قازاقستاندىقتارعا ەلەكتروندى كىتاپحانا قولجەتىمدى بولادى
استانا. KAZINFORM - قازاقستان كىتاپحانالارىنىڭ جيىنتىق ەلەكتروندىق كاتالوگى - ەلىمىزدەگى كىتاپحانالار قورى تۋرالى بيبليوگرافيالىق مالىمەتتەردى قامتيتىن ەلەكتروندىق اقپاراتتىق رەسۋرس.
مادەنيەت جانە اقپارات ءمينيسترىنىڭ 2025-جىلعى 31-ناۋرىزداعى بۇيرىعىمەن قازاقستان كىتاپحانالارىنىڭ جيىنتىق ەلەكتروندىق كاتالوگىن پايدالانۋ قاعيدالارى بەكىتىلدى.
قازاقستان كىتاپحانالارىنىڭ جيناقتالعان ەلەكتروندىق كاتالوگىن قۇرۋ جانە جۇرگىزۋ مەملەكەتتىك اقپاراتتىق جۇيە، ياعني «قازاقستاندىق ۇلتتىق ەلەكتروندىق كىتاپحانا» (قاز ۇ ە ك) پلاتفورماسىندا جۇزەگە اسىرىلادى. جيىنتىق ەلەكتروندىق كاتالوگ جەكە جانە زاڭدى تۇلعالارعا انىقتامالىق-بيبليوگرافيالىق قىزمەت كورسەتۋگە ارنالعان.
رەسپۋبليكا كىتاپحانالارى قورىنىڭ بيبليوگرافيالىق مالىمەتتەرى باسپا جانە قولجازبا قۇجاتتاردى، سونداي-اق گرافيكالىق جانە اۋديوۆيزۋالدى ماتەريالداردى ىزدەۋ ماقساتىندا سايكەستەندىرۋگە مۇمكىندىك بەرەتىن اقپاراتتاردى قامتيدى.
جيىنتىق ەلەكتروندىق كاتالوگتى پايدالانۋ «قازاقستاندىق ۇلتتىق ەلەكتروندىق كىتاپحانا» مەملەكەتتىك اقپاراتتىق جۇيەسى ارقىلى تىركەۋدەن ءوتىپ، پايدالانۋشى اۆتوريزاتسيادان وتكەننەن كەيىن جۇزەگە اسىرىلادى. كاتالوگتا ىزدەۋ تەگىن جۇرگىزىلەدى.
- رەسپۋبليكا كىتاپحانالارى قورلارى تۋرالى بيبليوگرافيالىق مالىمەتتەردى ىزدەۋ قۇجاتتىڭ ءتىلى بويىنشا جۇزەگە اسىرىلادى. سونداي-اق، پايدالانۋشىلارعا قۇجاتتى قور يەسىنىڭ ورنالاسقان جەرى بويىنشا تاڭداۋ مۇمكىندىگى بەرىلەدى. ىزدەۋ كىتاپ باسىلىمدارىنىڭ مىندەتتى شىعۋ دەرەكتەرى ەلەمەنتتەرى مەن تاقىرىپتىق سۇراۋلار بويىنشا جۇرگىزىلەدى، - دەلىنگەن بۇيرىق ماتىنىندە.
بۇيرىق بيىل 19-ساۋىردەن باستاپ كۇشىنە ەنەدى.
ايتا كەتسەك، جىل باسىندا مەملەكەتتىك كىتاپحانالاردا ءبىلىم بەرۋ جانە مادەني ءىس-شارالاردى اقىلى وتكىزۋ قۇقىعى بەرىلۋى مۇمكىندىگى تۋرالى حابارلاعان ەدىك.
