قازاقستاننىڭ اقىلى جولدارىندا كىمدەر تەگىن جۇرە الادى

استانا. KAZINFORM - جەڭىلدىك ساناتىنداعى كولىك قۇرالدارى تىزىمىنە مەملەكەتتىك جانە ناقتى ءبىر اۋدانداردا تىركەلگەن ازاماتتىق كولىك قۇرالدارى كىرەدى، دەپ حابارلايدى Kazinform اگەنتتىگىنىڭ ءتىلشىسى.

22-اقپاندا ق ر كولىك ءمينيسترىنىڭ «قوستاناي - رەسەي فەدەراتسياسى شەكاراسى (ترويتسك باعىتى) اۆتوموبيل جولىنىڭ رەسپۋبليكالىق ماڭىزى بار ۋچاسكەسىن اقىلى نەگىزدە پايدالانۋ تۋرالى» بۇيرىعى كۇشىنە ەندى.

- بۇل ۋچاسكە 2-جانە 3-تەحنيكالىق ساناتتاعى اقىلى جولعا جاتادى. الايدا جەڭىل اۆتوكولىكتەر جول ءجۇرۋ اقىسىنان بوساتىلادى، - دەپ ءتۇسىندىردى كولىك مينيسترلىگى.

سونىمەن بىرگە، ق ر «اۆتوموبيل جولدارى تۋرالى» زاڭىنىڭ 5-2-بابىنىڭ 1-تارماعىنا سايكەس، مىنا ساناتتاعى كولىكتەر اقىلى جولدارمەن تەگىن ءجۇرۋ قۇقىعىنا يە:

1. قىزمەتتىك مىندەتتەرىن اتقارۋ كەزىندەگى ارنايى اۆتوكولىكتەر:

* جەدەل مەديتسينالىق جاردەم كولىكتەرى؛

* اپاتتىق- قۇتقارۋ قىزمەتتەرىنىڭ اۆتوموبيلدەرى؛

* قۇقىق قورعاۋ ورگاندارىنىڭ كولىگى؛

* كولىك باقىلاۋ ورگاندارىنىڭ اۆتوكولىكتەرى؛

* ارنايى مەملەكەتتىك ورگانداردىڭ كولىگى؛

* ق ر قارۋلى كۇشتەرى، باسقا دا اسكەرلەر مەن اسكەري قۇرىلىمداردىڭ كولىگى.

2. جولداردى كۇتىپ ۇستاۋ مەن جولاۋشىلار تاسىمالىنا تارتىلعان كولىك قۇرالدارى:

* حالىقارالىق جانە رەسپۋبليكالىق ماڭىزى بار اقىلى جولداردى كۇتىپ-ۇستاۋمەن جانە تەحنيكالىق قىزمەت كورسەتۋمەن تىكەلەي اينالىساتىن ۇلتتىق وپەراتور كولىگى؛

* ق ر زاڭناماسىنا سايكەس، بەلگىلى ءبىر اقىلى ۋچاسكەنى كۇتىپ-ۇستاۋمەن اينالىساتىن كونتسەسسيونەر كولىگى؛

* جانۋارلار دۇنيەسىن قورعاۋ، ءوسىمىن مولايتۋ جانە پايدالانۋ جونىندەگى ۋاكىلەتتى ورگان كولىگى؛

* قالا ماڭىنداعى تۇراقتى جولاۋشىلار مەن جۇك تاسىمالدايتىن، سونداي-اق اقىلى جولعا جاقىن ورنالاسقان ەلدى مەكەندەردى اۋداندىق جانە وبلىستىق ورتالىقتارمەن، استانامەن نەمەسە رەسپۋبليكالىق ماڭىزى بار قالالارمەن بايلانىستىراتىن اۆتوبۋستار؛

* اقىلى جولعا ىرگەلەس اۋداندار اۋماعىندا تىركەلگەن، ءبىر اۋداننىڭ ىشىندە پايدالانىلاتىن اۆتوبۋستار؛

* جاقىن ورنالاسقان كولىك ايرىقتارى اراسىنداعى ۋچاسكەلەردە سۋ ايدىندارى مەن تەمىر جولداردى كەسىپ ءوتۋ ءۇشىن اقىلى جولداردى پايدالاناتىن جۇك كولىكتەرى، وزدىگىنەن جۇرەتىن اۋىل شارۋاشىلىعى ماشينالارى؛

* اقىلى تراسساعا ىرگەلەس اۋدانداردا تىركەلگەن جەكە جانە زاڭدى تۇلعالاردىڭ ءبىر اۋداننىڭ ىشىندە قوزعالۋىنا ارنالعان جەڭىل اۆتوموبيلدەرى.

3. ەكىنشى دۇنيەجۇزىلىك سوعىس ارداگەرلەرىنىڭ جەڭىل اۆتوموبيلدەرى

بۇعان دەيىن اۆتوبۋستاردا تەگىن جۇرۋگە، ءتولقۇجات پەن جەكە كۋالىكتى اقىسىز الۋعا كىمدەردىڭ قۇقىلى ەكەنىن، سونداي-اق قانداي ازاماتتار نوتاريۋس قىزمەتتەرىنە جەڭىلدىكتەردى پايدالانا الاتىنىن ايتقان ەدىك.