قازاقستاندىق تەننيسشى الەمدىك رەيتينگىدە ءتورتىنشى ورىنعا كوتەرىلدى

استانا. KAZINFORM - حالىقارالىق تەننيس فەدەراتسياسى (ITF) جاس وسپىرىمدەر اراسىندا جاڭارتىلعان الەمدىك رەيتينگىنى جاريا ەتتى.

قازاقستاندىق تەننيسشى، 17 جاستاعى ءامىر ومارحانوۆ بىردەن 10 ساتىعا جوعارىلاپ، رەيتينگىدە 4-ورىننان كورىندى.

بۇل - قازاقستان تەننيسى تاريحىنداعى ەكىنشى ۇزدىك ناتيجە. 2018-جىلى تيموفەي سكاتوۆ ITF Juniors Ranking رەيتينگىسىندە كوش باستاعان ەدى.

سول سەكىلدى 16 جاستاعى زاڭعار نۇرلان ۇلى 74 تەن 38-ورىنعا كوتەرىلدى.

دامير جالعاسبايدىڭ قارقىنى دا جاقسى. توپ-100 گە جاقىنداعان ول 112-ساتىدا (84+) تۇر.

ءامىر ومارحانوۆ پەن زاڭعار نۇرلان ۇلى وسى ايدا جاسوسپىرىمدەر اراسىندا اۋستراليا اشىق چەمپيوناتىندا ەل نامىسىن قورعايدى.

ەسكە سالا كەتەيىك، بۇدان بۇرىن يۋليا پۋتينتسيەۆانىڭ ادەلايدادا وليمپيادانىڭ كۇمىس جۇلدەگەرىن جەڭگەنىن جازعان بولاتىنبىز.

يۋليا پۋتينتسيەۆا الەمدىك رەيتينگىدە جەكە رەكوردىنا قول جەتكىزدى.