قازاقستاننىڭ كوك تۋى بىرىككەن اراب امىرلىكتەرىندە جەلبىرەدى

ابۋ-دابي مارافونىنا 25 مىڭعا جۋىق سپورتشى قاتىستى، دەپ حابارلايدى Kazinform.

جارىسقا قاتىسۋشى عاني تەمىرالى ۇلى تۇركىستان قالاسىنىڭ ازاماتى. جەڭىل اتلەت بۇل ىسىمەن وتانداستارىن تاۋەلسىزدىك كۇنى مەرەكەسىنە وراي قۇتتىقتاعىسى كەلگەن. سونداي-اق تاۋەلسىز قازاقستانعا الەم نازارىن اۋدارۋدى جوسپارلاعان. سپورتشى مارافوندا 10 شاقىرىم قاشىقتىققا جۇگىردى.

«ابۋ-دابي قالاسىندا كوك تۋىمىزدى جەلبىرەتىپ جۇگىرىپ شىقتىم. بۇكىل الەمنىڭ سپورتشىلارى مەنى تاۋەلسىزدىك مەرەكەسىمەن قۇتتىقتادى. كەرەمەت اسەر، كەرەمەت ەموتسيا الدىم. وسىنداي مۇمكىندىك سىيلاعان International Turkistan marathon ديرەكتسياسىنىڭ قۇرمەتتى پرەزيدەنتى نۇرباح رۇستەموۆكە العىسىمدى ايتامىن» - دەدى ول.

سپورتتىق سايىسقا الەم ەلدەرىنەن 25 مىڭعا جۋىق سپورتشى قاتىسىپ، 42، 10، 5، 2.5 شاقىرىمدا باق سىنادى. جەلاياقتار جارىسى 2023 -جىلى الەمدەگى ەڭ ماڭىزدى سپورتتىق سايىستاردىڭ ءبىرى اتاندى.

الداعى ۋاقىتتا قازاقستاندىق مارافونشىلار International Turkistan marathon ديرەكتسياسىنىڭ قولداۋىمەن حالىقارالىق جارىستارعا تۇراقتى تۇردە قاتىسۋدى جوسپارلاپ وتىر.