قازاقستاندىقتاردىڭ بانكتەرگە بەرەشەگى قانشا؟
قازاقستاندىقتاردىڭ بانككە بەرەشەگى 24 تريلليون تەڭگەدەن اسقان، ال قارىزى ءبىر جىلدا 22,9 پايىزعا ارتقان، - دەپ حابارلايدى ك ت ك تەلەارناسى.

باسپاناعا، وقۋعا، ءۇي جوندەۋگە...
1-قاڭتارداعى مالىمەت بويىنشا جەكە تۇلعالاردىڭ بانككە بەرەشەگى 24 تريلليون تەڭگەدەن اسقان. جۇرتتىڭ قارىزى تەك ءبىر جىل ىشىندە 22,9 پايىزعا ارتقان.
سونىڭ ىشىندە كەپىلسىز نەسيە جانە يپوتەكا دەپ ءبولىپ قاراساق، وقۋعا، ءۇي جوندەۋگە اقشالاي نەمەسە تۇرمىستىق تەحنيكانى ءبولىپ تولەۋگە كەپىلسىز اقشا العانداردىڭ سانى 8 ميلليوننان اسىپ كەتكەن. ال ونىڭ ءوسىمى 23 پايىزعا جەتىپ، 12 تريلليون تەڭگەگە جاقىنداعان. باسپانالى بولامىن دەگەن جۇرتتىڭ قارىزى ءبىر جىلدا 14 پايىزعا ءوسىپ، 6,7 تريلليون تەڭگە بولعان. ياعني ونىڭ جارتىسىنان كوبى 2023-2024 -جىلدارى الىنعان.
اۆتونەسيە بويىنشا ەسەپ قانداي؟
مالىمەتكە سۇيەنسەك، اۆتونەسيە دە كوش باسىندا. ەلىمىزدە 559 مىڭنان اسا ادام نەسيەگە كولىك العان. جالپى بەرەشەكتىڭ 45 پايىز ۇلەسى سولارعا تيەسىلى. اقشاعا شاققاندا 3,6 تريلليون تەڭگە. بۇل مالىمەتتەردى ءبىرىنشى كرەديتتىك بيۋرو ۇسىندى.
«قازاقستاندىقتاردىڭ بانكتەرگە بەرەشەگى - 24 تريلليون تەڭگە. ءبىر جىلدا جالپى قارىز سوماسى - %22,9، تۇتىنۋشى نەسيەلەرى - %22,9، يپوتەكالىق قارىز الۋشىلار %14,1 عا وسكەن، ال اۆتونەسيە بويىنشا بەرەشەك - %44,8»، - دەپ جازىلعان مالىمەتتە.