قازاقستاندىق وقۋشىلار قىسقى كانيكۋلدا نەشە كۇن دەمالادى؟

استانا. قازاقپارات - قىسقى كانيكۋل كەزەڭى 2024 -جىلدىڭ 30-جەلتوقسانى مەن 2025 -جىلدىڭ 8-قاڭتارىن قوسا العاندا ون كۇنگە سوزىلادى، - دەپ حابارلايدى وقۋ-اعارتۋ مينيسترلىگىنىڭ باسپا ءسوز قىزمەتى.

مەكتەپ وقۋشىلارىنىڭ قىسقى دەمالىستاعى بوس ۋاقىتىن ءتيىمدى وتكىزۋ جانە جەكە تۇلعالىق قاسيەتتەرىن دامىتۋ ماقساتىندا «ءبىرتۇتاس تاربيە» باعدارلاماسى اياسىندا ءىس-شارالار جوسپارى جاسالدى. ول بويىنشا مەكتەپتەردە ءبىرقاتار ءبىلىم بەرۋ، سپورتتىق، مادەني جانە شىعارماشىلىق ءىس-شارالار وتكىزۋ جوسپارلانعان:

• «وقۋعا قۇشتار مەكتەپ» جوباسىن ىسكە اسىرۋ اياسىندا «قىستا كىتاپ وقيمىز، جادىمىزعا توقيمىز» مەكتەپىشىلىك ءىس-شاراسى؛
• تەاتر فەستيۆالدەرى مەن قويىلىمدارى؛
• جاڭاجىلدىق اشەكەيلەر جاساۋ بويىنشا شەبەرلىك ساباقتارى؛
• قاۋىپسىزدىك ساباقتارى؛
• مۇراجايلارعا، عىلىمي ورتالىقتارعا جانە تاريحي ەسكەرتكىشتەرگە تانىمدىق ەكسكۋرسيالار؛
• سپورتتىق ويىندار، كونكي، شاڭعى تەبۋ؛
• قايىرىمدىلىق اكتسيالارى جانە باسقا دا شارالار.

ەڭ باستىسى، بالالاردىڭ قاۋىپسىزدىگىن قامتاماسىز ەتۋ. وسى ماقساتتا اتا- انالارمەن بىرگە جول-كولىك جاراقاتتارىنىڭ الدىن الۋعا، مەكتەپتىڭ ىشكى ءتارتىبىن ساقتاۋعا، بالالاردىڭ كوشەدەگى قاۋىپسىزدىگىنە، ۇيدەگى ءورت قاۋىپسىزدىگى جانە كيبەرقاۋىپسىزدىككە ەرەكشە نازار اۋدارىلادى.

ايتا كەتەيىك، بۇل ءىس-شارالار ءبىلىم بەرۋ ۇيىمدارىنا ادىستەمەلىك ۇسىنىم رەتىندە جولدانادى.