قازاقستاندىق بالمۇزداقتى قاي ەلدەر تالاسا الىپ جاتىر

ەكسپورت 50 ەسە وسكەن

QazTrade ساۋدا ساياساتىن دامىتۋ ورتالىعى ا ق مالىمەتىنشە، كەيىنگى توعىز جىلدا وتاندىق بالمۇزداق ەكسپورتى 50 ەسە وسكەن. 2017-جىلعى قاڭتار-تامىز ايلارىندا قازاقستان شەتەلگە 1,2 ميلليون دوللاردىڭ ءونىمىن ەكسپورتتاسا، 2026-جىلعى كەزەڭدە بۇل كورسەتكىش 59,5 ميلليون دوللارعا جەتكەن.

بيىل العاشقى سەگىز ايدا قازاقستان شەتەلگە 15,3 مىڭ توننا بالمۇزداق ەكسپورتتاعان.

قازاقستان بالمۇزداعىن كىمدەر ساتىپ الىپ جاتىر؟

مالىمەت بويىنشا قازاقستاندىق بالمۇزداقتىڭ نەگىزگى ساتىپ الۋشىسى - رەسەي. سەگىز ايدا بۇل ەلگە 10,7 مىڭ توننا ءونىم جەتكىزىلگەن. ونىڭ قۇنى 41,6 ميلليون دوللار بولعان. وتاندىق بالمۇزداق ەكسپورتىنىڭ 70 پايىزعا جۋىعى رەسەي نارىعىنا تيەسىلى.

ەكىنشى ورىندا قىرعىزستان تۇر. بۇل ەلگە 3,4 مىڭ توننا بالمۇزداق ەكسپورتتالعان، ال قۇنى 11,6 ميلليون دوللارعا جەتكەن. ءىرى ساتىپ الۋشىلاردىڭ ۇشتىگىنە وزبەكستان دا كىرەدى. بۇل ەلگە 5,1 ميلليون دوللارعا 965 توننا ءونىم جەتكىزىلگەن.

بۇدان بولەك، تاجىكستانعا جەتكىزىلگەن ءونىم كولەمى 3,2 ەسەگە، ازەربايجانعا جەتكىزىلگەن ءونىم كولەمى 2,1 ەسەگە وسكەن. سونىمەن قاتار، بيىل قازاقستاندىق بالمۇزداق گرۋزيا نارىعىنا دا شىعا باستاعان.