قازاقستاندىق تاعى ءبىر تانىمال ءانشى قاماۋعا الىندى

قونايەۆ. KAZINFORM - بەلگىلى قازاقستاندىق ءانشى ءابدىجاپپار ءالقوجا ءتارتىپ ساقشىسىنىڭ زاڭدى تالاپتارىنا باعىنباعانى ءۇشىن الماتى وبلىستىق سوتىنىڭ شەشىمىمەن 10 تاۋلىككە قاماۋعا الىندى.

الماتى وبلىستىق پوليتسيا دەپارتامەنتىنەن ءمالىم ەتكەندەي، 6-شىلدەدە ءتارتىپ ساقشىلارى Toyota Camry اۆتوكولىگىن توقتاتتى. تەكسەرۋ بارىسىندا جۇرگىزۋشى كولىك قۇرالىن باسقارۋ قۇقىعىنان ايىرىلعانى انىقتالدى.

«اۆتوكولىكتى ايىپپۇل تۇراعىنا جەتكىزگەن كەزدە KIA Carnival اۆتوكولىگى كەلدى، ونىڭ جولاۋشىسى ازامات م. (ءابدىجاپپار ءالقوجا) پوليتسيا قىزمەتكەرلەرىنە قىسىم كورسەتىپ، قۇقىق بۇزۋشىنىڭ راسىمدەلۋىنە كەدەرگى جاساي باستادى. زاڭسىز ارەكەتتەردىڭ جولىن كەسۋ كەزىندە قۇقىق بۇزۋشى پوليتسيا قىزمەتكەرلەرىنە بەلسەندى تۇردە قارسىلىق كورسەتتى. ەر ادام مەديتسينالىق كۋالاندىرۋعا جەتكىزىلىپ، ونىڭ «ورتاشا» دارەجەلى ماس كۇيى راستالدى»، - دەپ حابارلادى ۆەدومستۆودان.

ناتيجەسىندە كولىك قۇرالىن باسقارۋ قۇقىعىنان ايىرىلىپ كولىكتى باسقارعانى ءۇشىن Toyota Camry جۇرگىزۋشىسى 10 تاۋلىك مەرزىمگە اكىمشىلىك قاماۋعا الىندى. سونداي-اق سوت شەشىمىمەن KIA Carnival جولاۋشىسى ءابدىجاپپار ءالقوجا قۇقىق قورعاۋ ورگانى قىزمەتكەرىنىڭ زاڭدى تالاپتارىنا باعىنباعانى ءۇشىن ول دا 10 تاۋلىككە قامالدى.

وسىعان دەيىن كولىكتەگى پوليتسيا دەپارتامەنتى قايرات نۇرتاستىڭ ۇستىنەن «الماتى- استانا» اۋە رەيسىندە ۇساق بۇزاقىلىق جانە دەنساۋلىققا قاساقانا جەڭىل زيان كەلتىرۋ فاكتىسى بويىنشا اكىمشىلىك ءىس قوزعالعانىن حابارلاعان ەدى.

استانا قالاسىنىڭ اكىمشىلىك ىستەر بويىنشا مامانداندىرىلعان سوتى تانىمال ءانشىنىڭ ءىسىن ونلاين قارادى جانە سول جەردە قايرات نۇرتاس مالىمدەمە جاسادى.

كەيىن سوتتىڭ قاۋلىسىمەن قايرات نۇرتاس 15 تاۋلىككە قاماۋعا الىندى.

اۆتور
الما مۇقانوۆا