قازاقستاننىڭ ۇلتتىق تەستىلەۋ ورتالىعى قايتا قۇرىلدى
استانا. KAZINFORM – ق ر عىلىم جانە جوعارى ءبىلىم مينيسترلىگىنىڭ «ۇلتتىق تەستىلەۋ ورتالىعى رەسپۋبليكالىق مەملەكەتتىك قازىنالىق كاسىپورنىن قايتا ۇيىمداستىرۋ» تۋرالى ۇكىمەتتىڭ 2024-جىلعى 10-ساۋىردەگى قاۋلىسى قابىلداندى.

- ق ر عىلىم جانە جوعارى ءبىلىم مينيسترلىگىنىڭ ۇلتتىق تەستىلەۋ ورتالىعى رەسپۋبليكالىق مەملەكەتتىك قازىنالىق كاسىپورنى زاڭنامادا بەلگىلەنگەن تارتىپپەن ق ر عىلىم جانە جوعارى ءبىلىم مينيسترلىگىنىڭ «ۇلتتىق تەستىلەۋ ورتالىعى» شارۋاشىلىق جۇرگىزۋ قۇقىعىنداعى رەسپۋبليكالىق مەملەكەتتىك كاسىپورنى» بولىپ قايتا قۇرىلسىن، - دەلىنگەن قۇجاتتا.
كاسىپورىنعا قاتىستى مەملەكەتتىك باسقارۋدىڭ ءتيىستى سالاسىن باسقارۋ جونىندەگى ۋاكىلەتتى ورگان بولىپ ق ر عىلىم جانە جوعارى ءبىلىم مينيسترلىگى ايقىندالدى.
كاسىپورىن قىزمەتىنىڭ نەگىزگى ءمانى باستاۋىش، نەگىزگى ورتا، جالپى ورتا، تەحنيكالىق جانە كاسىپتىك، ورتا بىلىمنەن كەيىنگى، جوعارى، جوعارى وقۋ ورنىنان كەيىنگى جانە قوسىمشا ءبىلىم بەرۋ سالاسىندا تەستىلەۋ وتكىزۋ بولىپ بەلگىلەندى.
قاۋلى قول قويىلعان كۇنىنەن باستاپ قولدانىسقا ەنگىزىلەدى.