قازاقستاندىقتار كاسپي قوسىمشاسى ارقىلى قىتايدا تولەم جاساي الادى

استانا. KAZINFORM - قازاقستاندىقتار ەندى Kaspi.kz موبيلدى قوسىمشاسى ارقىلى قىتايدا تولەم جاساي الادى.

Kaspi بانكتىڭ حابارلاۋىنشا، قىتايعا كەلگەندە قازاقستاندىقتارعا ەندى وزىمەن بىرگە قولما-قول اقشا نەمەسە كارتا الا كەلۋدىڭ قاجەتى جوق.

Kaspi.kz موبيلدى قوسىمشاسىنىڭ كومەگىمەن قىتايلىق دۇكەندەردە، كافەدە، تاكسيدە جانە قىتايداعى باسقا دا 80 ميلليوننان استام ورىندا ساتىپ الۋ اقىسىن QR-كود ارقىلى تولەۋگە بولادى.

Kaspi.kz باسشىسى ءارى نەگىزىن قالاۋشىلاردىڭ ءبىرى ميحايل لومتادزەنىڭ ايتۋىنشا، بانك قوسىمشاسى AliPay+ كومپانياسىمەن سەرىكتەستىك ورناتىپ، ءار قازاقستاندىق ءۇشىن جاڭا سەرۆيستى ىسكە قوسقان.

ەندى قازاقستاندىقتار Kaspi.kz موبيلدى قوسىمشاسىمەن قىتايداعى ساۋدا ورىندارىنداعى كەز كەلگەن تاۋار اقىسىن تولەي الادى.

قىتايداعى Ant International باس ديرەكتورى ۆەنەتسيا ليدىڭ ايتۋىنشا، بۇل سەرىكتەستىك قازاقستاندىقتار ءۇشىن قىتايداعى ساياحات پەن ساتىپ الۋ ساپاسىن جاقسارتادى.

ايتا كەتەيىك، AliPay - قىتايدا قولما- قول اقشاسىز تولەم جاساۋعا ارنالعان موبيلدى قوسىمشا.

اۆتور
مۇحتار قاليموللا ۇلى