قازاقستاندىقتاردىڭ تۇرعىن ءۇي الۋعا كەزەگى جىلجۋى مۇمكىن
كەيبىر قازاقستاندىقتاردىڭ تۇرعىن ءۇي الۋعا كەزەگى جىلجۋى مۇمكىن.

ويتكەنى تالاپقا ساي كەلمەيتىن كانديداتتار تىزىمنەن شىعارىلادى، - دەپ حابارلايدى 24.kz.
ونەركاسىپ جانە قۇرىلىس مينيسترلىگى مالىمەتىنشە، كەزەكتەن 233 مىڭ ادام شىعارىلادى. كەيبىر كانديداتتار جەكە تۇرعىن ءۇي الىپ قويعان، ال باسقالارى قۇجات تاپسىرۋ كەزىندە قاتە جىبەرگەن. بۇگىنگە دەيىن اكىمدىك كەزەكتە تۇرعاندار تىزىمىنەن 10 مىڭ ادامدى شىعارىپ ۇلگەرگەن. ال كەيبىر قازاقستاندىقتار ارمان بولعان پاتەردى ءالى دە كۇتىپ ءجۇر، كەيبىرەۋلەرى 10 جىل نەمەسە ودان دا ۇزاق كۇتەدى.
«233 مىڭعا جۋىق ادامنىڭ ءوتىنىشى تالاپقا ساي كەلمەيتىندىكتەن، تىزىمنەن الىپ تاستالادى. اكىمدىك جۇمىستى باستاپ، 10 مىڭعا جۋىق ادامدى كەزەكتەن شىعارىپ ۇلگەردى. ءبىر كانديداتتى كەزەكتەن شىعارعان كەزدە، تيىسىنشە، كەلەسى تۇرعان ادامنىڭ كەزەگى العا جىلجيدى، ياعني ولار تەزىرەك باسپانا الادى»، - دەدى ونەركاسىپ جانە قۇرىلىس مينيسترلىگى كوميتەتى باسقارماسىنىڭ ساراپشىسى سامات بەكجىگىت.
مينيسترلىكتىڭ اقپاراتىنا سۇيەنسەك، كەيىنگى 10 جىلدا تۇرعىن ۇيگە كەزەكتە تۇرعاندار سانى التى ەسە ارتقان. بۇگىندە تىزىمدە 600 مىڭنان اسا ادام بار. بيلىك كەزەكتە تۇرعان، ءبىراق تالاپقا ساي كەلمەيتىن ادامداردىڭ ماسەلەسىن سيفرلاندىرۋ ارقىلى شەشكىسى كەلەدى.
«كەزەكتە تۇرعانداردى جەرگىلىكتى اتقارۋشى ورگانداردان «وتباسى بانكىنە» بەرگىمىز كەلەدى. بۇل كەزەكتە تۇرعان ءار ادام جەكە كابينەتى ارقىلى ەكىنشى تاراپتىڭ كومەگىنسىز كەزەگى قانداي ەكەنىن كورۋىنە كومەكتەسەدى. حالىق تۇرعىن ءۇيدى ءبولۋ كەزىندە زاڭبۇزۋشىلىق تىركەلدى دەگەن جاعدايلار بولعاندىقتان، جەرگىلىكتى تۇرعىن ءۇي كوميسسياسىن الىپ تاستايمىز»، - دەدى ءماجىلىس دەپۋتاتى لۇقبەك تۋماشينوۆ.
ايتا كەتەيىك، مەملەكەت جىل سايىن مۇقتاج جاندارعا 25 مىڭعا جۋىق پاتەردى جالعا جانە نەسيەگە بەرەدى. سونىمەن قاتار، تامىزدا وسى سالاعا جاۋاپتى مينيسترلىك (ول كەزدە ي ي د م - ەسك.) تۇرعىن ءۇي كەزەگىنەن شىعارىلۋى مۇمكىن ادامدار اراسىندا ءوز باسپاناسى بارلار بولعانىن، تىركەلگەن جەرى ولار كەزەكتە تۇرعان وڭىرمەن سايكەس كەلمەيتىنىن، تىركەۋسىز نەمەسە قازاقستان ازاماتتىعى جوق ادامدار، قايتىس بولعاندار بار ەكەنىن حابارلاعان ەدى.