قازاقستاندىقتار ەندى قىتاي شەكاراسىنان جاياۋ وتە الادى
استانا. قازاقپارات - اباي وبلىسىنداعى باقتى كەدەن بەكەتى ارقىلى جاياۋ جۇرگىنشىلەر قىتايعا وتە الادى.
«بۇل ەكى ەل اراسىنداعى بايلانىستى نىعايتىپ، ساياحاتشىلارعا قولايلى جاعداي جاساۋمەن قاتار ساۋدا اينالىمىن ارتتىرۋعا مۇمكىندىك بەرەدى»، - دەپ جازىلعان ءوڭىر اكىمدىگى حابارلاماسىندا.
سالتاناتتى اشىلۋ راسىمىنە ماقانشى اۋدانىنىڭ اكىمى داۋرەن قويگەلدين، اباي وبلىسى بويىنشا مەملەكەتتىك كىرىستەر دەپارتامەنتىنىڭ باسشىسى رۋسلان دانياروۆ، ق ر ۇ ق ك شەكارا قىزمەتى اباي وبلىسى بويىنشا دەپارتامەنتىنىڭ باستىعى، پولكوۆنيك اسحات احمەتوۆ قاتىستى. قىتاي تاراپىنان شينجاڭ- ۇيعىر اۆتونوميالىق اۋدانىنىڭ لاۋازىمدى وكىلدەرى قاتىستى.
باقتى كەدەن باقىلاۋ بەكەتىندەگى تەرمينالداردى قايتا جاڭعىرتۋ جۇمىسى اياقتالعانعا دەيىن تۋريستەر بەلگىلەنگەن ءتارتىپ بويىنشا قولدانىستاعى زاڭناماعا سايكەس قاتىنايدى.
سونداي-اق جولاۋشىلارعا ايىنا 1 رەت 25 كەلىگە دەيىن جۇك وتكىزۋگە رۇقسات ەتىلەدى. ال حالىقارالىق جولاۋشى تاسىمالداۋعا ارنايى رۇقساتى بار كولىكپەن عانا كىرىپ شىعا الادى.
