قازاقستاندىقتارعا ۇلتتىق قوردان 8 ميلليون دوللار تولەندى
استانا. KAZINFORM - «ب ج ز ق» ا ق «ۇلتتىق قور - بالالارعا» باعدارلاماسىنىڭ قاتىسۋشىلارىنا 8 ميلليوننان اسا ا ق ش دوللارىن اۋداردى. بۇل تۋرالى ب ج ز ق باسپا ءسوز قىزمەتى حابارلادى.
- 2025-جىلعى 1-ناۋرىزداعى جاعداي بويىنشا «ۇلتتىق قور - بالالارعا» باعدارلاماسى ىسكە قوسىلعان 2024-جىلدىڭ 1-اقپانىنان باستاپ «ب ج ز ق» ا ق 8 ميلليوننان اسا ا ق ش دوللارىنا 75329 ءوتىنىش ورىندادى (ءوتىنىش بەرۋشىلەردىڭ بانكتىك شوتتارىنا اۋدارۋ ءۇشىن ۋاكىلەتتى وپەراتورلارعا اۋدارىلدى). ونىڭ ىشىندە تۇرعىن ءۇي جاعدايلارىن جاقسارتۋ ماقساتىندا 4,65 ميلليوننان استام ا ق ش دوللارىنا 43781 ءوتىنىش، ءبىلىم الۋ اقىسىن تولەۋ ءۇشىن شامامەن 3,35 ميلليون ا ق ش دوللارىنا 31548 ءوتىنىش ورىندالدى. ەستەرىڭىزگە سالا كەتەيىك، نىسانالى جيناقتاردى الۋشى بارلىق سومانى نەمەسە ونىڭ ءبىر بولىگىن پايدالانۋعا قۇقىلى، اقشانىڭ پايدالانىلماعان قالدىعى نىسانالى جيناقتاۋ شوتىندا قالا بەرەدى، - دەلىنگەن ب ج ز ق حابارلاماسىندا.
تۇرعىن ءۇي جاعدايلارىن جاقسارتۋ اياسىندا قازاقستاندىقتار قارجىلارىن كوبىنەسە مىناداي ماقساتتا پايدالاندى:
ودان ءارى جيناقتاۋ ءۇشىن تۇرعىن ءۇي قۇرىلىسى جيناقتارىنداعى سالىمدى تولىقتىرۋ (4,53 ميلليوننان اسا ا ق ش دوللارىنا 42622 ءوتىنىش ورىندالدى)،
تۇرعىن ءۇي ساتىپ الۋعا يپوتەكالىق تۇرعىن ءۇي قارىزىن الۋ ءۇشىن باستاپقى جارنانى ەنگىزۋ - 37,44 مىڭنان اسا ا ق ش دوللارىنا 362 ءوتىنىش،
ازاماتتىق-قۇقىقتىق مامىلەلەر بويىنشا مەنشىككە تۇرعىن ءۇي ساتىپ الۋ (تۇپكىلىكتى ەسەپ ايىرىسۋ) - 32,81 مىڭنان اسا ا ق ش دوللارىنا 325 ءوتىنىش.
ءبىلىم الۋ اقىسىن تولەۋ بويىنشا ەڭ تانىمال قوسالقى ماقساتتار:
قازاقستان رەسپۋبليكاسىنىڭ اۋماعىندا ورنالاسقان ءبىلىم ۇيىمدارىنىڭ ءبىلىم بەرۋ قىزمەتتەرىنە ۇلەستەرمەن ء(اربىر اكادەميالىق كەزەڭ نەمەسە وقۋ جىلى ءۇشىن) نەمەسە ءبىر رەت تولىق كولەمدە (بۇكىل وقۋ مەرزىمى ءۇشىن) اقى تولەۋ (2,88 ميلليوننان اسا ا ق ش دوللارىنا 27020 ءوتىنىش ورىندالدى)،
ءبىلىم الۋ ءۇشىن جيناقتاۋ سالىمى تۋرالى شارت بويىنشا ءبىلىم الۋ جيناقتاۋ سالىمىن تولىقتىرۋ (354,24 مىڭنان اسا اقش دوللارىنا 3421 ءوتىنىش ورىندالدى)،
شەتەلدىك ءبىلىم بەرۋ ۇيىمدارىنىڭ وقىتۋ قىزمەتتەرىنە ۇلەستەرمەن (ءاربىر اكادەميالىق كەزەڭ نەمەسە وقۋ جىلى ءۇشىن) نەمەسە تولىق كولەمدە ءبىرجولعى (بۇكىل وقۋ مەرزىمى ءۇشىن) اقى تولەۋ (99,78 مىڭنان اسا ا ق ش دوللارىنا 971 ءوتىنىش ورىندالدى).
