قازاقستاننان پاريجگە قالاي جەتۋگە بولادى

استانا. KAZINFORM - قازىر فرانسيا استاناسى پاريج الەم نازارىندا. بۇگىن XXXIII جازعى وليمپيادانىڭ الاۋى تۇتانادى. بۇگىندە سپورت سۇيەر قاۋىم فرانسيا استاناسىنا اعىلىپ جاتقان شىعار. وسى ورايدا ەلىمىزدىڭ كولىك مينيسترلىگىنەن پاريجگە جەتۋدىڭ جولىن سۇراعان ەدىك.

«قازاقستان مەن فرانسيا ارالىعىندا قولدانىستاعى نورماتيۆتىك - قۇقىقتىق بازاعا سايكەس ءار تاراپتان اپتاسىنا ءۇش رەت تۇراقتى رەيستى ورىنداۋ رۇقسات ەتىلگەن. وسىلايشا، 2015 -جىلدان باستاپ «Air Astana» كومپانياسى COVID-19 پاندەمياسى باستالعانعا دەيىن (2020 -جىل) «استانا - پاريج» باعىتى بويىنشا تىكەلەي اۋە رەيستەرىن ورىندادى»، - دەلىنگەن مينيسترلىك بەرگەن جاۋاپتا.

كولىك مينيسترلىگىنىڭ مالىمەتىنشە، قازىر ەلىمىزدەن پاريجگە تىكەلەي اۋە رەيسى قاتىنامايدى، ءبىراق قازاقستاندىقتار ەۋروپا قالالارى ارقىلى جەتە الادى.

اتاپ ايتقاندا، لوندون ( ۇلى بريتانيا)، فرانكفۋرت (گەرمانيا)، پراگا (چەحيا)، ميلان (يتاليا)، ۆارشاۆا (پولشا)، ىستامبۇل، انكارا (تۇركيا) ارقىلى جازعى وليمپيادا شاھارىنا ۇشىپ بارۋعا بولادى.

«بۇگىندە 2 قازاقستاندىق («Air Astana»  «SCAT») جانە 5 شەتەلدىك اۋە كومپانياسى («Lufthansa» ،«LOT Polish Airlines»  «NEOS»  «Turkish Airlines»  «Pegasus Airlines») ەۋروپانىڭ 6 ەلىنە اپتاسىنا 114 رەيس جيىلىگىمەن 17 باعىت بويىنشا جولاۋشىلاردى تاسىمالدايدى»، - دەيدى ۆەدومستۆودان.

سونداي-اق، مينيسترلىكتەن قازاقستان رەسپۋبليكاسىندا الەمدىك تاجىريبەگە سايكەس اۋە كولىگىنىڭ باعاسى مەملەكەت تاراپىنان رەتتەلمەيتىندىگى حابارلاندى.

ايتا كەتەيىك، ساناۋلى ساعاتتان سوڭ پاريج-2024 وليمپياداسى سالتاناتتى تۇردە اشىلادى.

Jibek Joly تەلەارناسى ەلوردا تۇرعىندارى مەن قوناقتارى ءۇشىن ورتالىق ساياباقتا پاريج وليمپياداسىنىڭ اشىلۋ سالتاناتىن تىكەلەي ەفيردە، اشىق اسپان استىندا تاماشالاۋدى ۇسىنادى.

اۆتور
داۋلەت ىزتىلەۋ