قازاقستاننىڭ 18 ميلليونىنشى تۇرعىنى مەكتەپكە بارۋعا دايىندالىپ ءجۇر
Kazinform حالىقارالىق اقپارات اگەنتتىگى ميلليوندىق مەجەنى باعىندىرعان قازاقستاندىقتار تۋرالى ماقالالار توپتاماسىن جالعاستىرادى. ەلىمىزدىڭ 18 ميلليونىنشى تۇرعىنى اتانعان ءمۇسليما سامات قىزى تالدىقورعان قالاسىندا دايارلىق سىنىبىنا بارىپ ءجۇر. ءبۇلدىرشىننىڭ اناسى ديانا ومارحانوۆا اگەنتتىككە ارنايى سۇحبات بەرىپ، ميلليوندىق بالانىڭ اتا-اناسى بولۋ ۇلكەن جاۋاپكەرشىلىك جۇكتەيتىنىن ايتىپ بەردى.
ءمۇسليما سامات قىزى 2017 -جىلى 11-مامىردا تالدىقورعان قالاسىندا دۇنيەگە كەلدى. وتباسىندا ەكىنشى بالا.
«قىزىمىز مەكتەپالدى دايارلىق توبىنا بارىپ ءجۇر. ءمۇسليما وتە زەرەك، وقۋعا ىنتاسى وتە جاقسى، ساباق وقىعاندى جاقسى كورەدى. قوسىمشا ۇيىرمەلەرگە بارادى. سۋرەت سالعاندى جاقسى كورەدى. كوركەم گيمناستيكامەن اينالىسادى. قالالىق بايقاۋلاردا ءتۇرلى ورىن الىپ ۇلگەردى. ازىرگە وسىنداي جەتىستىكتەرىمىز بار»، - دەيدى د. ومارحانوۆا.
سول كەزدەگى الماتى وبلىسىنىڭ اكىمى بولعان اماندىق باتالوۆ ءمۇسليمانىڭ وتباسىنا ءۇش بولمەلى پاتەر تارتۋ ەتكەن. قازىرگى ۋاقىتتا وتباسى وسى پاتەردە تۇرىپ جاتىر.
ءمۇسليمانىڭ اتا-اناسى تالدىقورعاننىڭ № 29-ورتا مەكتەبىندە جۇمىس ىستەيدى. اناسى دەفەكتولوگ، اكەسى - دەنە تاربيەسى ءپانىنىڭ ءمۇعالىمى.
كەيىپكەرىمىزدىڭ سۇلتان اتتى اعاسى، ءامينا دەگەن ءسىڭلىسى بار.
«ءۇش بالامىزدىڭ اراسىنداعى مىنەزى سالماقتى، بايسالدىسى وسى ءمۇسليما قىزىمىز. مىنەزى تۇيىقتاۋ، قىز بالاعا ءتان ۇياڭ قالپى بار. تۋعاندا كوپشىلىكتىڭ باتاسىن العان قىز، ءالى دە جاقسى يگى تىلەكتەر ەستىپ كەلە جاتىرمىز. اۋىلداعى اتا-اجەسىنىڭ تاريبەسىن، ءتالىمىن الىپ كەلەدى. وسىنىڭ ءبارى بالانىڭ مىنەزىنە ىقپال ەتەتىن شىعار. ءمۇسليما كىشكەنتاي بولسا دا، ارمانى وزىنەن ۇلكەن. ديزاينەر بولعىسى كەلەدى، كاسىپكەر بولامىن دەيدى. سۋرەتتى دە جاقسى سالادى، سۋرەتشى بولعىسى كەلەدى»، - دەيدى ديانا ومارحانوۆا.
سۇحبات سوڭىندا ءمۇسليمانىڭ اناسى 20 ميلليونىنشى بوپ تۋعان سابيلەردىڭ اتا-اناسى مەن تۇتاس قازاق حالقىن قۇتتىقتادى.
«بۇل - بارشا ەلىمىزدىڭ ورتاق قۋانىشى دەپ بىلەمىن. وسى ءساتتى پايدالانىپ، حالقىمىزدى بۇگىنگى جاقسى جاڭالىقپەن قۇتتىقتاعىم كەلەدى. ەلىمىزدىڭ بولاشاعى وسى ءوسىپ كەلە جاتقان بۇلدىرشىندەردىڭ قولىندا. ەلىمىزدىڭ دەموگرافياسى ءوسىپ-وركەندەي بەرسىن!»، - دەدى ول.
ايتا كەتەيىك، 14 قاراشا تاڭعى ساعات 8.10-دا تۋعان 5 بالا ەلىمىزدىڭ 20 ميلليونىنشى تۇرعىنى اتاندى.
قازاقستاننىڭ مەرەيلى ازاماتتارى ۇلىتاۋ، جەتىسۋ، اتىراۋ، اقمولا جانە تۇركىستان وبلىستارىندا دۇنيەگە كەلدى.
ال قازاقستاننىڭ 17 ميلليونىنشى تۇرعىنى التىنبەك ەسقارا 10 جاسقا تولدى، ول شىمكەنت قالاسىندا تۇرادى.
بۇعان دەيىن دەموگراف اياۋلىم ساعىنبايەۆا قازاقستانعا حالىق سانىنىڭ ءوسۋى نەلىكتەن ماڭىزدى ەكەنىن تۇسىندىرگەن ەدى.
اۆتور
ايجان سەرىكجان قىزى
