قازاقستاندىقتار پاسپورتتى باستى بىرىكتىرۋشى سيمۆول دەپ سانايدى

استانا. KAZINFORM – ق ر پرەزيدەنتى جانىنداعى قازاقستاننىڭ ستراتەگيالىق زەرتتەۋلەر ينستيتۋتى اعىمداعى جىلدىڭ 11-مامىرى مەن 22-ماۋسىمى ارالىعىندا الەۋمەتتانۋلىق ساۋالناما جۇرگىزدى.

ىرىكتەمە كولەمى 8000 رەسپوندەنتتى قۇرايدى. ساۋالناماعا 17 وبلىس پەن رەسپۋبليكالىق ماڭىزى بار قالالار: استانا، الماتى جانە شىمكەنتتىڭ 18 جاستان اسقان رەسپوندەنتتەرى قاتىستى.

ساۋالناما بارىسىندا رەسپوندەنتتەرگە ۇلتتى بىرىكتىرەتىن نەگىزگى بەلگىلەردى انىقتاۋ ۇسىنىلدى. ءبىرىنشى كەزەكتە - بۇل پاسپورت، - رەسپوندەنتتەردىڭ 46 پايىزى ونى نەگىزگى بىرىكتىرۋشى فاكتور دەپ سانايدى. ەكىنشىدەن، بۇل قازاقستان جەرىندە تۋىلعانى جانە ورتاق اتا-بابالاردىڭ بولۋى (39,9 پايىز). سونداي-اق، ساۋالناماعا قاتىسقانداردىڭ ۇشتەن ءبىرى (32,0 پايىز) ۇلتتىڭ بىرىكتىرۋشى ەلەمەنتى رەتىندە ءتىلدىڭ ورتاقتىعىن كورسەتەدى.

ساۋالناماعا قاتىسقان ءاربىر بەسىنشى ادام (21,8 پايىز) ەلدىڭ جەتىستىكتەرى ءۇشىن ماقتانىش، پاتريوتيزم سەزىمى جانە بارشاعا ورتاق قۇندىلىقتار، نورمالار مەن مىنەز-قۇلىق (21,3 پايىز) ۇلتتى بىرىكتىرەدى دەپ سانايدى (جاۋاپتار سانى 100 پايىزدان اسادى، سەبەبى رەسپوندەنتتەرگە بىرنەشە جاۋاپ نۇسقاسىن تاڭداۋ بەرىلدى).

ال ءبىزدى ەلىمىزدىڭ ازاماتى ەتەتىن نە؟ رەسپوندەنتتەردىڭ باسىم كوپشىلىگى ازاماتتىلىقتىڭ ماڭىزدى كورىنىسى زاڭعا باعىنۋ، زاڭداردى ساقتاۋ دەپ سانايدى (ساۋالناماعا قاتىسقانداردىڭ 63,3 پايىز).

ەگەر ادامدار ورتاق، ۇقساس يدەالدارعا يە بولسا، كەز-كەلگەن قوعام ۇيلەسىمدى جانە ءبىرتۇتاس بولادى. قازاقستاندىقتار وتباسى (99,6 پايىز)، جۇمىس جانە ەڭبەك (92,9 پايىز) جانە دوستار (92,4 پايىز) سياقتى ۇعىمداردى ماڭىزدى دەپ ساناي وتىرىپ، ءبىراۋىزدىلىقتى كورسەتەدى.

ساۋالناماعا قاتىسقانداردىڭ كوپشىلىگىنىڭ پىكىرىنشە، قاجىرلى ەڭبەك ماراپاتتالۋى كەرەك: «تولىق كەلىسەمىن» جاۋابىن رەسپوندەنتتەردىڭ 66,2 پايىزى، «كەلىسەمىن» جاۋابىن 32,5 پايىزى تاڭداعان. سونىمەن قاتار قوعامدا پاتەرناليستىك ۇمىتتەر ساقتالىپ كەلەدى، رەسپوندەنتتەردىڭ 93,8 پايىزى ۇكىمەت ءاربىر ازامات ءۇشىن جاقسى ءومىر ءسۇرۋ دەڭگەيىن قامتاماسىز ەتۋى كەرەك دەپ سانايدى («تولىق كەلىسەمىن» - 53,8 پايىز، «كەلىسەمىن» - 40,0 پايىز).

ساۋالناما ناتيجەلەرى قازاقستاندىقتاردىڭ باسىم كوپشىلىگىنىڭ (91,2 پايىز) تۇسىنىگىندە عىلىم مەن تەحنولوگيا ءومىر ءسۇرۋ ساپاسىن جاقسارتۋدا شەشۋشى ءرول اتقاراتىنىن كورسەتەدى.

رەسپوندەنتتەردىڭ قۇندىلىقتارىن تالداۋ ەركىندىك قۇندىلىعىنىڭ تەڭدىككە قاراعاندا ارتىقشىلىعىن كورسەتەدى (62,9 پايىز جانە 33,8 پايىز). ال، قاۋىپسىزدىك ەركىندىكپەن سالىستىرعاندا ماڭىزدى قۇندىلىق رەتىندە قاراستىرىلادى (68,7 پايىز جانە 28,6 پايىز).

وسىلايشا، جيناقتالعان مالىمەتتەر ازاماتتاردىڭ قۇندىلىقتارىنىڭ بىرلىگىن، وتباسى، ەڭبەك جانە قاۋىپسىزدىك قۇندىلىقتارىنىڭ باسىمدىعىن كورسەتەدى.