قازاقستاندىق تاۋار وندىرۋشىلەرمەن 1,4 تريلليون تەڭگەگە كەلىسىمشارت جاسالادى
استانا. KAZINFORM - پرەمەر-مينيستر ولجاس بەكتەنوۆ «سامۇرىق-قازىنا» ۇلتتىق ءال-اۋقات قورى» ا ق ديرەكتورلار كەڭەسىنىڭ وتىرىسىن وتكىزدى. قوردىڭ باسقارما ءتوراعاسى نۇرلان جاقىپوۆتىڭ وندىرىستىك جانە قارجىلىق كورسەتكىشتەر تۋرالى ەسەبى تىڭدالدى.
مەملەكەت باسشىسىنىڭ باسىم ينفراقۇرىلىمدىق جوبالاردى جۇزەگە اسىرۋ جونىندەگى تاپسىرمالارىنىڭ ورىندالۋ بارىسى قارالدى. قور باسشىلىعى ەكونوميكانىڭ باسىم سالالارىنداعى جالپى سوماسى شامامەن 36,4 تريلليون تەڭگەنى قۇرايتىن ينۆەستيتسيالىق 46 ءىرى جوبا تۋرالى باياندادى.
بۇگىنگى تاڭدا «پوليەتيلەن ءوندىرىسى»، كۇكىرت قىشقىلى زاۋىتى جانە «مويىنتى - قىزىلجار» تەمىرجول جەلىسى، جاڭاوزەن قالاسىنداعى گاز وڭدەۋ زاۋىتى، سونداي-اق «شۋ»، «جامبىل»، «شىمكەنت» قوسالقى ستانسالارىندا قازاقستاننىڭ وڭتۇستىك ايماعىنىڭ ەلەكتر جەلىسىن نىعايتۋ شەڭبەرىندە قۇرىلىس-مونتاجداۋ جۇمىستارى باستالدى.
نۇرلان جاقىپوۆتىڭ ايتۋىنشا، 2025-جىلدىڭ سوڭىنا دەيىن «دوستىق - مويىنتى» تەمىرجول جەلىسى، الماتى قالاسىن اينالىپ وتەتىن اينالما تەمىرجول جەلىسى، اقتاۋ پورتى بازاسىنداعى كونتەينەرلىك حاب، «تالدىقورعان - ءۇشارال» ماگيسترالدى گاز قۇبىرى، كەندىرلىدەگى سۋ تۇشىتۋ زاۋىتى سياقتى ينفراقۇرىلىمدىق نىسانداردى، سونداي-اق Caspi Bitum زاۋىتىن كەڭەيتۋ جانە پاۆلودار مۇناي-حيميا زاۋىتىندا ديزەل وتىنىن گيدروتازارتۋ قوندىرعىسىن رەكونسترۋكتسيالاۋ جوبالارىن اياقتاۋ جوسپارلانىپ وتىر.
وتاندىق تاۋار وندىرۋشىلەردى قولداۋ باعىتىندا اتقارىلىپ جاتقان جۇمىستارعا نازار اۋدارىلۋدا. قوردىڭ ساتىپ الۋ تارتىبىندە: تاۋارلاردى ءو ت و- دەن ساتىپ الۋ باسىمدىعى، جۇمىستار مەن قىزمەتتەردى ورىنداۋ كەزىندە ءو ت و- دەن تاۋارلاردى ساتىپ الۋ بويىنشا مەردىگەرلەر مەن قوسالقى مەردىگەرلىك ۇيىمداردىڭ مىندەتتەمەلەرى، سونداي-اق 16 دان استام قوسىمشا قولداۋ شارالارى كوزدەلگەن. اتالعان قولداۋ شارالارى شەڭبەرىندە قازاقستاندىق تاۋار وندىرۋشىلەرمەن جاسالعان كەلىسىمشارتتار سانىن 2024-جىلعى 1,1 تريلليون تەڭگەدەن 2025-جىلى 1,4 تريلليون تەڭگەگە دەيىن ارتتىرۋ جوسپارعا ەنگىزىلگەن.
سونىمەن قاتار «يمپورتتى الماستىرۋ» باعدارلاماسى بويىنشا «سامۇرىق-قازىنا» قورى وتكەن جىلى قازاقستاندىق كاسىپكەرلەرمەن 191 ميلليارد تەڭگەگە وفتەيك-كەلىسىمشارتتار جاسادى - بۇل 10 ەسە ءوسىم. كاسىپكەرلىكتى قولداۋ شارالارىنىڭ ءبىرى - skstore.kz ەلەكتروندىق دۇكەنى. پلاتفورمادا 13 مىڭنان استام شوب وكىلى جانە 500 وتاندىق تاۋار ءوندىرۋشى تىركەلگەن. 2024-جىلدىڭ قورىتىندىسى بويىنشا 14,6 ميلليارد تەڭگەگە 25 مىڭ تاپسىرىستى قۇراعان، بۇل وتكەن جىلمەن سالىستىرعاندا 7 ەسەگە كوپ.
پرەمەر-مينيستر «سامۇرىق-قازىنا» قورى باسشىلىعىنا جانە جاۋاپتى مينيسترلىكتەرگە جوبالاردىڭ قازاقستان ينفراقۇرىلىمىنا، ەنەرگەتيكاسىنا، كولىك لوگيستيكاسىنا، ونەركاسىپتىك جانە ەكونوميكالىق دامۋىنا مۋلتيپليكاتيۆتى اسەرىن ەسكەرە وتىرىپ، ولاردىڭ ۋاقتىلى جۇزەگە اسىرىلۋىن قامتاماسىز ەتۋدى تاپسىردى.
