قازاقستاندىقتار قاي ەلدەرگە ساياحاتتاعاندى ۇناتادى

استانا. KAZINFORM - وتكەن جىلى 1 ميلليوننان استام قازاقستان ازاماتى شەتەلگە ساياحاتتاعان. بۇل تۋرالى تۋريستىك قامقور قورىنىڭ ديرەكتورى اسىلحان ەسىلوۆ ايتتى.

- 2024 -جىلى رەكوردتىق كورسەتكىش تىركەلدى، اتاپ ايتقاندا 1 ميلليوننان استام قازاقستاندىق شەتەلگە دەمالۋعا شىققان. ادەتتەگىدەي العاشقى ورىندا تۇركيا تۇر، ەكىنشى ورىندا - مىسىر ەلى، ءۇشىنشى ورىندا - بىرىككەن اراب امىرلىگى. وسى ءۇش ەل سوڭعى بىرنەشە جىل الدىڭعى ۇشتىكتە تۇر. 2023 -جىلى 847 مىڭ ادام، 2022 -جىلى 769 مىڭ ادام شەتەلگە ساياحاتتاعان، - دەدى ول Jibek Joly ارناسىنداعى «بۇگىن Live» باعدارلاماسىندا.

سونداي-اق ول ەلىمىزدە شەتەلگە ساياحاتتاۋعا اتتانعان ازاماتتاردىڭ قۇقىعىن قورعايتىن جاڭا جۇيە جۇمىس ىستەيتىنىن اتاپ ءوتتى.

- قازىرگى تاڭدا اۋە كەمەسىن جالداۋشى 11، تۇراقتى رەيستەرمەن جۇمىس ىستەيتىن 55 تۋروپەراتور بار، ياعني جالپى سانى 66. تۋروپەراتورعا كەپىلدىك بەرۋ جۇيەسىنىڭ ەكى تالابى بار: ءبىرىنشى - بانكتىك كەپىلدىك، ەكىنشى - ءار تۋريسكە تۋركود بەرۋ مىندەتى. وتكەندە ەسكە الساق، 2011-2015 -جىلدار ارالىعىندا دەمالۋعا بارعان 20 مىڭنان استام قازاقستاندىق شەتەلدە قالىپ قويعان. ول كەزدە مەملەكەت قاراجات ءبولىپ، ولار ەلگە ورالدى. تۋركود - تۋريستىڭ قاۋىپسىزدىك كەپىلدىگى. بىرىنشىدەن، تۋروپەراتور بانكروتقا ۇشىراسا، ەكىنشىدەن، تۋروپەراتور ءوز مىندەتىن ورىنداماسا ول كۇشىنە ەنەدى. سولاي تۋريستىڭ قۇقىعىن قورعاۋعا كومەكتەسەدى، - دەدى اسىلحان ەسىلوۆ.

ايتا كەتەيىك، بۇعان دەيىن مەملەكەت باسشىسى تۋريزمنىڭ قارقىندى دامۋىنا جول اشاتىن باعىتتاردى اتاعان ەدى.

اۆتور

ەربول جانات