قازاقستاندىقتار اراسىندا اتىس قارۋىنىڭ قاي تۇرىنە سۇرانىس جوعارى

استانا. KAZINFORM - قازاقستان زاڭدارى ءبىر وتباسىندا نەشە اتىس قارۋىن ساقتاۋعا رۇقسات بەرەدى؟ Kazinform ىشكى ىستەر مينيسترلىگىنە وسىنداي ساۋال جولدادى.

- زاڭدا ءبىر وتباسىنا قارۋ يەلەنۋ نورماسى قاراستىرىلمايدى. قارۋدى ساتىپ الۋ رۇقساتى جەكە تۇلعاعا بەرىلەدى.

«جەكەلەگەن قارۋ تۇرلەرىنىڭ اينالىمىنا مەملەكەتتىك باقىلاۋ جاساۋ تۋرالى» زاڭعا سايكەس قازاقستان رەسپۋبليكاسىنىڭ ازاماتى ساتىپ العان قارۋدىڭ جالپى سانى: اڭشىلىق ويىق ۇڭعىلى قارۋى - ەكى بىرلىكتەن؛ تەگىس ۇڭعىلى - ەكى بىرلىكتەن؛ ءوزىن-ءوزى قورعاۋ قارۋى، ونىڭ ىشىندە تەگىس ۇزىن ۇڭعىلى اتىس قارۋى نە گازدى تاپانشالار، ريەۆولۆەرلەر نە ەلەكترلى قارۋ - ەكى بىرلىكتەن اسپاۋعا ءتيىس، - دەپ جازىلعان جاۋاپتا.

سونداي-اق مينيسترلىك ماماندارى قازاقستاندىقتار اراسىندا اڭ اۋلاۋعا ارنالعان تەگىس ۇڭعىلى اتىس قارۋىنا سۇرانىس جوعارى ەكەنىن ايتادى.

- ولاردىڭ قانداي ءتۇرى مەن ماركالارى سۇرانىسقا يە ەكەنىن، قارۋ يەسىنىڭ تاڭداۋىنا بايلانىستى دەپ پايىمدايمىز. سەبەبى قارۋ-جاراق دۇكەندەرىندە ءارتۇرلى قارۋ ۇلگىلەرىنىڭ ۇلكەن سپەكترى ۇسىنىلادى، - دەلىنگەن مينيسترلىك مالىمەتىندە.

وسىعان دەيىن ەلىمىزدە كىمدەرگە ۇيىندە قارۋ ۇستاۋعا تىيىم سالىنعانى تۋرالى جازعان ەدىك.