قازاقستاندىقتار ەتتى فەرمەرلەردەن تىكەلەي ونلاين ساتىپ الا الادى

استانا. KAZINFORM - اۋىل شارۋاشىلىعى مينيسترلىگى ەل تۇرعىندارىن فەرمەرلەردەن دەلدالسىز تىكەلەي ەت ساتىپ الۋ مۇمكىندىگىن جاساپ وتىر. جوبا جىل سوڭىندا قوسىلادى.

اڭگىمە 2023 -جىلى تانىستىرىلعان اۋىل شارۋاشىلىعى وندىرۋشىلەرىنە ارنالعان سيفرلىق قۇرال «Tört Tülik» موبيلدى قوسىمشاسىنىڭ دامۋىنا قاتىستى بولىپ وتىر.

بۇگىن ۇكىمەت وتىرىسىنان كەيىن وتكەن بريفينگىدە اۋىل شارۋاشىلىعى ءمينيسترى ايداربەك ساپاروۆ پلاتفورما جۇمىسىندا تەحنيكالىق اقاۋ مەن ماسەلەنىڭ بارىن ايتتى.

- جاڭا قوسىمشانى ۇيرەنۋگە ۋاقىت قاجەت ەكەنىن بىلەمىز. سوندىقتان بۇل جۇيە جۇمىس ىستەيتىن بولادى، ءبىرقاتار وزگەرىس ەنگىزدىك. ءقازىر جۇيە ءبىرشاما قالىپتى جۇمىس ىستەپ تۇر، - دەدى مينيستر.

ءمينيستردىڭ ورىنباسارى امانعالي بەرداليننىڭ ايتۋىنشا، «Tört Tülik» قوسىمشاسى ۇنەمى جەتىلدىرىلىپ جاتىر. جۇيە فەرمەرلەرگە مالدى تىركەۋدەن باستاپ، سويۋ الدىنداعى ۆەتەرينارلىق تەكسەرۋگە جانە انىقتاما الۋعا دەيىنگى بارلىق قىزمەتتى ونلاين الۋ ءۇشىن جاسالعان.

- قازىر كەيبىر كەمشىلىك بار، ءبىز ولارمەن جۇمىس ىستەپ جاتىرمىز، جۇيەنى ۇنەمى جەتىلدىرەمىز. بۇل جۇيە - ۆەتەريناريانىڭ بولاشاعى، جاقىن ارادا قالاعانىمىزداي جۇمىس ىستەيتىن بولادى، - دەپ تولىقتىردى امانعالي بەردالين.

تاعى ءبىر اۋىل شارۋاشىلىعى ۆيتسە-ءمينيسترى باعلان بەكباۋوۆتىڭ ايتۋىنشا، «Tört Tülik» قوسىمشاسى كەزەڭ-كەزەڭىمەن ەنگىزىلىپ جاتىر. العاشىندا قوسىمشا شارۋا يەلەرىنە قولجەتىمدى بولماق. ال ەكىنشى كەزەڭ، ياعني جىل سوڭىنا دەيىن پلاتفورما بارلىق قازاقستاندىق قولدانا الادى.

- قازىر موبيلدى قوسىمشا جەكە تۇلعالار ءۇشىن شەكتەۋلى. ەتتى ساتىپ الۋ ەكىنشى كەزەڭگە جوسپارلانعان. قازىر سول باعىتتا جۇمىس ىستەپ جاتىرمىز، جىل سوڭىنا دەيىن ەكىنشى كەزەڭدى تولىقتاي جۇزەگە اسىرىپ، ىسكە قوسۋدى جوسپارلاپ وتىرمىز، - دەدى باعلان بەكباۋوۆ.

ايتا كەتسەك، ەلىمىزدە ۆەتەريناريالىق قۇجاتى جوق مال ءونىمىن ساتقاندار قىلمىستىق جاۋاپكەرشىلىككە تارتىلۋى مۇمكىن.