قازاقستاندىقتار ەتكە قانشا اقشا جۇمسايدى

استانا. KAZINFORM - ءبىر توقساندا ەت جانە ەت ونىمدەرىن تۇتىنۋ ورتاشا ەسەپپەن ءبىر ادامعا 21 كەلىگە جەتتى، دەپ جازادى Finprom.kz.

بيىلعى جىلدىڭ ءۇشىنشى توقسانىندا قازاقستاندىقتاردىڭ ازىق-تۇلىك پەن الكوگولسىز سۋسىندارعا جۇمساعان شىعىنى ورتا ەسەپپەن جان باسىنا شاققاندا 135,2 مىڭ تەڭگەنى قۇرادى، بۇل 2023-جىلدىڭ سايكەس كەزەڭىمەن سالىستىرعاندا (126,6 مىڭ تەڭگە) 6,7 پايىزعا ارتىق.

اسىرەسە الماتى تۇرعىندارى ازىق-تۇلىككە كوپ اقشا جۇمسادى: ءۇشىنشى توقساندا جان باسىنا شاققاندا 186,7 مىڭ تەڭگە - ءبىر جىل بۇرىنعىدان 6,1 پايىزعا، ال رەسپۋبليكالىق كورسەتكىشتەن 38,1 پايىزعا ارتىق. استانا ەكىنشى ورىندا (160,4 مىڭ تەڭگە)، ءۇشىنشى ورىندا شىعىس قازاقستان وبلىسى (150,6 مىڭ تەڭگە) بولدى.

ازىق-تۇلىك پەن سۋسىندارعا ەڭ از شىعىن قىزىلوردا وبلىسىندا بەلگىلەن: جان باسىنا شاققاندا 104,6 مىڭ تەڭگە - وتكەن جىلمەن سالىستىرعاندا 9,5 پايىزعا كوپ، ءبىراق رەسپۋبليكالىق كورسەتكىشتەن 22,6 پايىزعا از. سەكتور بويىنشا شىعىنى ەڭ از ءۇش ايماققا تۇركىستان وبلىسى مەن شىمكەنت قالاسى دا كىردى.

ناقتى ازىق-تۇلىك تاۋارلارىنا كەلەتىن بولساق، قازاقستاندىقتاردىڭ بارلىق شىعىندارىنىڭ ۇشتەن ءبىر بولىگى (32,9 پايىز) ەت جانە ەت ونىمدەرىنە تيەسىلى: توقسانىنا ءبىر ادامعا 44,4 مىڭ تەڭگە. ءبىر جىل بۇرىن بۇل سوما 42,3 مىڭ تەڭگە بولاتىن.

باسقا ازىق-تۇلىكتەردەن:

نان جانە جارما ونىمدەرى - 20,5 مىڭ تەڭگە؛

ءسۇت ونىمدەرى - 14,6 مىڭ تەڭگە؛

جەمىستەر - 12,5 مىڭ تەڭگە؛

قانت، كونديتەرلىك جانە تاتتىلەر - 9,7 مىڭ تەڭگە.

قازاقستاندىقتار ورتاشا ەسەپپەن جان باسىنا شاققاندا كوكونىسكە 9,5 مىڭ تەڭگە، ماي مەن توڭ مايعا 7 مىڭ تەڭگە، بالىق پەن تەڭىز ونىمدەرىنە 5,7 مىڭ تەڭگە، جۇمىرتقاعا 2,9 مىڭ تەڭگە جۇمساعان. الكوگولسىز سۋسىندار بويىنشا شىعىندار 6,1 مىڭ تەڭگەنى قۇرادى.

بۇعان دەيىن جەلتوقسان ايىندا اۋىلشارۋاشىلىق جارمەڭكەلەرىنە ميلليونعا جۋىق ادام بارعانىن حابارلاعان بولاتىنبىز.

وسىعان دەيىن 10 جىلدا العاش رەت الەۋمەتتىك ماڭىزى بار ازىق-تۇلىك باعاسىنىڭ ءوسۋى باياۋلاعانى تۋرالى جازدىق.