قازاقستاندىق اۆتور حالىقارالىق AI كينو بايقاۋىندا جەڭىمپاز اتاندى
استانا. KAZINFORM - قازاقستاندىق اۆتور مىرزاحان جۇماحان Astana AI Film Festival فەستيۆالىندە «ۇزدىك كەيىپكەر» نوميناتسياسىندا جەڭىسكە جەتتى. حالىقارالىق قازىلار القاسى ونىڭ «It Was Just a Joke» («بۇل جاي عانا ءازىل ەدى») كومەدياسىن جوعارى باعالادى.
فيلمدە قاراپايىم ءازىل كۇتپەگەن جەردەن شىنايى تەكەتىرەسكە ۇلاسادى.
جەڭىمپازدار 3-قازاندا استانادا جاريالاندى. بايقاۋعا 125 ەلدەن 8067 ءوتىنىم ءتۇسىپ، فينالدىق باعدارلاماعا 25 جۇمىس ءوتتى. ولاردىڭ قاتارىندا جاساندى ينتەللەكت كومەگىمەن تۇسىرىلگەن جۇماحاننىڭ فيلمى دە بار.
فيلمنىڭ باستى كەيىپكەرلەرى - ءيت جانە ونىڭ يەسىنىڭ اعاسى. وقيعا قاراپايىم ازىلدەن باستالادى. الايدا جانجال بىرتىندەپ ءورشىپ، ناعىز سوعىسقا اينالادى.
- مەنىڭ فيلمىم - كومەديالىق جانردا. فيلمدە يت پەن ونىڭ يەسىنىڭ اعاسى قاراپايىم ءازىل ءۇشىن توبەلەسە باستايدى. سوڭىندا بۇل ناعىز جانجالعا اينالادى، - دەدى مىرزاحان جۇماحان.
اۆتوردىڭ ايتۋىنشا، ول جەڭىل كومەديا تۇسىرگىسى كەلگەن. وقيعا ونىڭ مىنەزى مەن ءازىل-قالجىڭ جاساعاندى ۇناتاتىنىن دا كورسەتەدى.
فيلم قازاقستاندىق اۆتورعا Best Character - «ۇزدىك كەيىپكەر» جۇلدەسىن اكەلدى. فەستيۆالدە بارلىعى بەس ارنايى نوميناتسيا بويىنشا جەڭىمپازدار انىقتالدى. ولار: كەيىپكەر، وقيعا، ۆيزۋالدى ءتىل، رەجيسسۋرا جانە تۇجىرىمداما. بۇل باعدارلاماداعى باسقا جۇلدەلەردى قىتاي، يتاليا جانە ا ق ش اۆتورلارى الدى.
فيلمىنىڭ كومەديالىق جانردا بولعانىنا قاراماستان، جۇماحان باسەكەلەستىككە بايلانىستى قاتتى الاڭداعان. فينالعا جاساندى ينتەللەكتىنى قولدانۋدا ءتۇرلى يدەياسى، ستيلى مەن ءتاسىلى بار اۆتورلار جينالدى.
- شىنىمدى ايتسام، باسەكەلەستىككە بايلانىستى قاتتى قوبالجىدىم. ويتكەنى مۇندا تالانتتى ءارى مىقتى جىگىتتەر وتە كوپ. بارلىق قاتىسۋشى ءوز فيلمىنە كوپ ەڭبەك ءسىڭىرىپ، كوپ ۋاقىت جۇمسادى. سوندىقتان مەنىڭ ويىمشا، ولاردىڭ ءارقايسىسى لايىقتى قارسىلاس بولدى، - دەدى جۇماحان.
بايقاۋعا قاتىسۋشىلاردىڭ جۇمىستارىن حالىقارالىق مادەنيەت، كينويندۋستريا جانە تەحنولوگيالىق بيزنەس وكىلدەرىنەن قۇرالعان قازىلار القاسى باعالادى.
قازىلار القاسىنىڭ قۇرامىندا:
ودري ازۋلە - يۋنەسكو-نىڭ بۇرىنعى باس ديرەكتورى جانە فرانسيانىڭ بۇرىنعى مادەنيەت ءمينيسترى؛
ما پين - China Film Group جاساندى ينتەللەكت زەرتتەۋلەرى ينستيتۋتىنىڭ دەكانى؛
ۋاڭ حاۋ - بەيجىڭ كينواكادەمياسى انيماتسيا فاكۋلتەتى دەكانىنىڭ ورىنباسارى؛
بالادجي سرينيۆاسان - كاسىپكەر جانە ينۆەستور؛
لي لونگ - BytePlus كومپانياسىنىڭ تاياۋ شىعىس، افريكا، ءۇندىستان، تۇركيا جانە ت م د ەلدەرى بويىنشا باس مەنەدجەرى بولدى.
وسىلايشا، جۇماحاننىڭ كومەدياسىن مادەني ساياسات، كينو ءبىلىمى، جاساندى ينتەللەكت جانە ينۆەستيتسيا سالالارىندا تاجىريبەسى بار قازىلار القاسى جوعارى باعالادى.
فەستيۆال ۇيىمداستىرۋشىلارى AI كينو ءۇشىن ەڭ ماڭىزدىسى - اۆتورلاردىڭ جاڭا قۇرالداردىڭ كومەگىمەن جۇزەگە اسىراتىن يدەيالارى ەكەنىن اتاپ ءوتتى.
- بۇگىندە AI كينوداعى ەڭ قىزىقتى نارسە - تەحنولوگيانىڭ ءوزى ەمەس، اۆتورلاردىڭ ونىڭ كومەگىمەن جاساي باستاعان دۇنيەسى. فەستيۆال اياسىندا ءبىز ەرەكشە ۆيزۋالدى شەشىمدەردەن باستاپ، وقيعا ايتۋدىڭ جاڭا تاسىلدەرىنە دەيىنگى وتە مىقتى ءارى ءبىر-بىرىنە ۇقسامايتىن جۇمىستاردى كوردىك، - دەدى فەستيۆالدىڭ تەڭ قۇرىلتايشىسى ءارى AAIFF كرەاتيۆتى ديرەكتورى ايزات قۇسايىنوۆ.
العاشقى Astana AI Film Festival فەستيۆالى 1- 3-قازان ارالىعىندا AI Month اياسىندا ءوتتى.
بايقاۋ باعدارلاماسىنان بولەك، فەستيۆالدە اۆتورلار مەن كرەاتيۆتى يندۋستريا وكىلدەرىنىڭ قاتىسۋىمەن ىسكەرلىك كەزدەسۋلەر مەن پانەلدىك پىكىرتالاستار ۇيىمداستىرىلدى. فيناليستەردىڭ جۇمىستارى 2 جانە 3-قازاندا MEGA Silk Way ساۋدا ويىن-ساۋىق ورتالىعىنداعى Chaplin كينوتەاترىندا ۇلكەن ەكراندا كورسەتىلدى.
فەستيۆالدىڭ جالپى جۇلدە قورى $2 ميلليون بولدى. ونىڭ $1 ميلليونى جەڭىمپازداردى ماراپاتتاۋعا ءبولىندى. تاعى $1 ميلليون پەرسپەكتيۆالى AI كوماندالارىنا ينۆەستيتسيا سالۋعا جانە قازاقستاندا ءوندىرىستى دامىتۋعا قاراستىرىلعان.
مىرزاحان جۇماحاننىڭ جەڭىسى قازاقستاندىق اۆتورلاردىڭ حالىقارالىق بايقاۋعا قاتىسۋىنىڭ ناتيجەلەرىنىڭ ءبىرى بولدى. جەڭىل كومەديا رەتىندە ويلاستىرىلعان ونىڭ فيلمى مىڭداعان ءوتىنىمنىڭ اراسىنان ىرىكتەلىپ، اۆتورىنا «ۇزدىك كەيىپكەر» جۇلدەسىن اكەلدى.
مەملەكەت باسشىسى Astana AI Film Festival جاساندى ينتەللەكت قولدانعان فيلمدەردىڭ ءبىرىنشى حالىقارالىق بايقاۋىندا ءسوز سويلەپ، اتالعان فەستيۆالدىڭ ەرەكشەلىگىن اتاپ ءوتتى.
