قازاقستاننىڭ 6 وبلىسىندا ۇسىك جۇرەدى - قازگيدرومەت

  استانا. KAZINFORM - «قازگيدرومەت» ر م ك- سى مامىردىڭ 5-كۇنگى كۇن رايى بولجامىن جاريالادى.

كاسىپورىن تاراتقان درەكتەرگە قاراعاندا، ەلىمىزدىڭ باسىم بولىگىندە اتموسفەرالىق فرونتالدى بولىكتەردىڭ وتۋىنە وراي كۇن قۇبىلمالى بولادى. ەلدىڭ باسىم بولىگىندە نايزاعاي ويناپ، جاڭبىر جاۋادى، تۇندە ەلدىڭ سولتۇستىگىندە جاۋىن -شاشىن (جاڭبىر، قار) بولادى، ەلدىڭ وڭتۇستىگىندە، كۇندىز ەلدىڭ وڭتۇستىك-شىعىسىندا قاتتى جاڭبىر جاۋۋى ىقتيمال.

ەلدىڭ باتىسىندا عانا كۇن جاۋىن-شاشىنسىز بولادى. رەسپۋبليكا بويىنشا جەل كۇشەيىپ، وڭتۇستىكتە، وڭتۇستىك-شىعىستا داۋىل تۇرىپ، وڭتۇستىك-شىعىستا بۇرشاق جاۋادى، سولتۇستىك-باتىستا، سولتۇستىكتە، وڭتۇستىك-باتىستا تۇمان تۇسەدى. تۇندە اقتوبە، قوستاناي وبلىستارىندا 1-6 گرادۋس ۇسىك جۇرەدى. باتىس قازاقستان وبلىسىنىڭ باتىسىندا، سولتۇستىگىندە 3 گرادۋس ۇسىك ساقتالادى، اتىراۋ وبلىسىنىڭ سولتۇستىگىندە، باتىسىندا، اقمولا وبلىسىنىڭ سولتۇستىگىندە 2 گرادۋس ۇسىك كۇتىلەدى، سولتۇستىك قازاقستان وبلىسىنىڭ باتىسىندا 3 گرادۋس ۇسىك كۇتىلەدى.

ماڭعىستاۋ وبلىسىنىڭ باسىم بولىگىندە، اتىراۋ وبلىسىنىڭ باتىسىندا، سولتۇستىگىندە، شىعىسىندا، قاراعاندى وبلىسىنىڭ باتىسىندا، وڭتۇستىگىندە، ورتالىعىندا، ۇلىتاۋ وبلىسىنىڭ شىعىسىندا، ورتالىعىندا، قىزىلوردا وبلىسىنىڭ وڭتۇستىگىندە، ورتالىعىندا اقتوبە، اباي وبلىستارىنىڭ وڭتۇستىگىندە جوعارى ءورت قاۋىپى ساقتالادى.