قازاقستاننىڭ سىرتقى ىستەر ءمينيسترى ارمەنياعا جۇمىس ساپارىمەن باردى
ەرەۆان. KAZINFORM - جۇمىس ساپارى اياسىندا قازاقستان رەسپۋبليكاسى پرەمەر-ءمينيسترىنىڭ ورىنباسارى - سىرتقى ىستەر ءمينيسترى مۇرات نۇرتىلەۋ ارمەنيا رەسپۋبليكاسىنىڭ سىرتقى ىستەر ءمينيسترى ارارات ميرزويانمەن كەلىسسوزدەر جۇرگىزدى.
تاراپتار ساياسي، ساۋدا-ەكونوميكالىق جانە مادەني- گۋمانيتارلىق ءوزارا ءىس-قيمىلدىڭ باسىم باعىتتارى بويىنشا ەكىجاقتى ىنتىماقتاستىقتىڭ كەڭ اۋقىمدى ماسەلەلەرىن تالقىلادى. حالىقارالىق كۇن تارتىبىندەگى وزەكتى ماسەلەلەر بويىنشا پىكىر الماستى.
«ارمەنيا - قازاقستان ءۇشىن جاقىن مەملەكەت جانە ۋاقىت سىنىنان وتكەن سەنىمدى سەرىكتەس. قازىرگى كەزەڭدە دوستىق پەن ىنتىماقتاستىق تۋرالى شارت قازاق-ارميان قارىم-قاتىناستارىن كەڭەيتۋ مەن تەرەڭدەتۋدىڭ بەرىك نەگىزىن قالادى، ءبىز بيىل ونىڭ 25 جىلدىعىن تويلاعالى وتىرمىز. ءبىزدىڭ ورتاق تۇستارىمىز كوپ جانە ءبىز ەكى ەل حالىقتارىنىڭ ءال-اۋقاتى مەن وركەندەۋى ءۇشىن ورتاق ماقساتتارعا قول جەتكىزۋ ءۇشىن كۇش سالۋعا دايىنبىز»، - دەپ مالىمدەدى ق ر س ءى م باسشىسى.
دوستىق، سىيلاستىق جانە ارىپتەستىك نەگىزىندە مەملەكەتارالىق ءىس-قيمىلدى ودان ءارى تەرەڭدەتۋگە ءوزارا مىندەتتەمە ءبىلدىرىلدى. اسا جوعارى جانە جوعارى دەڭگەيلەردە ساياسي ديالوگتى ودان ءارى نىعايتۋدىڭ ماڭىزدىلىعى اتالىپ ءوتتى.
تاراپتار ساۋدا-ەكونوميكالىق ىنتىماقتاستىق ماسەلەلەرىنە ەرەكشە نازار اۋداردى. 2023-جىلدىڭ قورىتىندىسى بويىنشا ءوزارا ساۋدانىڭ وڭ ناتيجەلەرى بايقالدى، ونىڭ كولەمى %23,1 عا ءوسىپ، 53 ميلليون ا ق ش دوللارىنا جەتتى. س ءى م باسشىلارى تاۋار اينالىمىنىڭ قازىرگى دەڭگەيى قولدا بار الەۋەتكە سايكەس كەلمەيتىندىگىمەن كەلىستى، وسىعان بايلانىستى جاڭا مۇمكىندىكتەردى ايقىنداۋ ءۇشىن ورتاق كۇش سالۋعا جانە بىرلەسكەن شەشىمدەر قابىلداۋعا كەلىستى.
«بىزدە 25 جىلدىق سەرىكتەستىكتى قورىتىندىلاۋعا جانە ەكى ەلدىڭ يگىلىگى ءۇشىن قارىم-قاتىناستارىمىزدىڭ جاڭا بەتىن اشۋعا جاقسى مۇمكىندىك بار. ارينە، ءبىز ءوزارا ءىس-قيمىلىمىزدىڭ نەگىزىن كەڭەيتىپ جاتىرمىز. ساياسي ديالوگىمىزدىڭ جوعارى دەڭگەيى ءبىزدىڭ قارقىندى دامىپ كەلە جاتقان ساۋدا-ەكونوميكالىق قاتىناستارىمىزعا قاجەتتى العىشارتتاردى كورسەتەدى. ءبىز كولىك جانە لوگيستيكالىق بايلانىستاردى دامىتۋعا مۇددەلىمىز»، - دەدى مينيستر ا. ميرزويان.
سۇحباتتاستار سونداي-اق ەكى ەلدىڭ وندىرىستىك جانە قارجىلىق رەسۋرستارىن بىرىكتىرۋ نەگىزىندە ينۆەستيتسيالىق سالاداعى ىنتىماقتاستىقتى دامىتۋ پەرسپەكتيۆالارىن تالقىلادى. جوعارى تەحنولوگيالار، سيفرلاندىرۋ، اۋىل شارۋاشىلىعى ونىمدەرىن ءوزارا جەتكىزۋ سالالارىندا، قۇرىلىس سالاسىنداعى ىنتىماقتاستىق كووپەراتسيا جولدارىن بەلگىلەدى.
ساۋدا-ەكونوميكالىق جانە ينۆەستيتسيالىق بايلانىستاردى دامىتۋعا شاعىن جانە ورتا بيزنەستىڭ قاتىسۋىن وڭ باعالاپ، قازاقستاندا ارميان كاپيتالىنىڭ قاتىسۋىمەن 435 كاسىپورىن، ارمەنيادا قازاقستاندىق كاپيتالدىڭ قاتىسۋىمەن 100 دەن استام كاسىپورىن جۇمىس ىستەيتىنى اتالىپ ءوتتى.
تاراپتار مادەني-گۋمانيتارلىق سالاداعى ىنتىماقتاستىقتىڭ وڭ ديناميكاسىن اتاپ ءوتتى.
مادەنيەت، ءبىلىم، عىلىم سالالارىنداعى ىنتىماقتاستىقتى ارتتىرۋ بويىنشا ۇسىنىستارمەن الماستى. قازاقستان مەن ارمەنيادا مادەنيەت كۇندەرىن ءوزارا ۇيىمداستىرۋعا ماڭىزدى ءمان بەرىلدى.
سىرتقى ىستەر مينيسترلەرى كەلىسسوزدەر قورىتىندىلارىنا كوڭىلى تولاتىنىن ءبىلدىرىپ، ودان ءارى جەمىستى ىنتىماقتاستىققا سەنىم ءبىلدىردى.
كەلىسسوزدەر ناتيجەسى بويىنشا قازاقستان مەن ارمەنيانىڭ سىرتقى ساياسي ۆەدومستۆولارى اراسىندا 2024-2025 -جىلدارعا ارنالعان ىنتىماقتاستىق باعدارلاماسىنا قول قويىلدى.
