قازاقستاننىڭ شاحماتشى قىزدارىنا 100 ميلليون تەڭگە سىياقى بەرىلەدى

قازاقستان قۇراماسى ساپىندا كۇمىس مەدال جەڭىپ العان ءبيبىسارا اساۋبايەۆا، الۋا نۇرمان، مەرۋەرت قاماليدەنوۆا، ەلناز قالياحمەت جانە زارينا نۇرعاليەۆانىڭ ءارقايسىسى 20 ميلليون تەڭگەدەن سىياقى الادى.

فەدەراتسيا قۇرامانىڭ باپكەرلەرىن دە ماراپاتتايدى. كوماندا كاپيتانى ءارى باس باپكەر پاۆەل كوتسۋر مەن باپكەر الەكساندر مويسەەنكوعا 20 ميلليون تەڭگەدەن، ال ارىستانبەك ورازايەۆقا 5 ميلليون تەڭگە بەرىلەدى.

وسىلايشا، شاحماتشىلار مەن باپكەرلەرگە تولەنەتىن سىياقىنىڭ جالپى كولەمى 145 ميلليون تەڭگەنى قۇرايدى.

ايتا كەتەيىك، قازاقستان ايەلدەر قۇراماسى 2024-جىلعى دۇنيەجۇزىلىك شاحمات وليمپياداسىندا دا ەكىنشى ورىن يەلەنگەن. سول كەزدە دە ءار شاحماتشىعا 20 ميلليون تەڭگەدەن سىياقى بەرىلگەن.

قازان ايىنىڭ باسىندا سامارقاندتان ورالعان الۋا نۇرمان دۇنيەجۇزىلىك شاحمات وليمپياداسىنداعى ناتيجە ءۇشىن مەملەكەتتىك سىياقى قاراستىرىلماعانىن ايتىپ، ماسەلە كوتەرگەن بولاتىن.

شاحماتشىنىڭ سوزىنشە، الماتىداعى سپورت مەكەمەلەرىنىڭ قىزمەتكەرلەرى وعان بۇل جارىس ءتيىستى تولەمدەرگە قۇقىق بەرەتىن جارىستار تىزىمىنە كىرمەيتىنىن تۇسىندىرگەن. سونداي-اق وليمپياداداعى ناتيجە اي سايىنعى تولەم تاعايىنداۋعا نەگىز بولمايتىنى ايتىلعان.

وسىعان بايلانىستى الۋا نۇرمان الەمدىك شاحماتتاعى باستى كوماندالىق جارىستاردىڭ ءبىرىن ءتيىستى تىزىمگە ەنگىزۋ ماسەلەسىن كوتەردى.