قازاقستاندىقتار ەكى جىلدا 447,3 ميلليارد تەڭگە ۋتيلالىم تولەگەن
استانا. KAZINFORM - «جاسىل دامۋ» ا ق مالىمەتى بويىنشا 2022-2023 -جىلدارى جينالعان ۋتيل الىمنىڭ جالپى سوماسى 447,3 ميلليارد تەڭگەگە جەتكەن.
ونىڭ ىشىندە كولىك قۇرالدارى مەن اۋىل شارۋاشىلىعى تەحنيكاسى ءۇشىن 426,49 ميلليارد تەڭگە تولەندى، بۇل جالپى ۋتيلالىمنىڭ %95. قالعان 20,8 ميلليارد تەڭگە - تاۋارلار مەن قاپتاما ءۇشىن الىنعان تولەم. سونداي-اق، تولەمدەردىڭ جارتىسىنا جۋىعى كولىك قۇرالدارىن يمپورتتاۋشىلاردان تۇسكەن (201,86 ميلليارد تەڭگە).
اۆتوموبيل نارىعىن مونيتورينگىلەۋ جانە تالداۋ اگەنتتىگىنىڭ ديرەكتورى ارتۋر ميسكارياننىڭ اتاپ وتۋىنشە، جينالعان ۋتيلالىم سوماسى (426,49 ميلليارد تەڭگە) 2022 جانە 2023 -جىلدى تولىق قامتىمايدى. اتالعان سوما وندىرىلگەن جانە يمپورتتالعان تەحنيكانىڭ سانىنا، سونداي-اق ستاۆكالاردىڭ مولشەرىنە تىكەلەي بايلانىستى.
سونىمەن قاتار، 2022 -جىلى ۋتيلالىمدى قابىلداۋ مەن اكىمشىلەندىرۋدە ءۇزىلىس بولدى، بۇل ءبىر جىلداعى قورىتىندى كورسەتكىشتەرگە اسەر ەتتى.
«وندىرۋشىلەر يمپورتتاۋشىلارمەن بىرگە ۋتيلالىمدى تولىق كولەمدە تولەيدى. سودان كەيىن ىنتالاندىرۋ ەرەجەلەرى بويىنشا ەنگىزىلگەن سومالار تەحنيكا وندىرۋشىلەرىنىڭ قارسى مىندەتتەمەلەرىن ساقتاۋ ورنىنا قايتارىلادى. تيىسىنشە، ۋتيلالىم سوماسى قازاقستاندا شىعارىلعان تەحنيكانىڭ باعاسىنا ەنگىزىلمەيدى. وسىلايشا، يمپورتتىق تەحنيكادان باعالىق ارتىقشىلىق قامتاماسىز ەتىلەدى جانە ەل ىشىندە ءوندىرىستى دامىتۋ ءۇشىن جاعدايلار جاسالادى»، - دەپ ءتۇسىندىردى ساراپشى.
سونداي- اق، مامان جينالعان ۋتيلالىم سوماسى بىرنەشە ەكولوگيالىق باعىتتار بويىنشا جۇمسالاتىندىعىنا بايلانىستى ەكولوگيالىق جاعدايدى جاقسارتۋ مۇمكىندىكتەرىنىڭ سپەكترى ستاۆكانىڭ مولشەرىنە بايلانىستى ەكەنىن ءمالىم ەتتى.
