قازاقستاننىڭ سولتۇستىگىندە ءۇشىنشى ا ە س سالىنۋى مۇمكىن

ەلدىڭ شىعىس جانە باتىس وڭىرلەرىمەن قاتار، سولتۇستىك بولىگى دە قاراستىرىلىپ جاتىر، دەپ حابارلايدى Kazinform اگەنتتىگىنىڭ ءتىلشىسى.

اگەنتتىك باسشىسى اتاپ وتكەندەي، اتوم سالاسىن 2050-جىلعا دەيىن دامىتۋ ستراتەگياسىنا سايكەس، قازاقستاندا كەمىندە ءۇش اتوم ەلەكتر ستانسياسىن سالۋ جوسپارلانعان. ونىڭ سوزىنشە، الماتى وبلىسىنىڭ جامبىل اۋدانى اتوم ەلەكتر ستانسيالارىن ورنالاستىرۋعا قولايلى اۋماقتاردىڭ ءبىرى سانالادى. مۇنى گەولوگيالىق، گيدرولوگيالىق جانە باسقا دا زەرتتەۋلەردىڭ ناتيجەسى راستاپ وتىر.

ال ءۇشىنشى اتوم ەلەكتر ستانتسياسىنىڭ ناقتى قاي جەردە سالىناتىنى ازىرگە بەلگىسىز.

- قازاقستاندا ءۇشىنشى اتوم ەلەكتر ستانسياسىن سالۋعا بولاتىن بىرنەشە اۋماق قاراستىرىلىپ جاتىر. ازىرگە ناقتى شەشىم قابىلدانعان جوق. دەگەنمەن ەلىمىزدە ورتاشا قۋاتتى رەاكتورلاردى ورنالاستىرۋ الەۋەتى بار. ولار تۇتىنۋشىلاردى ەلەكتر ەنەرگياسىمەن قاتار، جىلۋمەن دە قامتاماسىز ەتە الادى. كەيبىر جاعدايدا سۋدى تۇشىتۋعا دا مۇمكىندىك بەرەدى، - دەدى الماسادام ساتقاليەۆ انتاليادا وتكەن «الەمدىك اتوم كۇندەرى-2026» فورۋمىندا جۋرناليستەرگە بەرگەن سۇحباتىندا.

ونىڭ ايتۋىنشا، ستانتسيا سالىناتىن ورىندى تاڭداعاندا ەلەكتر ەنەرگياسىن تۇتىنۋ كولەمىنىڭ بولاشاقتاعى ءوسىمى مەن اتوم تەحنولوگيالارىن كەشەندى قولدانۋ مۇمكىندىگى ەسكەرىلمەك.

- شىعىس قازاقستانداعى كۋرچاتوۆ قالاسىنىڭ اۋماعىن زەرتتەپ جاتىرمىز. كاسپي تەڭىزىنىڭ جاعالاۋىنداعى باتىس قازاقستان اۋماعى دا ءبىرقاتار فاكتوردى ەسكەرگەندە، ستانسيا سالۋعا قولايلى. بۇدان بولەك، KEGOC جۇيەلىك وپەراتورىنىڭ ۇسىنىسىمەن سولتۇستىك قازاقستانداعى توبىل وزەنى ماڭىنداعى اۋماق تا نازارعا الىندى. بۇل رەتتە ستانسيانى سالقىنداتۋعا قاجەتتى سۋ قورىنىڭ جەتكىلىكتى بولۋى ەسكەرىلىپ وتىر. جالپى، اتالعان اۋماقتاردىڭ بارلىعىنىڭ اتوم ەنەرگەتيكاسىن دامىتۋعا الەۋەتى زور. ولاردىڭ ءارقايسىسى قازاقستاندا اتوم ەنەرگەتيكاسىن دامىتۋدىڭ كەلەسى كەزەڭدەرىندە جان-جاقتى زەرتتەلەدى، - دەدى اگەنتتىك باسشىسى.

بۇعان دەيىن الماسادام ساتقالييەۆ قازاقستاندا ءۇشىنشى اتوم ەلەكتر ستانسياسىن سالۋعا قولايلى اۋماقتاردى اتاعان بولاتىن. سول كەزدە ستانتسيا قۇرىلىسى ءۇشىن ەلدىڭ شىعىس جانە باتىس وڭىرلەرى قاراستىرىلىپ جاتقانى ايتىلعان ەدى. ەندى بۇل تىزىمگە قازاقستاننىڭ سولتۇستىك ءوڭىرى دە قوسىلدى.

ەسكە سالا كەتەيىك، بۇعان دەيىن قازاقستاندا سالىناتىن العاشقى ەكى اتوم ەلەكتر ستانسياسىنىڭ قۇرىلىسىنا رەسەي مەن قىتاي كومپانيالارى قاتىساتىنىن جازعان ەدىك.