قازاقستاننىڭ قىتاي، وزبەكستان جانە تۇركىمەنستانمەن شەكارا بەكەتتەرى وتكىزۋ قابىلەتىن 8 ەسە ارتتىرادى
استانا. KAZINFORM – ق ر ق م مەملەكەتتىك كىرىستەر كوميتەتى كەدەندىك باقىلاۋ دەپارتامەنتىنىڭ ديرەكتورى ەلدوس ساۋدابايەۆ قىتاي حالىق رەسپۋبليكاسىمەن، وزبەكستان جانە تۇركىمەنستانمەن شەكاراداعى وتكىزۋ بەكەتتەرىن جاڭعىرتۋ جۇمىستارى تۋرالى ايتىپ بەردى.
«ەلدىڭ ترانزيتتىك الەۋەتىن دامىتۋ جانە كورشىلەس ەلدەرمەن تاۋار اينالىمىن ۇلعايتۋ ماقساتىندا ۇكىمەت قىتاي حالىق رەسپۋبليكاسىمەن جانە وزبەكستان، تۇرىكمەنستانمەن شەكاراداعى وتكىزۋ پۋنكتتەرىن تولىققاندى جاڭعىرتۋدى باستادى»، - دەدى دەپارتامەنت باسشىسى مەملەكەتتىك كىرىستەر كوميتەتىندە وتكەن باسپا ءسوز ءماسليحاتىندا.
ونىڭ ايتۋىنشا، جاڭعىرتۋ زاماناۋي تالاپتارعا ساي كەلمەيتىن ەسكى ينفراقۇرىلىمدى بۇزىپ، جاڭا وتكىزۋ بەكەتتەرىن سالۋدى كوزدەيدى.
«جاڭعىرتۋ اياسىندا جاڭادان «الاكول» اۆتوموبيل بەكەتى سالىنۋدا جانە ونىڭ اۋماعى ايتارلىقتاي كەڭەيتىلەدى. 2023-جىلدىڭ ماۋسىم ايىندا «دوستىق-تەمىرجول» ينسپەكتسيالىق-تەكسەرۋ كەشەنى پايدالانۋعا بەرىلدى»، - دەدى ەلدوس ساۋدابايەۆ.
مەملەكەتتىك كىرىستەر كوميتەتىنىڭ مالىمەتىنشە، جاڭعىرتۋ جۇمىستارى وتكىزۋ قابىلەتىن 8 ەسەگە ارتتىرۋعا، بارلىق تاۋارلار مەن كولىك اينالىمىن اۆتوماتتاندىرۋ ارقىلى شەكارادان ءوتۋ ۋاقىتىن 30 مينۋتقا دەيىن قىسقارتۋعا مۇمكىندىك بەرەدى.
