن جاس اعۋ جانە ءومىر ساپاسىنىڭ تومەندەۋى جاعدايلارىنا تاپ بولادى.

قولدانىستاعى ەمدەۋ تاسىلدەرى نەگىزىنەن اۋرۋ بەلگىلەرىن ۋاقىتشا جەڭىلدەتۋگە باعىتتالعان، دەرتتىڭ نەگىزگى سەبەبىن تولىق جويمايدى. ال ءداستۇرلى اللەرگەن- سپەتسيفيكالىق يممۋنوتەراپيا بىرنەشە جىل بويى ۇزاق ەم قابىلداۋدى ءارى پرەپاراتتاردى بىرنەشە مارتە ەنگىزۋدى تالاپ ەتەدى.

قازاقستاننىڭ دەنساۋلىق ساقتاۋ مينيسترلىگى عىلىمي-تەحنيكالىق باعدارلاماسى اياسىندا عالىمدار PollenVax اتتى جاڭا وتاندىق پرەپاراتتى ازىرلەدى. پرەپارات OtarBioPharm بازاسىندا حالىقارالىق GMP ستاندارتىنا سايكەس ءوندىرىلىپ جاتىر.

بۇل جۋسان توزاڭى اللەرگەنىنىڭ رەكومبينانتتى اقۋىزى نەگىزىندە جاسالعان. ونىڭ باستى ەرەكشەلىگى - ەمدەۋ كۋرسىنىڭ ەداۋىر قىسقارتىلۋى. تەراپيا اپتاسىنا ءبىر رەت جاسالاتىن ءتورت تەرىاستى ينەكتسياسىنان تۇرادى.

بۇعان دەيىن 30 ەرىكتىنىڭ قاتىسۋىمەن كلينيكالىق زەرتتەۋدىڭ I كەزەڭى ءساتتى اياقتالدى. زەرتتەۋ ناتيجەسىندە پرەپاراتتىڭ قاۋىپسىزدىگى دالەلدەنىپ، ادام اعزاسىنا جاقسى قابىلداناتىنى انىقتالدى. سونداي-اق اللەرگەندى بەيتاراپتاندىراتىن انتيدەنەلەردىڭ ءتۇزىلۋى جانە تەرىلىك پريك- تەست ناتيجەلەرى بويىنشا اللەرگەنگە سەزىمتالدىقتىڭ تومەندەۋى سەكىلدى وڭ يممۋنولوگيالىق كورسەتكىشتەر تىركەلدى.

قازىرگى تاڭدا II كەزەڭدەگى كلينيكالىق زەرتتەۋدى وتكىزۋگە رەسمي رۇقسات بەرىلدى.

اتالعان زەرتتەۋ - جۋسان توزاڭىنان تۋىنداعان اللەرگيالىق رينيتى راستالعان، جاسى 18 بەن 65 جاس ارالىعىنداعى 138 پاتسيەنتتىڭ قاتىسۋىمەن جۇرگىزىلەتىن راندوميزاتسيالانعان، قوس سوقىر، پلاتسەبو-باقىلاناتىن كلينيكالىق سىناق.

زەرتتەۋگە قاتىسۋ مەرزىمى 180 كۇنگە دەيىن سوزىلادى.

بۇل جوبانىڭ جۇزەگە اسىرىلۋى وتاندىق بيوفارماتسيەۆتيكانىڭ دامۋىنا سەرپىن بەرەتىن ماڭىزدى قادام سانالادى. سونىمەن قاتار دەنساۋلىق ساقتاۋ سالاسىنداعى وزەكتى ماسەلەلەردى شەشۋگە باعىتتالعان زاماناۋي يننوۆاتسيالىق پرەپاراتتاردى ازىرلەۋدەگى قازاقستاندىق عىلىمنىڭ الەۋەتىن ايقىن كورسەتەدى.

الماتىلىقتار اراسىنداعى اللەرگيانىڭ نەگىزگى سەبەبى اتالعانىن جازعان ەدىك.