قازاقستاندىقتار بۇگىن اسپاننان ەرەكشە مەتەورلىق قۇبىلىستى بايقاي الادى

استانا. قازاقپارات - قازاقستاندىقتار بۇگىن، ياعني 22-قازانعا قاراعان ءتۇنى كوكتەن «وريونيد» مەتەورلىق اعىنىن باقىلاي الادى.

وريونيدتار - ايگىلى گاللەي كومەتاسىنىڭ قالدىقتارىنان پايدا بولاتىن مەتەورلار. ولار جەردىڭ اتموسفەراسىنا ۇلكەن جىلدامدىقپەن كىرىپ، جارقىراپ، ەرەكشە كورىنەدى.

وريونيد مەتەور اعىنى جىل سايىن بايقالاتىن قۇبىلىس جانە بيىل ونىڭ ەڭ جوعارعى بەلسەندىلىك ۋاقىتى 21-22-قازان كۇندەرىنە تۋرا كەلەدى.

وسى كۇندەرى تۇندە ساعاتىنا 20 عا دەيىن مەتەور تۇسەدى دەپ بولجانىپ وتىر.

«وريونيدتەر باسقا مەتەور اعىندارىنىڭ اراسىندا وزدەرىنىڭ جارقىن وتتى شارلارىمەن ەرەكشەلەنەدى. ول سەكۋندىنا 65 شاقىرىم جىلدامدىقپەن قوزعالاتىن ۇلكەن مەتەورلاردان تۇرادى»، - دەلىنگەن حابارلامادا.

قازاقستاندىقتار ولاردى ءتۇن ورتاسىنا جاقىن جانە تاڭ اتقانعا دەيىن كورە الادى.

مەتەور اعىنىن كورۋ ءۇشىن وريون كوتەرىلەتىن شىعىس باعىتقا قاراي قاراپ، سونىمەن قاتار اسپانعا ءجيى نازار اۋدارۋ كەرەك. ويتكەنى مەتەورلار ءارتۇرلى باعىتتا ۇشادى - باتىس، سولتۇستىك، وڭتۇستىك جانە شىعىس.