قازاقستاننىڭ ەنەرگەتيكا جۇيەسى رەسەيگە تاۋەلدى بولىپ قالماي ما - ەنەرگەتيكا ءمينيسترىنىڭ جاۋابى

استانا. KAZINFORM - «روساتومنىڭ» قازاقستاندا ا ە س سالۋى مۇمكىن كومپانيالاردىڭ تىزىمىندە بولۋى استانانى ماسكەۋگە ەنەرگەتيكالىق تۇرعىدان تاۋەلدى ەتە تۇسپەي مە؟ ەنەرگەتيكا ءمينيسترى الماسادام ساتقاليەۆكە استانا تۇرعىندارىمەن كەزدەسۋ الدىندا وتكەن باسپا ءسوز ءماسليحاتىندا وسىنداي سۇراق قويىلدى.

«ءبىز قانداي ءبىر ەلگە تاۋەلدىمىز نەمەسە تاۋەلدى ەمەسپىز دەپ ايتپايمىز. ءوزارا قۋات الماسۋ ارنالارى بار ەكەنى تۇسىنىكتى. ەكى ارادا كوممەرتسيالىق تۇرعىدان نەگىزدى بولىپ ەسەپتەلەتىن ءوزارا ەنەرگيا تاسىمالى بار. ءوزارا رەزەرۆتەۋمەن بايلانىستى رەجيم جۇيەلەرى بار. قازىر قازاقستان عانا ەمەس، بارلىق ەلدەر ءوز ەنەرگەتيكالىق جۇيەسىنىڭ تاۋەلسىزدىگىنە، جۇكتەمەنى وزىندەگى قۋات كوزدەرىمەن جابۋعا، قاجەت بولعان جاعدايدا اۆتونومدى رەجيمدە جۇمىس ىستەۋ مۇمكىندىگىنە باسىمدىق بەرەدى. ياعني، بۇل ءبىزدىڭ جوسپارلاۋ جۇمىسىمىزدىڭ ءبىر ەلەمەنتى. سوندىقتان دا ءبىز قازاقستان اۋماعىندا اۋقىمدى تۇردە قۋات كوزدەرىن ىسكە قوسىپ جاتىرمىز»، - دەدى الماسادام ساتقاليەۆ.

سونداي-اق، ول مۇناي ەكسپورتىندا دا ءبىر عانا مارشرۋتقا تاۋەلدىلىكتەن ارىلۋ جولدارى پايدا بولىپ كەلە جاتقانىن ايتتى.

«مۇناي تاسىمالىنا كەلسەك، بىزدە رەسەي اۋماعىنان بولەك قىتايعا ەكسپورتتاۋ مۇمكىندىگى بار. ترانسكاسپي كولىك مارشرۋتىن دامىتۋ باعىتىندا ۇلكەن جۇمىستار اتقاردىق. بىزدە ازەربايجان تارابىمەن «باكۋ- سۋپسا» ەكسپورتتىق مۇناي قۇبىرىنا پايدالانۋ بويىنشا كەلىسىم بار. «تبيليسي- جەيحان» باعىتىمەن مۇناي جەتكىزۋدى قازىردىڭ وزىندە باستاپ كەتتىك. تەمىرجول ارقىلى سولتۇستىك- وڭتۇستىك ءدالىزى ارقىلى مۇناي تاسىمالداۋ مۇمكىندىگى بار. ءبىز بالاما جولداردى كورىپ وتىرمىز جانە ءسىز كوتەرگەن ماسەلەنى نازاردا مىقتاپ ۇستاپ وتىرمىز»، - دەدى ەنەرگەتيكا ءمينيسترى.

اۆتور
ەركەجان سماعۇلوۆا