قازاقستاندىقتار 3 جىلدا قانشا مىڭ قارۋدى ءوز ەركىمەن وتكىزدى

الماتى. KAZINFORM - ەلىمىزدە زاڭسىز قارۋدى قۇقىق قورعاۋ ورگاندارىنا وتكىزۋگە مۇمكىندىك بەرەتىن اكسيا ءوتىپ جاتىر.

الماتى قالاسىندا جانە الماتى وبلىسىندا وتكەن كۇندەرى قارۋ قولدانىلعان بىرنەشە قىلمىس تىركەلدى. 9-مامىر كۇنى الماتى وبلىسىنىڭ تالعار اۋدانىندا اتىس بولدى. جانجالدان كەيىن 4 ادام اۋرۋحاناعا جاتقىزىلعان.

10 كۇننەن كەيىن الماتى مەيرامحانالارىنىڭ بىرىندە اتىس بولدى. كۇدىكتى تاپانشامەن ءوز تانىسىنىڭ اياعىن جاراقاتتادى.

وڭىردەگى جاعدايعا بايلانىستى Kazinform اگەنتتىگى ىشكى ىستەر مينيسترلىگىنە ساۋال جولداپ، زاڭسىز اينالىمداعى قارۋدى تاركىلەۋ، اتىس قارۋى قولدانىلاتىن قىلمىستىڭ الدىن الۋ ماقساتىندا قانداي شارالار قولدانىلىپ جاتقانىن سۇرادى.

ۆەدومستۆو جاۋابىنا سايكەس، بيىل 21-ساۋىردەن باستاپ ەلىمىزدە «زاڭ جانە ءتارتىپ» قاعيداتىن ىسكە اسىرۋ اياسىندا حالىقتان زاڭسىز ساقتالعان اتىس قارۋىن، وق-دارىلەردى جانە جارىلعىش زاتتاردى ساتىپ الۋ بويىنشا اكسيا ءوتىپ جاتىر.

- مۇنداي اكسيا كوپ جىلدان بەرى تۇراقتى وتكىزىلىپ كەلەدى. وسىنداي اكسيالار اياسىندا تەك 2022-25-جىلدار ارالىعىندا ەل ازاماتتارى پوليتسيا ورگاندارىنا ءوز ەركىمەن 4 مىڭنان استام اتىس قارۋىن وتكىزگەن. بۇل ءىس-شارا قوعامدىق قاۋىپسىزدىكتى قامتاماسىز ەتۋگە جانە اتىس قارۋىن قولدانا وتىرىپ جاسالاتىن قىلمىستاردىڭ الدىن الۋعا باعىتتالعان، - دەپ حابارلادى مينيسترلىكتەن.

ال الماتى قالاسى پوليتسيا دەپارتامەنتىنىڭ مالىمەتىنشە، 2022-جىلدان باستاپ قازىرگى ۋاقىتقا دەيىن مەگاپوليس تۇرعىندارى 1650 ازاماتتىق قارۋ تاپسىرعان.

ونىڭ ىشىندە:

- 2022-جىلى - 362؛

- 2023-جىلى - 238؛

- 2024-جىلى - 865؛

- 2025-جىلى - 185.

ىشكى ىستەر مينيسترىلىگى اگەنتتىك ساۋالىنا جاۋاپ بەر وتىرىپ، جىل سايىن وتكىزىلەتىن قارۋ-جاراق زاتتارىن ساتىپ الۋ اكسياسى قوعامدىق قاۋىپسىزدىكتى قامتاماسىز ەتۋ بويىنشا قابىلدانىپ جاتقان جالعىز شارا ەمەس ەكەنىن مالىمدەدى.

- تۇراقتى تۇردە ايماقتىق جانە رەسپۋبليكالىق «قارۋ»، «قۇقىقتىق ءتارتىپ» جەدەل-پروفيلاكتيكالىق ءىس-شارالار وتكىزىلەدى، ولاردىڭ اياسىندا زاڭسىز اينالىمنان قارۋ مەن وق-دارىلەر الىنادى. قابىلدانىپ جاتقان شارالاردىڭ تيىمدىلىگى اتىس قارۋىن قولدانا وتىرىپ جاسالاتىن قىلمىستاردىڭ جىل سايىن ازايعانىن كورسەتتى. ماسەلەن، كەيىنگى 5 جىلدا اتالعان ساناتتاعى قىلمىستاردىڭ سانى ەكى ەسەگە قىسقاردى. 2020-جىلعى 221 دەن 2024-جىلى 118 گە دەيىن ازايعان. ال وسى جىلى ەسەپتى كەزەڭدە مۇنداي قىلمىس %30 عا ازايعان، - دەلىنگەن ۆەدومستۆو جاۋابىندا.

ىشكى ىستەر مينيسترلىگى قارۋ الىپ جۇرۋگە قۇقىعى بار ازاماتتار ساناتىن اتادى:

- «جەكەلەنگەن قارۋ تۇرلەرىنىڭ اينالىمىنا مەملەكەتتىك باقىلاۋ جاساۋ تۋرالى» زاڭنىڭ 15-بابىنا سايكەس 18 جاسقا تولعان قازاقستان رەسپۋبليكاسى ازاماتتارى تۇرعىلىقتى جەرى بويىنشا ىشكى ىستەر ورگاندارىنان ناقتى قارۋ ءتۇرىن يەمدەنىپ الۋعا رۇقسات العاننان كەيىن ازاماتتىق قارۋ يەمدەنىپ الۋعا قۇقىعى بار.

- قازاقستان رەسپۋبليكاسىنىڭ 16 جاسقا تولعان ازاماتى سپورتتىق ماقساتتا لاقتىرىلاتىن قارۋدى (ساداقتار مەن اربالەتتەردى) يەمدەنىپ الۋعا، ساقتاۋعا، الىپ جۇرۋگە جانە پايدالانۋعا قۇقىلى.

سونىمەن قاتار ءتارتىپ ساقشىلارى قىلمىستىق كودەكسىنىڭ 287-بابىندا قارۋدى، وق-دارىلەردى، جارىلعىش زاتتاردى جانە جارىلىس قۇرىلعىلارىن زاڭسىز يەمدەنۋ، بەرۋ، وتكىزۋ، ساقتاۋ، تاسىمالداۋ نەمەسە الىپ جۇرگەنى ءۇشىن جاۋاپكەرشىلىك قارالسا، قارۋدى زاڭسىز جاساعاندار وسى كودەكستىڭ 288-بابى بويىنشا جاۋاپقا تارتىلاتىنىن ەسكەرتتى.

جالپى مينيسترلىك مالىمەتىنشە، بۇگىنگى كۇنى ەلىمىزدە ازاماتتىق جانە قىزمەتتىك قارۋ ساۋداسىمەن اينالىساتىن مامانداندىرىلعان 83 دۇكەن بار. الماتى قالاسى اۋماعىندا 15 اڭشىلىق دۇكەنى جۇمىس ىستەيدى. ال الماتى وبلىسىنىڭ اۋماعىندا 5 ليتسەنزيالانعان قارۋ-جاراق دۇكەنى بار. ءبىراق ولاردىڭ بىرەۋى عانا جۇمىس ىستەپ تۇر.

ەسكە سالايىق، جىل باسىندا الماتىدا زاڭسىز قارۋ قولدانعان 16 جاستاعى جاس ءوسپىرىم ۇستالعان.