قازاقستاننىڭ ءبىرقاتار وڭىرلەرىندە نىساندارعا جىلۋ بەرىلە باستادى

 قازاقستاننىڭ ءبىرقاتار وڭىرلەرىندە جىلىتۋ ماۋسىمى باستالدى. ەڭ الدىمەن، الەۋمەتتىك نىساندار جىلىتۋعا قوسىلادى، دەپ حابارلايدى ق ر ەنەرگەتيكا مينيسترلىگىنىڭ باسپا ءسوز قىزمەتى. 

بۇگىنگى تاڭدا جىلىتۋ ماۋسىمى استانا قالاسىندا، اقمولا، شىعىس قازاقستان، قاراعاندى، پاۆلودار، قوستاناي جانە سولتۇستىك قازاقستان وبلىستارىندا باستالدى.

اتاپ ايتقاندا، شىعىس قازاقستان وبلىسىنىڭ ريددەر قالاسىندا 24 الەۋمەتتىك نىساننىڭ 23 نەمەسە %96 ى قوسىلعان. تۇرعىن ۇيلەرگە ىستىق سۋ بەرىلدى. پاۆلودار وبلىسىنىڭ ەكىباستۇز قالاسى بويىنشا 90 الەۋمەتتىك نىساننىڭ 26 نەمەسە %28,8 ى قوسىلعان. استانا قالاسىندا 240 الەۋمەتتىك نىساننىڭ 86 نەمەسە %35,8 ى قوسىلعان.

3-قازاندا الماتى وبلىسىندا؛ 10-قازاندا ۇلىتاۋ وبلىسىندا؛ 15-قازاندا الماتى، اباي وبلىسىندا، اقتوبە، اتىراۋ، جامبىل، جەتىسۋ، باتىس قازاقستان، قىزىلوردا، ماڭعىستاۋ وبلىستارىندا جىلىتۋعا قوسىلۋ كۇتىلۋدە.

جىلىتۋ ماۋسىمىن شىمكەنتتە 20-قازاننان، تۇركىستان وبلىسىندا 25-قازاننان باستاۋ جوسپارلانۋدا.