قازاقستاننىڭ زەينەتاقى جۇيەسى ا ق ش، يسپانيا، جاپونيا، كورەيا، قىتاي ەلدەرىنەن وزدى

استانا. KAZINFORM - قازاقستاننىڭ زەينەتاقى جۇيەسى قازاقستان ا ق ش، يسپانيا، جاپونيا، وڭتۇستىك كورەيا، قىتاي، ساۋد ارابياسى جانە باسقا ەلدەردەن وزىپ، "س+" باعاسىن الدى. بۇل تۋرالى ب ج ز ق باسپا ءسوز قىزمەتى حابارلادى.

Mercer ينستيتۋتى CFA- مەن بىرلەسىپ، جىل سايىن وتكىزەتىن Mercer CFA Institute Global Pension Index (MCGPI) زەينەتاقى يندەكسىندە قازاقستاننىڭ زەينەتاقى جۇيەسى 24- ورىندى يەلەندى.

«زەينەتاقى جۇيەلەرى كەشەندى تۇردە زەرتتەلەتىن 2024 -جىلعى حالىقارالىق رەيتينگكە الەمنىڭ 48 ەلى كىردى. Mercer CFA ينستيتۋتىنىڭ جاھاندىق زەينەتاقى يندەكسى اياسىندا جۇيەلەردى 50 دەن استام ينديكاتوردى قامتيتىن "لايىقتىلىق"، "تۇراقتىلىق" جانە "تۇتاستىق" ءۇش قوسالقى يندەكسى نەگىزىندە باعالاۋ جۇزەگە اسىرىلدى. وسى ينديكاتورلار بويىنشا زەينەتاقى جۇيەلەرىنە تولىق جانە وبەكتيۆتى باعالاۋ جۇرگىزۋ ءۇشىن ەىدۇ، دۇنيەجۇزىلىك بانك، حالىقارالىق ەڭبەك ۇيىمى، Economist Group زەرتتەۋ جانە تالداۋ بولىمشەسى سياقتى ت. ب. ۇيىمداردىڭ دەرەكتەرىن قامتيتىن اشىق حالىقارالىق كوزدەردەن الىنعان مالىمەتتەر پايدالانىلدى. 64,0 بالل جيناعان قازاقستان اقش، يسپانيا، جاپونيا، وڭتۇستىك كورەيا، قىتاي، ساۋد ارابياسى جانە باسقا ەلدەردەن وزىپ، "س+" باعاسىن الدى»، - دەلىنگەن حابارلامادا.

قورىتىندى بالل ۇلەس سالماعى بويىنشا ولشەنگەن قوسالقى يندەكستىك باعالاردىڭ ناتيجەلەرىن جيناقتاۋ جولىمەن الىندى:

- لايىقتىلىق" قوسالقى يندەكسى بويىنشا - 45,8 بالل (ۇلەس سالماعىنىڭ %40: قازاقستان، مىسالى مالايزيادان، وڭتۇستىك كورەيادان، يندونەزيادان، وڭتۇستىك افريكادان وزىپ كەتتى)؛

- "تۇراقتىلىق" قوسالقى يندەكسى بويىنشا - 73,1 بالل (ۇلەس سالماعىنىڭ %35: قازاقستان يندەكسى شۆەيتساريا، چيلي، جاڭا زەلانديا، فينليانديا، كانادا، نورۆەگيا، فرانتسيا، ۇلى بريتانيا، ا ق ش جانە باسقا دا كوپتەگەن ەلدەردىڭ كورسەتكىشتەرىنەن اسىپ تۇسەدى)؛

- "تۇتاستىق" قوسالقى يندەكسى بويىنشا - 80,4 بالل (ۇلەس سالماعىنىڭ %25: قازاقستاننىڭ كورسەتكىشى شۆەتسيا، دانيا، ۇلى بريتانيا، ا ق ش، قىتاي جانە باسقا ەلدەرگە قاراعاندا جوعارى).

جوعارىدا كەلتىرىلگەن سانداردان كورىنىپ تۇرعانداي، قازاقستاننىڭ تۇراقتىلىق (جالپى رەيتينگىدە 8-ورىن) جانە تۇتاستىق (16-ورىن) قوسالقى يندەكستەرى وتە جوعارى باعالاندى. رەسپۋبليكانىڭ زەينەتاقى جۇيەسىندەگى نىعايتۋدى قاجەت ەتەتىن نەعۇرلىم وسال ورنى - لايىقتىلىق قوسالقى يندەكسى بويىنشا (47 ورىننىڭ 41 ءسى) سيپاتتالدى.

Mercer CFA ينستيتۋتى قازاقستاندىق زەينەتاقى جۇيەسىن ودان ءارى جەتىلدىرۋ جانە زەينەتاقىمەن قامسىزداندىرۋ كورسەتكىشىنىڭ لايىقتىلىعىن ارتتىرۋ بويىنشا مىناداي ۇسىنىستار جاسادى:

· ەڭ كەدەي قارت ادامداردى/زەينەتكەرلەردى قولداۋدىڭ ەڭ تومەنگى دەڭگەيىن ارتتىرۋ؛

· ءۇي شارۋاشىلىقتارىنىڭ زەينەتاقى جيناقتارىنىڭ دەڭگەيىن كوتەرۋگە ىنتالاندىرۋ:

· زەينەتاقى جيناقتارىنا قول جەتكىزۋدى شەكتەۋ ارقىلى زەينەتكە شىعار الدىنداعى كەزەڭدە جيناقتاردىڭ شىعىس اعىنىن قىسقارتۋ؛

· ءومىر ءسۇرۋ ۇزاقتىعى ۇلعايعان سايىن ەگدە جاستاعى ادامداردىڭ جۇمىس كۇشىنە قاتىسۋ دەڭگەيىن ارتتىرۋ؛

· زەينەتاقى جۇيەسىنە قاتىسۋشىلاردىڭ جىلدىق ءۇزىندى كوشىرمەلەرىندە بولجامدى زەينەتاقى تولەمدەرىن كورسەتۋ بويىنشا تالاپتاردى ەنگىزۋ.

جاھاندىق زەينەتاقى يندەكسىندە بالا تۋۋدىڭ تومەندەۋىنە جانە ءومىر ءسۇرۋ ۇزاقتىعىنىڭ ۇلعايۋىنا قاتىستى جالعاسىپ جاتقان ۇردىستەردى ەسكەرە وتىرىپ، زەينەتاقى جۇيەلەرىن جەتىلدىرۋ قاجەتتىلىگى اتاپ وتىلەدى. ول تۋرالى دۇنيەجۇزىلىك ەكونوميكالىق فورۋمدا دا ايتىلدى: "ادامزات تاريحىندا العاش رەت 65 جانە ودان ەگدە ادامدار سانى 5 جانە ودان كىشى جاستاعى بالالارعا قاراعاندا كوبىرەك».

ەستەرىڭىزگە سالا كەتەيىك، 2023 -جىلى قازاقستاننىڭ زەينەتاقى جۇيەسى العاش رەت جىل سايىنعى رەيتينگ - Mercer CFA ينستيتۋتىنىڭ جاھاندىق زەينەتاقى يندەكسىنە ەنگىزىلىپ، بىردەن 64,9 بالل جيناپ، 20-ورىنعا يە بولدى. 2024 -جىلعى زەرتتەۋلەردىڭ قورىتىندىسى بويىنشا قازاقستان ءتىزىمنىڭ تۋرا ورتاسىنداعى ورىندى يەلەندى. ال ءبىرىنشى ورىندى نيدەرلاندىنىڭ زەينەتاقى جۇيەسى ساقتاپ، 84,8 بالل جينادى. اتاپ كەتەيىك، نيدەرلاندىدا 2028 -جىلعا قاراي بارلىق زەينەتاقى جوسپارلارىن جيناقتاۋشى جۇيەگە (DC) تولىق كوشىرۋ جوسپارلانىپ وتىر. يندەكستە بۇكىل الەم بويىنشا زەينەتاقى جۇيەلەرى بەلگىلەنگەن تولەمدەردىڭ (DB) جوسپارلارىنان ەداۋىر الشاقتاپ، بەكىتىلگەن جارنالاردىڭ (DC) جۇيەلەرىنە اۋىسىپ جاتقاندىعى اتاپ كورسەتىلگەن.

اۆتور

ساياگۇل جارىلقاسىن