قازاقستاننىڭ بيداي ەكسپورتتايتىن نارىعى تارىلىپ بارادى

استانا. KAZINFORM - قازاقستاننىڭ قاڭتار- تامىز ايلارىنداعى بيداي ەكسپورتى 3,13 ميلليون توننانى قۇرادى. بۇل تۋرالى ۇكىمەت وتىرىسىندا ساۋدا جانە ينتەگراتسيا ۆيتسە-ءمينيسترى قايرات تورەبايەۆ ايتتى.

«2024 -جىلى الەمدىك بيداي نارىعىندا ءبىرقاتار وزگەرىستەر كۇتىلۋدە. ساراپشىلار ەۋروپا، وڭتۇستىك افريكا جانە ۋكراينادا اۋا-رايىنىڭ قولايسىزدىعى سەبەبىنەن بيداي ءوندىرىسى تومەندەيدى دەپ بولجايدى. سونىمەن قاتار، رەسەيدىڭ بيداي بويىنشا ەكسپورتتىق الەۋەتى 2024-2025 -جىلدارى 53 ميلليون توننا كولەمىندە بولادى. بۇل وتكەن ماۋسىممەن سالىستىرعاندا 10,1 پايىزعا از. قازاقستاننىڭ قاڭتار- تامىز ايلارىنداعى بيداي ەكسپورتى 3,13 ميلليون توننا قۇرادى. بۇل وتكەن جىلعى كورسەتكىشتەن 39,2 پايىزعا تومەندەگەن»، - دەدى ول.

ونىڭ اتاپ وتۋىنشە، استىق ەكسپورتىنىڭ تومەندەۋ سەبەبى وتكەن جىلعى ءونىمنىڭ ازدىعى جانە ءداستۇرلى ەكسپورتتىق نارىقتاردا باسەكەلەستىكتىڭ كۇشەيۋى بولىپ تۇر.

«سونداي-اق ءبىز بيداي ەكسپورتتىق نارىقتارىنىڭ گەوگرافياسىنىڭ تارىلۋىن بايقاپ وتىرمىز. نەگىزگى ەكسپورتتىق نارىقتار - يتاليا، تۇركمەنستان جانە اۋعانستان، رەسەي قازاقستاننىڭ بيدايىن تۇتىنۋدى بىرنەشە ەسەگە ازايتتى. بۇل ەكسپورتتىق باعالاردىڭ دەمپينگىمەن بايلانىستى. ول قازاقستان بيدايىنىڭ ورتالىق ازياداعى نەگىزگى ەكسپورتتىق نارىقتارعا اۋىسۋىنا سەبەپ»، - دەدى ۆيتسە-مينيستر.

اۆتور
مارلان جيەمباي