قازاقستاننىڭ ءۇش ۋنيۆەرسيتەتى ازياداعى ۇزدىك جۇزدىككە كىردى

قازاقستان ورتالىق ازيا ەلدەرى اراسىندا كوشباسشىلىق ورنىن ساقتاپ، ءۇش ۋنيۆەرسيتەتى رەيتينگتىڭ العاشقى جۇزدىگىنە ەنگەن وڭىردەگى جالعىز مەملەكەت اتاندى. بيىلعى رەيتينگكە ەلىمىزدىڭ 51 جوعارى وقۋ ورنى ەنگىزىلدى. بۇل وتكەن جىلمەن سالىستىرعاندا جەتى ۋنيۆەرسيتەتكە ارتىق.

QS Asia University Rankings 2027 رەيتينگىنە ازيانىڭ 26 ەلى مەن اۋماعىنان 1722 ۋنيۆەرسيتەت ەندى. رەيتينگكە ەنگىزىلگەن جوعارى وقۋ ورىندارىنىڭ سانى بويىنشا قازاقستان ازيادا 10-ورىنعا تۇراقتادى. سوڭعى ءۇش جىلدا رەيتينگكە قاتىسقان قازاقستاندىق ۋنيۆەرسيتەتتەردىڭ سانى 34 تەن 51 گە دەيىن ارتتى. ونىڭ ىشىندە جەتى جوعارى وقۋ ورنى رەيتينگكە العاش رەت ەندى.

ازيانىڭ ۇزدىك 100 ۋنيۆەرسيتەتىنىڭ قاتارىنا قازاقستاننىڭ ءۇش جوعارى وقۋ ورنى كىردى:

ءال-فارابي اتىنداعى قازاق ۇلتتىق ۋنيۆەرسيتەتى - 46-ورىن؛

ل. ن. گۋميليەۆ اتىنداعى ەۋرازيا ۇلتتىق ۋنيۆەرسيتەتى - 62-ورىن؛

Satbayev University - 89-ورىن.

قازاقستاندىق جوعارى وقۋ ورىندارى اراسىندا رەيتينگتەگى ورنىن ايتارلىقتاي جاقسارتقان ۋنيۆەرسيتەتتەردىڭ ءبىرى - NU. ۋنيۆەرسيتەت 62 ساتىعا كوتەرىلىپ، 139-ورىنعا يە بولدى. وسىلايشا، رەيتينگكە ەكىنشى جىل قاتارىنان قاتىسىپ وتىرعان وقۋ ورنى ازيانىڭ ۇزدىك 200 ۋنيۆەرسيتەتىنىڭ قاتارىنا ەندى. سونداي-اق سارسەن امانجولوۆ اتىنداعى شىعىس قازاقستان ۋنيۆەرسيتەتى ءوز كورسەتكىشىن 64 ساتىعا جاقسارتىپ، 618-ورىنعا كوتەرىلدى.

قازاقستاندىق ۋنيۆەرسيتەتتەر ءبىلىم بەرۋ ورتاسىنىڭ ساپاسى، اكادەميالىق ۇتقىرلىق جانە حالىقارالىق ىنتىماقتاستىق كورسەتكىشتەرى بويىنشا جوعارى ناتيجەلەرگە قول جەتكىزدى. رەيتينگتىڭ 11 ينديكاتورىنىڭ جەتەۋى بويىنشا وتاندىق جوعارى وقۋ ورىندارىنىڭ ورتاشا كورسەتكىشتەرى ازيا ۋنيۆەرسيتەتتەرىنىڭ ورتاشا دەڭگەيىنەن جوعارى بولدى.

اتاپ ايتقاندا، اكادەميالىق الماسۋ باعدارلامالارى اياسىندا شەتەلگە شىعاتىن ستۋدەنتتەردىڭ ۇلەسى بويىنشا قازاقستاننىڭ ورتاشا كورسەتكىشى 58,8 بالدى قۇرادى. ال ازيا بويىنشا بۇل كورسەتكىش 22,6 بالعا تەڭ. وقىتۋشىلار مەن ستۋدەنتتەر سانىنىڭ اراقاتىناسى بويىنشا وتاندىق ۋنيۆەرسيتەتتەر ورتا ەسەپپەن 52 بال جيناسا، ازياداعى ورتاشا كورسەتكىش 34,6 بالدى قۇرادى. جۇمىس بەرۋشىلەر اراسىنداعى بەدەل كورسەتكىشى بويىنشا قازاقستاندىق جوعارى وقۋ ورىندارى 38,8 بالعا قول جەتكىزىپ، ازياداعى ورتاشا دەڭگەيدەن (24,9 بال) جوعارى ناتيجە كورسەتتى.

ەلىمىزدىڭ جەتەكشى ۋنيۆەرسيتەتتەرى جەكەلەگەن ينديكاتورلار بويىنشا دا جوعارى ورىندارعا يە بولدى. ماسەلەن، ءال-فارابي اتىنداعى قازاق ۇلتتىق ۋنيۆەرسيتەتى وقىتۋشىلار مەن ستۋدەنتتەر سانىنىڭ اراقاتىناسى جانە اكادەميالىق الماسۋ باعدارلامالارى بويىنشا شەتەلگە شىعاتىن ستۋدەنتتەردىڭ ۇلەسى جونىنەن ازيادا 12-ورىنعا تۇراقتادى. ال اكادەميك ە. ا. بوكەتوۆ اتىنداعى قاراعاندى ۇلتتىق زەرتتەۋ ۋنيۆەرسيتەتى سوڭعى كورسەتكىش بويىنشا 29-ورىننان 18-ورىنعا كوتەرىلدى.

ءوز كەزەگىندە NU حالىقارالىق عىلىمي ىنتىماقتاستىق يندەكسى بويىنشا 24-ورىنعا، ال شەتەلدىك وقىتۋشىلاردىڭ ۇلەسى بويىنشا 26-ورىنعا يە بولدى. شەتەلدىك وقىتۋشىلاردىڭ ۇلەسى جونىنەن ساتپايەۆ ۋينۆەرسيتەتى 34-ورىنعا تۇراقتاسا، ءال-فارابي اتىنداعى قازاق ۇلتتىق ۋنيۆەرسيتەتى 52-ورىننان 40-ورىنعا كوتەرىلدى.

قازاقستاندىق ۋنيۆەرسيتەتتەردىڭ باسقا دا ماڭىزدى جەتىستىكتەرى:

10 جوعارى وقۋ ورنى وقىتۋشىلار مەن ستۋدەنتتەر سانىنىڭ اراقاتىناسى بويىنشا ازيانىڭ ۇزدىك 100 ۋنيۆەرسيتەتىنىڭ قاتارىنا ەندى؛

6 ۋنيۆەرسيتەت اكادەميالىق الماسۋ باعدارلامالارى بويىنشا شەتەلگە شىعاتىن ستۋدەنتتەردىڭ ۇلەسى جونىنەن العاشقى جۇزدىككە كىردى؛

7 جوعارى وقۋ ورنى شەتەلدىك وقىتۋشىلاردىڭ ۇلەسى بويىنشا ۇزدىك 100 ۋنيۆەرسيتەتتىڭ قاتارىنان ورىن الدى؛

قازاقستاندىق ۋنيۆەرسيتەتتەردىڭ 48 پايىزى شەتەلدىك وقىتۋشىلاردىڭ ۇلەسى بويىنشا كورسەتكىشتەرىن جاقسارتتى؛

جوعارى وقۋ ورىندارىنىڭ 39 پايىزى وقىتۋشىلار مەن ستۋدەنتتەر سانىنىڭ اراقاتىناسى بويىنشا ناتيجەلەرىن ارتتىردى.

حالىقارالىق اكادەميالىق ىنتىماقتاستىقتىڭ كەڭەيۋى، سونىڭ ىشىندە قازاقستاندا شەتەلدىك ۋنيۆەرسيتەتتەردىڭ 30 دان استام فيليالىنىڭ اشىلۋى ءبىلىم بەرۋ باعدارلامالارىن دامىتۋعا، اكادەميالىق ۇتقىرلىقتى ارتتىرۋعا جانە وتاندىق جوعارى وقۋ ورىندارىنىڭ حالىقارالىق بايلانىستارىن نىعايتۋعا قوسىمشا مۇمكىندىكتەر تۋعىزۋدا.

رەيتينگ ناتيجەلەرىنە پىكىر بىلدىرگەن QS Quacquarelli Symonds اگەنتتىگىنىڭ اعا ۆيتسە-پرەزيدەنتى بەن ساۋتەر قازاقستاننىڭ ورتالىق ازياداعى جەتەكشى ورنىن ساقتاپ وتىرعانىن اتاپ ءوتتى. ونىڭ ايتۋىنشا، NU ۋنيۆەرسيتەتىنىڭ ازياداعى ۇزدىك 200 جوعارى وقۋ ورنىنىڭ قاتارىنا ەنۋى عىلىمي زەرتتەۋلەردى قولداۋ مەن جوعارى ءبىلىم بەرۋدى ينتەرناتسيونالداندىرۋدىڭ ماڭىزىن كورسەتەدى. سونىمەن بىرگە عىلىمدى قارجىلاندىرۋ كولەمىن ۇلعايتۋمەن قاتار، عىلىمي زەرتتەۋلەردىڭ حالىقارالىق ىقپالىن ارتتىرۋ نەگىزگى مىندەتتەردىڭ ءبىرى بولىپ قالا بەرەدى.

QS Quacquarelli Symonds اگەنتتىگىنىڭ وڭىرلىك ديرەكتورى سەرگەي حريستوليۋبوۆ تا قازاقستاننىڭ حالىقارالىق رەيتينگتەگى وكىلدىگى كەڭەيىپ كەلە جاتقانىن اتاپ ءوتتى. ونىڭ ايتۋىنشا، QS Asia University Rankings 2027 رەيتينگىنە ەلىمىزدىڭ 19 قالاسىنان 51 ۋنيۆەرسيتەت ەنگەن. بۇل ناتيجە الماتى مەن استانانىڭ الەمدەگى ۇزدىك ستۋدەنتتىك قالالاردىڭ QS Best Student Cities 2027 رەيتينگىندەگى ورىندارىنىڭ جاقسارۋىمەن قاتار، قازاقستاننىڭ وڭىرلىك ءبىلىم بەرۋ ورتالىعى رەتىندەگى حالىقارالىق تانىمالدىعىنىڭ ارتىپ كەلە جاتقانىن كورسەتەدى.

QS Asia University Rankings - QS Quacquarelli Symonds اگەنتتىگى ازىرلەيتىن ازيا ۋنيۆەرسيتەتتەرىنىڭ حالىقارالىق رەيتينگى. جوعارى وقۋ ورىندارى اكادەميالىق بەدەلى، تۇلەكتەرىنىڭ جۇمىس بەرۋشىلەر اراسىنداعى سۇرانىسى، ءبىلىم بەرۋ ورتاسىنىڭ ساپاسى، عىلىمي-زەرتتەۋ قىزمەتىنىڭ ناتيجەلىلىگى، حالىقارالىق ىنتىماقتاستىق جانە اكادەميالىق ۇتقىرلىق دەڭگەيىن قامتيتىن 11 ينديكاتور بويىنشا باعالانادى.

ايتا كەتەلىك جوو تۇلەكتەرىنە مەملەكەتتىك قىزمەتكە ورنالاسۋدىڭ جاڭا جولى اشىلدى.