قازاقستاننان 8-9-عاسىرعا تيەسىلى كونە تۇركى ەسكەرتكىشى تابىلدى
التاي ايماعىنىڭ ارحەولوگتارى «ۇلى التاي - تۇركى مۇراسى: سەنتەلەك-2023» سولتۇستىك التايدىڭ تۇركى ەسكەرتكىشتەرىن زەرتتەۋ جونىندەگى حالىقارالىق ارحەولوگيالىق ەكسپەديتسياسى اياسىندا قازاقستاننان بەلگىسىز تۇركى مەموريالدىق ەسكەرتكىشىن تاپتى. اتالعان مۇرا VIII-IX عاسىرلارعا تيەسىلى. بۇل تۋرالى ت ا س س اگەنتتىگىنە رەسەيدىڭ التاي مەملەكەتتىك ۋنيۆەرسيتەتىنىڭ «ۇلكەن التاي» التايتانۋ جانە تۇركىتانۋ عىلىمي-ءبىلىم بەرۋ ورتالىعى باسشىسىنىڭ ورىنباسارى سەرگەي گرۋشين مالىمدەدى، دەپ حابارلايدى Kazinform.
«وتكەن جىلى التاي مەملەكەتتىك ۋنيۆەرسيتەتىنىڭ ەكسپەديتسياسى جاڭا مەموريالدىق ورىندار - تۇركى قورشاۋلارىن انىقتادى. ولاردىڭ اراسىنان بەيمالىم كونە تۇركى ەسكەرتكىشى تابىلدى. وندا VIII- IX عاسىرلارداعى جاۋىنگەر بەينەلەنگەن. مۇنداي ەسكەرتكىشتەر تۇركى داۋىرىندە قايتىس بولعان جاۋىنگەردىڭ قۇرمەتىنە جاسالعان. مۇنداي نىساندار جەرلەۋمەن بايلانىستى ەمەس، ادەتتە ولار بولەك سالىنعان»، - دەدى سەرگەي گرۋشين.
سونىمەن، پروفەسسور گرۋشيننىڭ ايتۋىنشا، كەز كەلگەن تابىلعان زاتتى زەرتتەگەن قىزىق. ەندى قولدا بار زاتقا سالىستىرمالى تالداۋ جۇرگىزۋ جوسپارلانىپ وتىر. ونىڭ ايتۋىنشا، مەموريالدىق كەشەننەن بىرنەشە شاقىرىم جەردە ورتاعاسىرلىق كوشپەندىلەردىڭ ورىندارى تابىلعان.
19-20-قازاندا التاي مەملەكەتتىك ۋنيۆەرسيتەتى بازاسىندا بارناۋل قالاسىندا وتكەن «تاريحتاعى جانە قازىرگى زامانداعى سلاۆيان جانە تۇركى حالىقتارىنىڭ بىرلىگى» اتتى III حالىقارالىق التاي فورۋمىندا ارحەولوگتاردىڭ جۇمىسى ۇسىنىلدى.
