قازاقستاننىڭ 14 وڭىرىندە نەگىزگى ۇلتتىق ءبىرىڭعاي تەستىلەۋ باستالدى

استانا. KAZINFORM - بۇگىن ەلىمىزدىڭ 14 ايماعى ءۇشىن نەگىزگى ۇ ب ت باستالدى، تەستىلەۋ 5-شىلدەگە دەيىن جالعاسادى. ال سۋ تاسقىنى بولعان 6 وڭىردە ۇ ب ت 25-مامىردا باستالادى.

اتاپ ايتقاندا، توتەنشە جاعداي رەجيمى جاريالانعان اقمولا، اقتوبە، اتىراۋ، باتىس قازاقستان، قوستاناي، سولتۇستىك قازاقستان وبلىستارىندا تىركەلۋ ۋاقىتى 20-مامىرعا دەيىن ۇزارتىلدى، ۇ ب ت 25-مامىر مەن 12-شىلدە ارالىعىندا وتكىزىلەدى.

«وتكەن جىلمەن سالىستىرعاندا ۇ ب ت تاپسىرۋشىلار سانى 20 مىڭعا ارتقان، ونىڭ ءبىر سەبەبى - ەلىمىزدە دەموگرافيانىڭ ءوسۋى بولسا، ەكىنشى سەبەبى - جۇرتشىلىقتىڭ تەستىلەۋگە سەنىمىنىڭ ارتۋى. 2023 -جىلى 162 مىڭ تالاپكەر ۇ ب ت-نى 291 مىڭ رەت تاپسىرعان ەدى. ال بيىل 181 مىڭ تالاپكەر تەستىلەۋگە قاتىسۋعا نيەت بىلدىرگەن. ەكى مۇمكىندىكتى ەسەپكە العاندا، قازىرگى تاڭدا 330 مىڭعا جۋىق ءوتىنىش قابىلداندى»، - دەدى ق ر عىلىم جانە جوعارى ءبىلىم مينيسترلىگى ۇلتتىق تەستىلەۋ ورتالىعىنىڭ ديرەكتورى بولاتبەك ابدراسيلوۆ ورتالىق كوممۋنيكاتسيالار قىزمەتىندە.

ۇ ب ت جىلىنا 5 رەت وتكىزىلەدى: ءۇش رەت - اقىلى نەگىزدە. ال نەگىزگى ۇ ب ت نەگىزىندە تالاپكەرلەر گرانتتار بەرۋ كونكۋرسىنا قاتىسۋ مۇمكىندىگىنە يە بولادى.

«ءبىر مەزگىلدە 5172 كومپيۋتەر تەستىلەۋدى وتكىزۋگە مۇمكىندىك بەرەدى. سوڭعى جىلدارى ۇ ب ت ەلەكتروندى فورماتتا وتكىزىلەدى. بۇل تۇلەكتەرگە تەستىلەۋ ناتيجەسىن بىردەن الۋعا مۇمكىندىك بەرەدى»، - دەدى سپيكەر.

تالاپكەرلەردىڭ باسىم بولىگى - %75 ى ەمتيحاندى قازاق تىلىندە تاپسىرۋدى تاڭداعان. %25 عا جۋىق تەستىلەنۋشى ورىس ءتىلىن، 221 ادام اعىلشىن تىلىندە تەست تاپسىرۋدى ۇيعارعان.

اۆتور
ايجان سەرىكجان قىزى