قازاقستاندىقتاردى 1-قازاننان باستاپ قانداي وزگەرىستەر كۇتىپ تۇر
استانا. KAZINFORM - بۇگىننەن باستاپ ەلىمىزدە كەلەر جىلعى كوكتەمگى ەگىس جۇمىستارىن قارجىلاندىرۋعا ءوتىنىم قابىلداۋ ەرتە باستالىپ، «وتباسى بانك» باسپانانى جالعا الۋ جانە يپوتەكا تولەمدەرىن ونلاين قابىلداۋدى شەكتەمەك.
«كەڭ دالا 2» باعدارلاماسىنا ءوتىنىم قابىلداۋ باستالدى
ەستە بولسا، مەملەكەت باسشىسى قاسىم-جومارت توقايەۆ ۇكىمەت پەن قارجى ينستيتۋتتارىنىڭ الدىنا كوكتەمگى ەگىس جۇمىستارىن ۋاقىتىندا قولعا الۋ تۋرالى مىندەت قويعان بولاتىن. وسى تاپسىرمانى جۇزەگە اسىرۋ جانە قولداۋ شارالارىن جەتىلدىرۋ بويىنشا جۇيەلى جۇمىستار اياسىندا بيىل «كەڭ دالا 2» باعدارلاماسىنا ءوتىنىم قابىلداۋ 2025 -جىلعى 1-قازاننان باستالادى.
اۋىل شارۋاشىلىعى مينيسترلىگى مالىمەتىنشە، باستى ماقسات - اۋىل شارۋاشىلىعى وكىلدەرىن الدىن الا قارجىلاندىرۋ. بۇل جاڭا اۋىل شارۋاشىلىعى ماۋسىمىنا تياناقتى دايىندالۋعا، جانار-جاعارمايدى قولايلى باعامەن ساتىپ الۋعا، تىڭايتقىش الۋعا، تەحنيكانى جوندەۋدەن وتكىزۋگە جانە قاجەتتى تۇقىم قورىن قالىپتاستىرۋعا جول اشادى.
ءدال وسى كەزەڭدەگى قارجىلاي قولداۋ ەگىس ناۋقانىن تابىستى وتكىزۋ ءۇشىن شەشۋشى فاكتور سانالادى. ەرتە قارجىلاندىرۋ تەتىگى 2024 -جىلدىڭ قاراشا ايىنىڭ سوڭىندا ىسكە قوسىلىپ، بىردەن جوعارى سۇرانىسقا يە بولدى.
باعدارلاما شەڭبەرىندە جىلدىق 5 پايىز جەڭىلدەتىلگەن سىياقى مولشەرلەمەسى ۇسىنىلادى. وسى ورايدا، كەپىل مۇلىك ماسەلەلەسىن شەشۋدىڭ دە ءتيىمدى جولى قاراستىرىلعان، ياعني قاجەت بولعان جاعدايدا، قارىز سوماسىنىڭ 85 پايىزىنا دەيىن «دامۋ» قورىنىڭ كەپىلدىگىمەن قامتىلۋى مۇمكىن.
قارجىلاندىرۋ رەسپۋبليكا بويىنشا «اگرارلىق نەسيە كورپوراتسياسى» ا ق-نىڭ اۋقىمدى فيليالدىق جەلىسى جانە سەرىكتەس قارجى ينستيتۋتتارى ارقىلى جۇزەگە اسىرىلادى. جۇيەلى جۇمىس قولداۋ كولەمىنىڭ تۇراقتى ءوسۋىن قامتاماسىز ەتىپ وتىر.
ەگەر 2022 -جىلى «كەڭ دالا» باعدارلاماسىنا 140 ميلليارد تەڭگە بولىنگەن بولسا، بيىل 700 ميلليارد تەڭگە جوسپارلانعان. ونىڭ 500 ميلليارد تەڭگەدەن استامى قازىردىڭ وزىندە يگەرىلدى. بۇل اگرارلىق سالانى قولداۋدىڭ جۇيەلى قادامدارى جىل سايىن ارتىپ كەلە جاتقانىن كورسەتەدى.
«كەڭ دالا 2» باعدارلاماسىنا قاتىسۋعا ءوتىنىم بەرۋ ءۇشىن سالا وكىلدەرى «اگرارلىق نەسيە كورپوراتسياسى» ا ق-نىڭ ايماقتىق فيليالدارىنا جۇگىنە الادى. تولىق اقپاراتتى اgrocredit.kz سايتىنان جانە Call-ورتالىقتىڭ بايلانىس نومىرلەرى بويىنشا الۋعا بولادى.
«وتباسى بانك» كەي قىزمەتىن وفلاين كورسەتەدى
بانك تۇرعىن ءۇي تولەمدەرىن تۇرعىن ءۇيدى جالعا بەرۋگە جانە باسقا ەكىنشى دەڭگەيدەگى بانكتەردەگى يپوتەكالىق قارىزداردى وتەۋگە اۋدارۋ وپەراتسيالارى بويىنشا پروتسەستى وڭتايلاندىرىپ جاتىر. وسىعان وراي بۇگىننەن باستاپ بۇل وپەراتسيالار موبيلدى قوسىمشادا قولجەتىمسىز بولادى. ونى بانك بولىمشەلەرىندە جانە باسپانا ماركەت (otbasybank.kz) پورتالىنداعى جەكە كابينەت ارقىلى ءتيىستى قۇجاتتار توپتاماسىن ۇسىنا وتىرىپ جۇزەگە اسىرۋعا بولادى. باسپانا ماركەت پورتالىنداعى جەكە كابينەتتە وپەراتسيالار جۇرگىزۋ كەزىندە دەرەكتەردى وڭدەۋ مەرزىمى - 3 جۇمىس كۇنى.
بۇل رەتتە تۇرعىن ءۇيدى جالعا الۋ ءۇشىن جالعا بەرۋشىنىڭ دەرەكتەمەلەرى كورسەتىلگەن جالداۋ شارتى قاجەت.
ال ەكىنشى دەڭگەيلى بانكتەردەگى يپوتەكالىق قارىزدى وتەۋ ءۇشىن مىناداي قۇجاتتار قاجەت:
جىلجىمايتىن مۇلىكتى ساتىپ الۋ-ساتۋ شارتى (قارىز شارتىندا/نەسيە شارتىندا جىلجىمايتىن مۇلىك يەسى تۋرالى مالىمەتتەر بولماعان كەزدە ۇسىنىلادى)؛
بانكتىك قارىز شارتىنىڭ / قارجى ۇيىمىمەن قارىز شارتىنىڭ ءتۇپنۇسقاسى؛
قارىز بويىنشا تولەمدەر كەستەسى؛
ە د ب/قارجى ۇيىمىنىڭ نەمەسە وزگە قارىز بەرۋشىنىڭ (زاڭدى تۇلعانىڭ) قارىز الۋشىنىڭ بەرەشەگىنىڭ بولۋى مەن جاي-كۇيى تۋرالى انىقتاماسى.
ەلوردادا تۇماۋعا قارسى كۇرەس باستالدى
بۇگىننەن باستاپ ەلوردادا ماۋسىمدىق تۇماۋعا قارسى يممۋنداۋ ءۇشىن رەسەيدە وندىرىلگەن «گريپپول+» ۆاكسيناسىن ەگۋ باستالدى. قالا مۇنداي ۆاكسينانى 145 مىڭ دوزاسىن ساتىپ الۋعا جەرگىلىكتى بيۋدجەتتەن قارجى ءبولىندى. ەل ۇكىمەتىنىڭ 2020 -جىلعى 24-قىركۇيەكتەگى №612-قاۋلىسىنا سايكەس، ۆاكسيناتسيا تاۋەكەل توبىنداعى ازاماتتارعا تەگىن جۇرگىزىلەدى. اتاپ ايتقاندا، ەكپە مىنا ساناتتارعا سالىنادى: مەديتسينا قىزمەتكەرلەرىنە، ديسپانسەرلىك ەسەپتەگى بالالارعا، بالالار ۇيلەرى مەن سابيلەر ءۇيىنىڭ تاربيەلەنۋشىلەرىنە، قارتتار ۇيىندەگى ادامدارعا، جۇكتىلىكتىڭ ەكىنشى جانە ءۇشىنشى تريمەسترىندەگى ايەلدەرگە، جۇرەك- قان تامىرلارى جانە تىنىس الۋ جۇيەسىنىڭ سوزىلمالى اۋرۋلارى بار ازاماتتارعا، مەكتەپ وقۋشىلارىنا، سونداي-اق ەپيدەميولوگيالىق كورسەتكىشتەر بويىنشا جابىق مەكەمەلەردىڭ كونتينگەنتىنە جانە وزگە دە ساناتتارعا.
جەكە تۇلعالاردىڭ مۇلىك سالىعىن تولەۋ مەرزىمى اياقتالدى
سالىق كودەكسىنە سايكەس، جەكە تۇلعالاردىڭ 2024 -جىلعا ارنالعان مۇلىك سالىعىن تولەۋ مەرزىمى - 2025 -جىلعى 1-قازانعا دەيىن. جەكە تۇلعالاردىڭ مۇلىك سالىعى «ازاماتتارعا ارنالعان ۇكىمەت» مەملەكەتتىك كورپوراتسياسىمەن انىقتالعان مۇلىك وبەكتىلەرىنىڭ قۇنى مەن مەنشىك قۇقىعىنداعى يەلەنۋ مەرزىمى نەگىزىندە ەسەپتەلەدى. سالىق اۆتوماتتى تۇردە ەسەپتەلىپ، 2025 -جىلعى ماۋسىم ايىندا مەنشىك يەلەرىنە حابارلانعان. اقپارات ەكىنشى دەڭگەيدەگى بانكتەردىڭ ءموبيلدى قوسىمشالارى، e-Salyq Azamat, eGov mobile ارقىلى push-حابارلامالار رەتىندە جىبەرىلدى.
2025 -جىلعى 2-قازاننان باستاپ سالىقتىق مىندەتتەمەسىن ۋاقىتىلى ورىنداماعان جەكە تۇلعالارعا سالىق بەرەشەگى تۋرالى حابارلاما جىبەرىلەدى. ەگەر بەرەشەك سوماسى 1 ا ە ك-تەن اساتىن بولسا، حابارلاما تابىستالعان كۇننەن باستاپ 30 جۇمىس كۇنىنەن كەيىن ماجبۇرلەپ ءوندىرىپ الۋ تۋرالى بۇيرىق شىعارىلادى جانە ول 5 جۇمىس كۇنى ىشىندە جەكە سوت ورىنداۋشىلارىنا جولدانادى.
مۇلىك سالىعىن ۋاقىتى تولەمەۋدىڭ مىناداي سالدارى بار:
بەرەشەك سوماسىنىڭ 25 پايىزىنا دەيىنگى ماجبۇرلەپ ءوندىرىپ الۋ الىمى؛
بانك شوتتارىنا تىيىم سالۋ؛
ەلدەن شىعۋعا شەكتەۋ قويۋ.
اۆتور
مارلان جيەمباي
