قازاقستاندىقتاردىڭ 73 پايىزى ەلىمىز دۇرىس باعىتتا دامىپ جاتىر دەپ سانايدى - ساۋالناما

قازاقستاننىڭ ستراتەگيالىق زەرتتەۋلەر ينستيتۋتى جۇرگىزگەن ساۋالناما ناتيجەسىنە سايكەس، ازاماتتاردىڭ 73,3 پايىزى ەلىمىز دۇرىس باعىتتا دامىپ كەلەدى دەپ ەسەپتەيدى.

مەملەكەتتىك باستامالاردى قولداۋدىڭ ەڭ جوعارى دەڭگەيى جاستار اراسىندا - 18-29 جاس ارالىعىنداعى رەسپوندەنتتەردىڭ %82 ى قولداعان. ءبىر قىزىعى، ەرلەرگە (%71,1) قاراعاندا ايەلدەر ەلدىڭ دامۋىنا (%75,3) وپتيميستىك كوزقاراس ءبىلدىرىپ وتىر.

- قوعامدىق كوڭىل-كۇيدىڭ ماڭىزدى كورسەتكىشى - حالىقتىڭ ەل پرەزيدەنتىنە دەگەن سەنىمى. قوعامدىق پىكىردى زەرتتەۋ ناتيجەسى بويىنشا ەل حالقىنىڭ %76,4 مەملەكەت باسشىسىنا سەنىم ءبىلدىردى. پرەزيدەنتكە دەگەن سەنىمنىڭ جوعارى دەڭگەيى جاستار اراسىندا - %84,6، ايەلدەر اراسىندا - %78,1 (ەرلەردە - %74,5) بايقالدى. اۋىل جانە قالا تۇرعىندارىنىڭ سەنىم دەڭگەيىندە ەلەۋلى ايىرماشىلىق بايقالمايدى، تيىسىنشە %76,8 جانە %76,1، - دەلىنگەن قازاقستاننىڭ ستراتەگيالىق زەرتتەۋلەر ينستيتۋتى حابارلاماسىندا.

بۇل رەتتە رەسپوندەنتتەردىڭ جارتىسىنان استامى - %60,8 ەلدىڭ الداعى بەس جىلداعى دامۋ بولاشاعىن «وتە دۇرىس» جانە «ەداۋىر دۇرىس» دەپ باعالايدى.

بۇل الەۋمەتتىك وپتيميزم ومىرگە قاناعاتتانۋ سياقتى قوعامدىق كوڭىل-كۇيدىڭ كورسەتكىشىندە دە كورىنەدى. «جالپى، ءسىز ءوز ومىرىڭىزگە قانشالىقتى قاناعاتتاناسىز؟» دەگەن سۇراققا رەسپوندەنتتەردىڭ %57,3 ى «تولىعىمەن قاناعاتتانامىن» دەپ ەسەپتەسە، %32,8 ى «ەداۋىر قاناعاتتانامىن» دەپ جاۋاپ بەرگەن.

سونداي-اق رەسپوندەنتتەر ەلدىڭ ساياساتى، ەكونوميكاسى جانە قوعامدىق ءومىرى تۋرالى اقپاراتتى جەلىلىك ب ا ق-تان (%30,3) جانە الەۋمەتتىك جەلىلەردەن (%34,7) العاندى ءجون كورەتىنىن اتاپ ءوتتى.

18 جاستان اسقان 8 مىڭ رەسپوندەنت قاتىسقان زەرتتەۋ 17 وبلىس پەن رەسپۋبليكالىق ماڭىزى بار 3 قالانى قامتىدى. ساۋالناما 2025 -جىلدىڭ 20-ناۋرىزى مەن 20-ءساۋىرى ارالىعىندا حالىقتىڭ الەۋمەتتىك-دەموگرافيالىق قۇرىلىمىن كورسەتەتىن ىرىكتەۋ بويىنشا جەكە سۇحباتتاردى (CAPI) پايدالانا وتىرىپ جۇرگىزىلدى.

ايتا كەتەلىك وقۋشىنىڭ كىتاپتى قانشالىقتى ءجيى اشاتىنىن ساۋالناما ارقىلى انىقتاۋعا بولادى.