قازاقستاننىڭ اقىلى جولدارىنا 56 لازەرلىك قۇرىلعى ورناتىلدى
استانا. KAZINFORM - قازاقستانداعى 22 اقىلى جول ۋچاسكەسىنە 56 لازەرلىك قۇرىلعى ورناتىلدى. ولار جۇرگىزۋشىلەرگە تۇنگى ۋاقىتتا جولدىڭ باعىتىن جاقسىراق كورۋگە جانە قوزعالىس قاۋىپسىزدىگىن ساقتاۋعا كومەكتەسەدى.
بۇل تۋرالى «قازاۆتوجول» ۇ ك» ا ق باسقارما ءتوراعاسى دارحان يماناشيەۆ ورتالىق كوممۋنيكاتسيالار قىزمەتىندە وتكەن بريفينگتە مالىمدەدى.
سونىمەن قاتار رەسپۋبليكالىق جولداردا 282 اۋىسپالى اقپاراتتىق جول بەلگىسى مەن 142 ەلەكتروندىق تابلو ورناتىلعان. تاعى 110 قۇرىلعىنى ورناتۋ جۇمىستارى اياقتالۋعا جاقىن.
بۇدان بولەك جول قورشاۋلارىنا جارىق شاعىلىستىراتىن ەلەمەنتتەر قويىلىپ، قارسى باعىتتاعى كولىكتەردىڭ جارىعىنان قورعايتىن ەكراندار دا قولدانىلىپ جاتىر.
- ەلەكتروندىق تابلولار مەن اقىلدى جول بەلگىلەرى ارقىلى جۇرگىزۋشىلەرگە كوكتايعاق، قار، قاتتى جەل جانە قوزعالىسقا قويىلعان شەكتەۋلەر تۋرالى جەدەل اقپارات بەرىلەدى. قاجەت بولعان جاعدايدا جىلدامدىقتى تومەندەتۋ جونىندە دە ەسكەرتۋ جاسالادى، - دەدى دارحان يماناشيەۆ.
ونىڭ ايتۋىنشا، بۇل قۇرىلعىلار جول جاعدايى كۇرت وزگەرگەن كەزدە جۇرگىزۋشىلەردى دەر كەزىندە حاباردار ەتۋگە مۇمكىندىك بەرەدى.
