قازاقستاننىڭ شيكىزاتتىق ەمەس تاۋارىنىڭ ەكسپورتى ازايعان - سەنات ءتوراعاسى

Сенат
Фото: Сенаттың баспасөз қызметі

استانا. KAZINFORM - پارلامەنت سەناتىنىڭ ءتوراعاسى ماۋلەن اشىمبايەۆ پالاتا وتىرىسىندا قازاقستاننىڭ شيكىزاتتىق ەمەس تاۋارلار ەكسپورتى الەمدىك نارىقتا تومەندەپ بارا جاتقانىن ايتتى.

قازاقستان ءۇشىن ەۋرازيالىق ەكونوميكالىق وداق اياسىندا ونەركاسىپ كووپەراتسياسىن، ونەركاسىپ سەكتورىنداعى بىرلەسكەن جوبالاردى دامىتۋ نەگىزگى باسىمدىقتاردىڭ ءبىرى. دەگەنمەن، شيكىزاتتىق ەمەس تاۋارلار ەكسپورتىنىڭ تومەندەۋى وتاندىق ونەركاسىپتى قولداۋ، وسى باعىتتا ءتيىمدى شەشىمدەر قابىلداۋ كەرەكتىگىن كورسەتىپ وتىر.

ماۋلەن اشىمبايەۆ وسىعان بايلانىستى ق ر ونەركاسىپ جانە قۇرىلىس مينيسترلىگىن شيكىزاتتىق ەمەس ءوندىرىستى دامىتۋ جولىندا بەلسەندى جۇمىس ىستەۋگە، ونىڭ ىشىندە ەاەو مۇمكىندىكتەرىن پايدالانۋعا شاقىردى.

«بىلتىر بۇل كورسەتكىش بىزدە (شيكىزاتتىق ەمەس تاۋارلاردىڭ ەكسپورتى) شامامەن 6 پايىزعا تومەندەگەن. بۇل وتە كوپ. دەمەك، قازاقستان شيكىزاتتىق ەمەس تاۋارلار ەكسپورتىن ازايتىپ وتىر دەگەن قورىتىندى جاساۋعا تۋرا كەلەدى. بيىل - 7,2 پايىز بولدى. بۇل ءبىزدىڭ ستراتەگيالىق باسىمدىقتارىمىزعا ساي ەمەس. وسى رەتتە ءبىزدىڭ شەكارالاس اۋداندارىمىزدا سەرىكتەستەرىمىزبەن بىرلەسكەن بىرنەشە ءىرى جوبا بار. اتاپ ايتقاندا، قىرعىزستانمەن بىرلەسىپ دامىتۋ كوزدەلگەن ارنايى يندۋستريالىق ايماق («اق- تىلەك - قاراسۋ» وتكىزۋ پۋنكتىنىڭ جانىندا) بار. باتىس قازاقستان وبلىسىندا دا وسىنداي ايماق بار. ونى رەسەيلىك سەرىكتەستەرمەن بىرگە دامىتۋعا نيەت ەتىپ وتىرمىز. ول ونىمدەردى باسقا ەلدەردىڭ نارىقتارىنا جەتكىزۋ ءۇشىن ءتيىستى اۋماقتاردا ونەركاسىپ كووپەراتسياسىن دامىتۋ قاجەت. بۇل تۇرعىدا مينيسترلىك بەلسەندى جۇمىس جۇرگىزۋگە ءتيىس»، - دەدى سەنات ءتوراعاسى.

ايتا كەتەيىك، بۇگىن سەنات سپيكەرى ماۋلەن اشىمبايەۆتىڭ ءتوراعالىق ەتۋىمەن پالاتا وتىرىسى ءوتتى. وندا سەناتورلار «2014 -جىلعى 29-مامىرداعى ەۋرازيالىق ەكونوميكالىق وداق تۋرالى شارتقا ەۋرازيالىق ەكونوميكالىق وداققا مۇشە مەملەكەتتەر ونەركاسىپ سالالارىندا بىرلەسكەن كووپەراتسيالىق جوبالاردى ىسكە اسىرعان كەزدە قارجىلاي جاردەم كورسەتۋ بولىگىندە وزگەرىستەر ەنگىزۋ تۋرالى حاتتامانى راتيفيكاتسيالاۋ تۋرالى» زاڭدى قاراپ، ماقۇلدادى.

زاڭ نورمالارى ەۋرازيالىق ەكونوميكالىق وداققا مۇشە مەملەكەتتەردىڭ كاسىپورىندارى اراسىنداعى كووپەراتسيالىق بايلانىستاردى كەڭەيتۋگە ارنالعان. ول ءۇشىن قارجىلىق ىنتالاندىرۋدىڭ ارنايى تەتىكتەرى كوزدەلىپ وتىر. قۇجات ءوندىرىس كولەمىن ۇلعايتۋعا، سونداي-اق قوسىمشا جۇمىس ورىندارىن اشۋعا مۇمكىندىك بەرەدى.

سوڭعى جاڭالىقتار