قازاقستاندىقتار لوندون مارافونىندا جۇگىردى
لوندون. KAZINFORM – ۇلى بريتانيا استاناسىندا لوندون مارافونى ءوتىپ، 160 قا جۋىق مەملەكەتتەن مىڭداعان ادام قاتىستى.
جەلاياقتاردىڭ اراسىندا ءبىر توپ قازاقستاندىق تا بار. مارە سىزىعىنا العاشقىلاردىڭ ءبىرى بولىپ جەتكەن وتانداستارىمىزبەن تۇماندى البيونداعى Kazinform ءتىلشىسى عالىمجان قارامان ۇلى سۇحباتتاستى.
جەلاياقتار كاسىبي، اۋەسقوي جانە مۇمكىندىگى شەكتەۋلى سپورتشىلار رەتىندە بىرنەشە توپقا ءبولىنىپ جارىستى. ولار بىرنەشە ساعاتتىڭ ىشىندە لوندوننىڭ كورنەكى ورىندارىنىڭ جانىنان جۇگىرىپ ءوتتى. كاسىبي جەلاياقتاردىڭ اراسىنان ەرلەردەن العاشقى بولىپ، كەنيالىق الەكساندر مۋتيسو مۋنو كەلدى. ايەلدەردەن ونىڭ جەرلەسى، قازىرگى وليمپيادا چەمپيونى پەرەس دجەپچيرچير توپ جارىپ، رەكورد ورناتتى.
اۋەسقوي سپورتشىلاردىڭ اراسىندا 30 عا جۋىق وتانداسىمىز دا بولدى. ارالارىندا الەمدەگى 6 ءىرى: بوستون، بەرلين، چيكاگو، نيۋ-يورك جانە توكيو مارافوندارىنا قاتىسىپ، ەندى مىنە لوندون كوشەلەرىمەن جۇگىرىپ وتكەن جەلاياقتار دا بار. كوپشىلىگى كاسىپكەرلەر. ويتكەنى ۇلى بريتانيا استاناسىنىڭ شىڭىن باعىندىرماس بۇرىن قىمبات ساياحات شىعىندارىن كوتەرە الۋلارى كەرەك.
«لوندون مارافونى وتە كەرەمەت ءوتتى. لوندون بولعان سوڭ ءبىز كىشكەنە جاڭبىر جاۋادى ما دەپ قورىقتىق. ءبىراق كۇن رايى بۇگىن كەرەمەت بولدى. كۇن ساۋلەسى شىعىپ، اۋا تەمپەراتۋراسى جىلى بولدى. جۇگىرۋگە وتە ىڭعايلى»، - دەيدى ورال قالاسىنان كەلگەن مارافونشى اسحات رامازانوۆ.
«35-شاقىرىمنان كەيىن قيىن بولدى. قارقىنىم باياۋلاپ، اياعىم تالا باستادى. نەگىزىندە، بۇل قالىپتى جاعداي. كەيبىر ادامدار، ءتىپتى، جاياۋ جۇرۋگە كوشتى. ءوز- ءوزىمدى جەڭىپ، سوڭعى 1,5 شاقىرىمدا جىلدامدىعىمدى ۇدەتتىم»، - دەيدى ورالدان كەلگەن تاعى ءبىر مارافونشى عاني سۇلتانوۆ.
لوندون مارافونىنا شەتەلدىكتەرگە تىركەلۋ وڭاي شارۋا ەمەس. جارىسقا قاتىسۋعا جىل سايىن جارتى ميلليوننان استام ادام نيەت بىلدىرەدى. لوتورەيادان ۇتقاندارى عانا 50 مىڭ جەلاياقتىڭ قاتارىنا قوسىلادى. قالعاندارى ليتسەنزياسى بار تۋروپەراتوردان ورىن ساتىپ الۋى كەرەك. قازاقستاندىقتاردىڭ كوپشىلىگى لوندونعا وتباسى مۇشەلەرىمەن بىرگە كەلگەن.
«وتباسىممەن كەلگەندەگى ماقساتىم ەڭ باستىسى بالا- شاعا وسكەننەن كەيىن اكەسى سياقتى جۇگىرسە ەكەن دەگەن وي. بولاشاقتا باسقا نارسەلەرگە ەمەس سپورتقا قىزىقسا ەكەن دەگەن ءۇمىت»، - دەيدى شىمكەنتتىك مارافونشى اسحات نۇرلىبايەۆ.
جۇگىرۋ تۋريزمىنە دەگەن سۇرانىس جىلدان جىلعا ارتىپ كەلەدى. بۇل - جاڭا قالانى كورىپ قانا قويماي، قۇندى تاجىريبە جيناۋعا دا مول مۇمكىندىك. مارافوندار، ءتىپتى، سولتۇستىك پوليۋستە دە ۇيىمداستىرىلادى. مەملەكەتتىڭ ەكونوميكالىق قۋاتىن كۇشەيتىپ، جالپى ىشكى ءونىمنىڭ ارتۋىنا سەبەپشى بولاتىن شارالاردى قازاقستاندا دا وتكىزۋگە بولادى، دەيدى ماماندار. اسىرەسە، ەلىمىزدىڭ تاۋلى ايماقتارىنا دەگەن سۇرانىس جوعارى.
«شەتەلدىكتەردىڭ قىزىعۋشىلىعى وتە جوعارى. ويتكەنى ولار ءبىزدىڭ تابيعاتقا قاتتى قىزىعادى. تۋريستەر جاڭا مەكەندەردى كورگىسى كەلەدى. ولار كوپ جەردە بولعان ادامدار عوي، نەگىزىندە. شەتەلدىكتەر، مىسالى، تاس جولدا وتەتىن مارافونداردىڭ بارلىعىن جۇگىرىپ قويعان. ولارعا قازاقستان تاۋلارىنا كەلىپ، جۇگىرۋ وتە قىزىق بولىپ تۇر»، - دەيدى تۋريستىك اگەنتتىك وكىلى جانات تۇرعىنبايەۆ.
لوندون مارافونى بيىل 42 جىل قاتارىنان ۇيىمداستىرىلىپ وتىر. ءتىپتى، پاندەميا كەزىندە دە توقتاتىلعان جوق - ۆيرتۋالدى فورماتتا ءوتتى. قايىرىمدىلىق ماقساتىندا جۇگىرەتىن جەلاياقتار جىل سايىن ونداعان ميلليون ستەرلينگ فۋنتىن جيناپ، ارنايى قورلارعا اۋدارادى.
