قازاقستاننىڭ ءالى قانشا اۋىلىندا موبيلدى ينتەرنەت ىستەمەيتىنى بەلگىلى بولدى

استانا. KAZINFORM – كەلەر جىلدىڭ سوڭىندا قازاقستاندا 5G ينتەرنەتىن ەنگىزۋ اياقتالادى. بۇل تۋرالى سيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى جاسلان ماديەۆ ايتتى.

интернет
Фото: freepik.com

ونىڭ ايتۋىنشا، بۇگىندە 1424 اۋىل موبيلدى ينتەرنەتكە قول جەتكىزە الماي وتىر.

«ۇيالى بايلانىس وپەراتورلارىن ىنتالاندىرۋ ءۇشىن مينيسترلىك جاڭا سالىق كودەكسىنە راديوجيىلىك سپەكترىنە سالىقتىق جەڭىلدىكتەردى ۇزارتۋدى جانە تولەم مولشەرلەمەسىن وزگەرتۋدى ۇسىندى. وسىلايشا، بايلانىس وپەراتورلارىنىڭ ليتسەنزيالىق مىندەتتەمەلەرىندە 1 مىڭ 76 اۋىلدى ينتەرنەتپەن قامتاماسىز ەتۋ كوزدەلگەن»، - دەدى جاسلان ماديەۆ ۇكىمەت وتىرىسىندا.

سونداي-اق مينيستر 1 جىلدان سوڭ ەلىمىزدە 5G ينتەرنەتىن ەنگىزۋ اياقتالاتىنىن اتاپ ءوتتى.

«5G تەحنولوگياسىن ودان ءارى دامىتۋعا قاتىستى Kcell جانە Tele2-مەن استانا، الماتى، شىمكەنت قالالارىندا جانە وبلىس ورتالىقتارىندا 5G- ءدى دامىتۋ بويىنشا جۇمىستاردى جالعاستىرادى. بۇگىنگى تاڭدا 20 قالادا 1144 بازالىق ستانسيا ورناتىلدى.

مەملەكەت باسشىسىنىڭ تاپسىرماسىنا سايكەس 5G ۇيالى بايلانىسىن ەنگىزۋ 2025-جىلدىڭ سوڭىنا دەيىن اياقتالۋعا ءتيىس. 2027-جىلدىڭ سوڭىنا دەيىن بايلانىس وپەراتورلارىنىڭ سالاعا سالاتىن ينۆەستيتسيا كولەمى 450 ميلليارد تەڭگەدەن اسادى»، - دەدى ۆەدومستۆو باسشىسى.

جاسلان ماديەۆتىڭ ايتۋىنشا، قازىر ەلىمىزدە 6290 اۋىل بار.

«ونىڭ ىشىندە سىمدى ينتەرنەت بويىنشا وپتيكا 2606 اۋىلعا جەتكىزىلگەن. موبيلدى ينتەرنەت 4866 اۋىلدا قولجەتىمدى. 2+ قولدانىستاعى سالىقتىق جەڭىلدىكتەر اياسىندا 2023-جىلى 1161 اۋىل 4G تەحنولوگياسىنا قوسىلدى»، - دەدى مينيستر.

سونداي-اق ۆەدومستۆو باسشىسى قانشا اۋىلدا جىلدام ينتەرنەت جوق ەكەنىنە توقتالدى.

«قازىر 3684 اۋىلدا وپتيكا جوق. ۇلتتىق جوبا شەڭبەرىندە مەملەكەتتىك- جەكەشەلىك ارىپتەستىك تەتىگى ارقىلى 3010 اۋىلعا دەيىن وپتيكالىق بايلانىس جەلىسى جەتكىزىلەدى. «سوڭعى ميل» جوق جەردە شاعىن جانە ورتا بايلانىس وپەراتورلارىنىڭ كۇردەلى شىعىندارىنىڭ %50 سۋبسيديالاۋ تەتىگى پايدالانىلادى. وسى جوبالاردىڭ قورىتىندىسى بويىنشا 2,4 ميلليون ادامدى ينتەرنەتكە قولجەتىمدىلىكپەن قامتاماسىز ەتەمىز دەپ جوسپارلاپ وتىرمىز. جوبالار بايلانىس وپەراتورلارىنان 340 ميلليارد تەڭگەدەن اسا كولەمدە جەكە ينۆەستيتسيادى تارتۋدى كوزدەيدى»، - دەدى جاسلان ماديەۆ.

سوڭعى جاڭالىقتار