قازاقستاننىڭ سۋ سالاسىندا 1700 دەن استام ايەل جۇمىس ىستەيدى
استانا. KAZINFORM - ەلىمىزدە سۋ سالاسىندا 1700 دەن استام ايەل بار. اتاپ ايتقاندا، «قازسۋشار» مەملەكەتتىك كاسىپورنىندا 1579 نازىك جاندى ارۋ جۇمىس ىستەيدى.
سۋ رەسۋرستارى جانە يرريگاتسيا مينيسترلىگىندە 75 ايەل بار. مينيسترلىك جانىنداعى سۋ شارۋاشىلىعى جانە باسسەيندىك ينسپەكتسيالار كوميتەتىندە 99 ايەل جۇمىس ىستەيدى.
ق ر سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ وتاندىق سۋ سالاسىندا قىزمەت ەتىپ جۇرگەن ارۋلاردى مەرەكەمەن قۇتتىقتادى.
«قازاقستاننىڭ سۋ سالاسىندا قىزمەت اتقاراتىن اياۋلى ارۋلارىمىزدى حالىقارالىق ايەلدەر كۇنىمەن شىن جۇرەكتەن قۇتتىقتايمىن. بارشاڭىزعا زور دەنساۋلىق، مول باقىت، تۋىستارىڭىز بەن جاقىندارىڭىزدىڭ شاتتىق كۇلكىسىن، سونداي-اق جاڭا بيىكتەردى باعىندىرۋ ءۇشىن تولاعاي تابىس پەن كۇش-جىگەر تىلەيمىن. ەلىمىزدىڭ سۋ رەسۋرستارىن ساقتاۋ جانە قورعاۋ بويىنشا ورتاق جۇمىسىمىزدى سىزدەردىڭ قاجىرلى ەڭبەكتەرىڭىزسىز ەلەستەتۋ مۇمكىن ەمەس. گۇلدەي قۇلپىرىپ جۇرىڭىزدەر، ءار كۇندەرىڭىز قۋانىشتى ساتتەرگە تولى بولسىن»، - دەدى سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ.
اۆتور
ابىلايحان جۇماشيەۆ
