قازاقستاندىقتار ەندى SIM كارتانى تەك بايلانىس وپەراتورلارىنان عانا ساتىپ الا الادى
استانا. KAZINFORM - «بايلانىس قىزمەتتەرىن كورسەتۋ قاعيدالارىن بەكىتۋ تۋرالى» قازاقستان رەسپۋبليكاسى ينۆەستيتسيالار جانە دامۋ ءمينيسترىنىڭ مىندەتىن اتقارۋشىنىڭ 2015-جىلعى 24-اقپانداعى 171-بۇيرىعىنا وزگەرىستەر مەن تولىقتىرۋ ەنگىزىلدى.
«اشىق ن ق ا» پورتالىندا جاريالانعان جوبا سايكەستەندىرۋسىز تىركەلگەن قازاقستاندىق وپەراتورلاردىڭ SIM- كارتالارىن پايدالانا وتىرىپ جاسالاتىن ينتەرنەت-الاياقتىقتارمەن كۇرەسۋگە باعىتتالعان.
- ابونەنتتىك نومىرلەردىڭ تىركەلۋىن باقىلاۋدى كۇشەيتۋ جانە جەكە باسىن سايكەستەندىرۋ ءنومىرىنسىز SIM- كارتالاردى ساتۋعا شەكتەۋلەر ەنگىزۋ ۇسىنىلادى. تۇزەتۋلەر كۇشىنە ەنگەننەن كەيىن SIM- كارتالاردى ساتىپ الۋدى بايلانىس وپەراتورلارى جۇزەگە اسىرادى. بۇل الاياقتىق ارەكەتتەردىڭ سانىن ازايتۋعا مۇمكىندىك بەرەدى. ابونەنتتەردىڭ قاۋىپسىزدىگىن ارتتىرۋ جانە الاياقتىقپەن كۇرەسۋ ءۇشىن بايلانىس وپەراتورلارى ارنايى بايلانىس ورتالىعىن قۇرادى، وندا پايدالانۋشىلار الداۋ ارەكەتتەرى تۋرالى جەدەل حابارلاي الادى. مۇنداي شارا الاياقتىق ارەكەتتەردى تەز انىقتاۋعا، كۇدىكتى نومىرلەردى بۇعاتتاۋعا، قۇقىق قورعاۋ ورگاندارى ءۇشىن دەرەكتەردى جيناۋعا، سونداي-اق حالىقتىڭ سيفرلىق ساۋاتتىلىعىن جانە وپەراتورلاردىڭ قىزمەتتەرىنە دەگەن سەنىم دەڭگەيىن ارتتىرۋعا مۇمكىندىك بەرەدى، - دەلىنگەن قۇجاتتا.
ودان بولەك، جوبادا جازىلعانداي، قازاقستاندىق SIM- كارتالاردى، ونىڭ ىشىندە سوڭعى پايدالانۋشىنى سايكەستەندىرمەي ديستريبيۋتورلار مەن ديلەرلەرگە تىركەلگەن ينتەرنەت-الاياقتىقتار سانىنىڭ تۇراقتى وسۋىنە بايلانىستى زاڭناماعا وزگەرىستەر ەنگىزۋ قاجەتتىلىگى تۋىندايدى.
الاياقتار اۋىستىرۋعا بولاتىن جانە حالىقارالىق نومىرلەردى بەلسەندى قولدانادى، بۇل تەرگەۋدى قيىنداتادى جانە كىنالىلەردىڭ جازالانباي قالۋ ىقتيمالدىلىعىن ارتتىرادى. ۇسىنىلعان وزگەرىس ازاماتتاردى قورعاۋعا جانە ۇيالى بايلانىس ارقىلى جاسالاتىن قىلمىستاردى تەجەۋگە باعىتتالعان.
ابونەنت ۇيالى بايلانىس جەلىلەرىندەگى كۇدىكتى قوڭىراۋلار فاكتىسى بويىنشا ۇيالى بايلانىس وپەراتورىنىڭ اقپاراتتىق-انىقتامالىق قىزمەت كورسەتۋ جۇيەسىنە شاعىم تۇسىرەدى. ابونەنتتىك ءنومىردى تەكسەرگەننەن كەيىن ۇيالى بايلانىس وپەراتورى قاجەت بولعان جاعدايدا قوسىمشا مالىمەتتەر سۇراتادى. ابونەنتتىڭ شاعىمىندا كورسەتىلگەن فاكتىلەر راستالعان كەزدە ۇيالى بايلانىس وپەراتورى ابونەنتتىك ءنومىردى بۇعاتتايدى.
بۇيرىق جوباسى 2025-جىلعى 23-مامىرعا دەيىن قوعامدىق تالقىلاۋعا ۇسىنىلىپ وتىر.
ايتا كەتەيىك، بۇگىندە ەلىمىزدە ءبىر قولعا بەرىلەتىن SIM- كارتا سانىن شەكتەيتىن زاڭ ازىرلەنىپ جاتىر.
ەسكە سالساق، بيىل ناۋرىزدا 38 مىڭنان استام تىركەلمەگەن SIM- كارتا تاركىلەنگەنى تۋرالى حابارلاعان ەدىك.
سونداي-اق eGov پورتالىندا زاڭسىز تىركەلگەن SIM- كارتانى انىقتايتىن قىزمەت ىسكە قوسىلدى.
